Свет
Технички проблеми предизвикаа откажувања на летови во Велика Британија

Контролата на летање во Обединетото Кралство се чини дека не е во тек со ситуацијата, пишува „Мејл онлајн“ среде предупредување дека хаосот со патувањата ќе трае со денови и дека илјадници патници ќе останат заглавени поради голем ИТ-дефект.
Весникот цитира експерти, кои предупредуваат дека хаосот на аеродромите, најверојатно, ќе трае со денови, со илјадници патници заглавени по катастрофалниот колапс на системот.
Речиси 1.000 лета беа приземјени и откажани, а уште илјадници одложени откако британската Национална служба за воздушен сообраќај (NATS) во понеделникот имаше технички проблеми.
Денес, околу 200.000 патници остануваат блокирани на локација на која не сакаат да бидат, а 200 лета надвор од Велика Британија се откажани поради тоа што екипажот и авионите не беа на позиција. Ова вклучува 80 управувани од „Изи-џет“ и 60 од „Бритиш ервејс“.
Сали Гетин, поранешна уредничка на Air Traffic Management, го доведе во прашање начинот на кој НАТС комуницира со јавноста за време на кризата.
Таа изјави за „Мејл онлајн“: „Во НАТС се навикнати да зборуваат за својот технолошки напредок, но не се навикнати на таква непосредна контрола.
„Тие објавија видео велејќи дека го решиле проблемот, но не ми се чини дека разбрале што е суштинскиот проблем. Се обидуваат да ја уверат јавноста, но начинот на кој комуницираат не ми дава впечаток дека тие се целосно во тек со ситуацијата“.
Извори претходно изјавија за „Тајмс“ дека грешката можеби е предизвикана од погрешно поднесен план од француска авиокомпанија. НАТС ја отфрли можноста за сајбер-напад.
Сепак, Гетин потенцира дека сè уште не е јасно што го предизвикало проблемот. Таа додаде: „Тоа, едноставно, може да биде нешто што било неактивно во софтверот, едноставно – не знаеме. Не видов никаков доказ дека ова го предизвикала авиокомпанија, но ќе треба да видиме“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Хамас сака независна држава со Ерусалим како главен град

Палестинските милитантни групи предводени од Хамас денес изјавија дека отпорот нема да заврши сè додека не заврши окупацијата и не се воспостави независна, целосно суверена држава со Ерусалим како главен град, одговарајќи на таканаречената „Њујоршка декларација“.
„Њујоршката декларација“, подготвена од Франција и Саудиска Арабија, копретседателите на конференцијата, и поддржана од 15 други земји (вклучувајќи ги Бразил, Канада, Турција, Јордан, Катар, Египет и Велика Британија), како и Европската унија и Арапската лига, повикува на прекин на војната во Газа и постигнување на „праведно, мирно и трајно решение за израелско-палестинскиот конфликт врз основа на спроведување на решение за две држави“.
Во овој контекст, тие земји нагласуваат дека „управувањето, спроведувањето на законот и безбедноста на целата палестинска територија мора да бидат единствена одговорност на Палестинската самоуправа, со соодветна поддршка“.
Овие изјави ги одразуваат обврските што палестинскиот претседател Махмуд Абас ги презеде во јуни во подготовка за оваа конференција и во перспектива на убедување на повеќе земји да признаат палестинска држава. Иако Генералното собрание на ОН никогаш не го осуди нападот на Хамас од 7 октомври 2023 година, што доведе до израелска одмазда во Газа, текстот го осудува нападот.
Свет
Трамп: Мировен договор за Украина мора да се постигне до 8 август

Американскиот претседател, Доналд Трамп, изјави дека очекува договор за завршување на руската војна во Украина да се постигне најдоцна до 8 август, соопштија денеска САД пред Советот за безбедност на Обединетите нации.
„И Русија и Украина мора да преговараат за прекин на огнот и траен мир. Време е за постигнување договор. Претседателот Трамп јасно стави до знаење дека тоа мора да се случи до 8 август. САД се подготвени да преземат дополнителни мерки за да го обезбедат мирот“, изјави високиот американски дипломат Џон Кели пред Советот.
Трамп пред два дена најави дека САД ќе почнат да воведуваат царини и други мерки кон Русија за 10 дена, доколку Москва не покаже напредок кон завршување на војната во Украина. Киев и Москва досега одржаа три рунди разговори во Истанбул, кои резултираа со размена на затвореници и тела, но без конкретен напредок во смирувањето на војната што трае речиси три и пол години.
Заменикот на рускиот амбасадор во ОН, Дмитриј Пољански, порача дека Русија планира да ги продолжи преговорите во Истанбул, но се пожали дека „на Запад и понатаму постои страна што ја поддржува војната“.
„Сè уште ги слушаме гласовите на оние кои сметаат дека дипломатијата е само начин да се критикува Русија и да се врши притисок врз неа“, рече Пољански.
Заменичката на украинскиот амбасадор во Обединетите Нации, Кристина Хајовишин, истакна дека Русија мора да се соочи со „единство, решителност и акција“.
„Бараме сеопфатен, праведен и траен мир заснован на принципите на Повелбата на ОН – и ништо помалку. Повторуваме дека целосно, итно и безусловно примирје е клучно. Тоа е првиот чекор кон запирање на руската агресија врз Украина“, рече таа пред Советот за безбедност.
Свет
Забележана рекордна молња, во должина од Париз до Венеција

Светската метеоролошка организација (WMO) денес објави дека регистрирала рекордно долг удар на молња од 829 километри во САД. Молња удрила на 22 октомври 2017 година за време на грмотевици, пишува Франс Прес.
„Се протегала од Источен Тексас до Канзас Сити, покривајќи растојание еднакво на она помеѓу Париз и Венеција“, соопшти организацијата.
Комитет составен од единаесет научници од САД, Бразил, Германија, Шпанија, Израел и Непал го потврди тој рекорд.
Претходно беше задржан од удар на гром долг 768 километри од април 2020 година, исто така во САД, помеѓу Мисисипи и Тексас.
Блесокот на гром што се гледа денес „не беше откриен за време на првичната анализа на бурата во 2017 година, туку беше откриен за време на повторената проценка“, велат метеоролозите.