Американскиот претседател Доналд Трамп изјави дека не го смета украинскиот претседател Володимир Зеленски за одговорен за војната, но истакна дека не е негов голем обожавател.

„Не го сметам Зеленски за одговорен, но не сум навистина воодушевен од фактот што започна оваа војна. Затоа, не сум задоволен со него, ниту со никого инволвиран“, нагласи Трамп за време на прес-конференцијата во Белата куќа.

„Не го обвинувам, но она што го велам е, не би рекол дека ја завршил најдобрата работа. Добро? Не сум голем фан“, додаде тој. Повтори дека нема шанси рускиот лидер Владимир Путин да ја нападне Украина доколку тој беше претседател во тоа време.

Трамп во понеделникот ги обвини Путин, Џо Бајден и Зеленски за војната, по тој редослед.

„Бајден можеше да ја запре војната, Зеленски можеше да ја запре војната, а Путин не требаше да ја започне. Милиони луѓе загинаа поради три лица. Да речеме дека Путин е број еден, Бајден, кој немаше поим што по ѓаволите прави, е број два, и Зеленски“, рече тогаш американскиот претседател.

Најмалку шест лица се хоспитализирани денеска, од кои едно во критична состојба, по пукање на Државниот универзитет во Флорида (ФСУ), а еден осомничен е уапсен, пишува Ројтерс.

Пукањето се случило околу пладне во зградата на Студентскиот центар во кампусот на ФСУ во главниот град Талахаси. Студентите и персоналот добиле инструкции да останат на безбедно место додека полицијата реагираше на пријава за активен пукач. Повеќе од 42.000 студенти посетуваат настава на главниот кампус на ФСУ.

Болницата потврди дека примила шест пациенти – еден во критична состојба, а другите во тешка состојба. Полицијата приведе еден осомничен веднаш по пукањето, потврдија за Си-Ен-Ен два извори од органите на редот. Засега не се знае дали има повеќе напаѓачи, а полицијата се уште го истражува случајот.

BREAKING: Active shooter has been reported near the Student Union at Florida State University in Tallahassee.

Reports of as many as 30 gunshots heard by students. Students are hiding in rooms currently.

Police are on scene.

Video @streetywx pic.twitter.com/KlZmv50j1D

— Brian Krassenstein (@krassenstein) April 17, 2025

Универзитетот издаде предупредување за активен напаѓач преку официјални канали и ги откажа сите настани за тој ден.

ФБИ и државните безбедносни агенции се вклучени во истрагата и им даваат поддршка на локалните власти. Гувернерот на Флорида Рон Де Сантис изрази поддршка за погодената заедница, а претседателот Доналд Трамп рече дека е „трагично што се случуваат вакви настани“ и дека е целосно информиран за ситуацијата.

Ова е последен во серијата вооружени напади врз американските универзитети. Во 2014 година на истиот универзитет, напаѓач отвори оган во главната библиотека при што беа повредени две студентки и една вработена. Истрагата за денешното пукање е во тек, а универзитетот побара од студентите да го избегнуваат просторот на кампусот додека полицијата истражува.

Дебатата за миграцијата во Германија повторно се разгоре денеска откако авион со 138 лица кои побегнаа од Авганистан и беа класифицирани како ранливи, слета во Германија, јавува ДВ.

Конзервативната ЦДУ, чиј лидер Фридрих Мерц е кандидат за нов канцелар, ја обвини коалицијата во заминување дека пред промената на власта ги забрзала таканаречените летови за прием на бегалци, што според нив ја зајакнува поддршката за екстремната десница.

Сепак, властите посочуваат дека сите патници од овој лет веќе добиле одобрение за влез во земјата, а застапниците го потсетуваат Берлин на неговата хуманитарна обврска кон луѓето кои сега се во опасност во Авганистан, бидејќи работеле за германската армија или институции пред талибанското преземање на Кабул.

Според податоците, меѓу патниците имало 45 деца и млади лица, а од останатите возрасни 76 се жени и 62 мажи. Се наведува дека сите патници се од различни програми и дека имаат законски обврзувачка гаранција за прифаќање. Авионот, изнајмен од федералната влада, полетал од Исламабад, Пакистан.

„Во овие случаи има конкретни, претходни гаранции од Германија“, потенцираше портпаролот на МВР, додавајќи дека безбедноста е приоритет, па секој поединец е темелно проверен пред да влезе.

Три вакви летови слетале во Германија во февруари и март, а од Авганистан годинава пристигнале вкупно 461 лице. Меѓу пристигнатите има поранешни вработени во германските институции и нивни роднини, како и Авганистанци прогонувани од талибанците, меѓу кои и поранешни адвокати и новинари. Според податоците на Министерството за надворешни работи, околу 2.600 особено ранливи лица од Авганистан во моментов чекаат во Пакистан да влезат во Германија, јави ДВ.

Новата коалиција на ЦДУ/ЦСУ и СПД планира да ги укине доброволните федерални програми за прифаќање и нема намера да започнува нови. Експертот за внатрешни работи на ЦДУ, Александар Тром, рече дека таквите програми ќе бидат укинати „колку што е можно повеќе“. Поранешниот претседател на Бундестагот Бербел Бас (СПД) не ја отфрли можноста Германија сепак да прима бегалци од Авганистан, во зависност од правните прашања и договорите со партнерите.

Претставникот на Зелените, Константин фон Ноц, ги бранеше летовите, нагласувајќи дека сите патници поминале строги безбедносни проверки и имаат законски обврзувачка гаранција од Германија и дека откажувањето на програмата би значело „свесно прекршување на ветувањето и отфрлање на човештвото“.

Фридрих Мерц најави построги мерки против нередовните пристигнувања и зголемени депортации, откако АфД стана втората најсилна партија во парламентот на бранот антиимигрантски чувства.