Свет
Трагедија во Британија: Таткото починал од срцев удар по што детето починало од глад

Сосетката го слушала детето како плаче цела ноќ, се јавила кај надлежните но тие не реагирале. Се верува дека детето умрело од глад откако неговиот татко доживеал срцев удар околу Нова година, но нивните тела биле откриени дури на 9 јануари.
Соседката која живее веднаш до станот каде што таткото и неговиот двегодишен син Бронсон Батерсби беа пронајдени мртви, рече дека се загрижила поради тоа што детето плаче цела ноќ и ја известила Добротворната организација за заштита на децата (NSPCC).
Аманда Тови рече дека контактирала со Националното друштво за спречување на суровост кон децата (NSPCC) пред Божиќ, околу две недели пред момчето да умре од глад откако таткото Кенет доживеал срцев удар.
NSPCC потврди дека го примила извештајот и го предал на „соодветните органи“. Советот на округот Линколншир вети дека ќе изврши „брз преглед“ на инцидентот.
Тови рече дека малото момче ги поминало последните неколку недели од својот живот „сакајќи да биде сакан и гушкан“, додека неговиот татко се борел да се грижи за него, пишува „Дејли мејл“.
– Беше ноќе, сето тоа можев да го слушнам од мојот стан горе. Немам свои деца, па не можам да му кажам на друг како да биде родител – рече таа.
Сепак, таа додава дека се загрижила и се јавила во НСПЦЦ непосредно пред Божиќ бидејќи го слушала момчето како плаче цела ноќ.
– Оставив порака но не добив никаков одговор – додаде таа.
Се верува дека момчето умрело од глад откако неговиот татко доживеал срцев удар околу Нова Година, но нивните тела биле откриени дури на 9 јануари – откако социјален работник претходно двапати заѕвонил на вратата од нивниот стан, но без одговор. на што ја известила полицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин ѝ додели руско државјанство на поранешната помошничка на Бајден која го обвини за сексуално злоставување

Претседателот на Русија, Владимир Путин, ѝ додели руско државјанство на Тара Рид, поранешна помошничка на американскиот претседател Џо Бајден, која го обвини за сексуален напад. Одлуката беше објавена со декрет на официјалната веб-страница на Кремљ синоќа, објави Kyiv Independent.
Рид работела како помошничка во канцеларијата на Бајден во раните 1990-ти, кога тој бил сенатор. Во 2020 година, за време на претседателската кампања на Бајден, таа јавно го обвини за сексуално вознемирување кое наводно се случило додека работеле заедно. Бајден силно ги негираше сите обвинувања во тоа време и никогаш не беше покрената никаква формална постапка против него.
Рид се пресели во Русија во 2023 година и аплицираше за државјанство. Во Русија, таа стана активна во медиумите контролирани од Кремљ, каде што често учествуваше во ширење пропаганда.
За време на еден од нејзините јавни настапи, таа се извини за она што го нарече „агресивен став“ на Америка кон Русија и за поддршката на Вашингтон за Киев под администрацијата на Бајден.
Според стандардните процедури, кандидатите за руско државјанство мора легално да престојувале во земјата најмалку пет години. Сепак, Путин воведе исклучоци.
Тој им дозволи на странците и лицата без државјанство да аплицираат за привремен престој од „морални причини“ и ја поедностави постапката за оние кои потпишуваат договор за воена служба со руските вооружени сили.
Свет
Уште три европски земји ја признаа Палестина

Премиерите на Луксембург, Малта и Монако официјално ја признаа државата Палестина вчера на Генералното собрание на Обединетите нации.
„Ова е почеток на обновена посветеност на надежта, дипломатијата, дијалогот, коегзистенцијата и решението за две држави. На идејата, кревка, но сепак можна, дека мирот може да преовлада“, изјави премиерот на Луксембург, Лук Фриден, пред Генералното собрание на ОН.
„Постојат моменти во историјата кога целта на мирот бара и морална јасност и политичка храброст“, рече тој, додавајќи дека одлуката „не е насочена против Израел или неговиот народ“.
Андора и Белгија најавија дека ќе ја признаат палестинската држава откако ќе бидат ослободени сите заложници и Хамас повеќе нема да биде на власт.
„Ефикасното водење дипломатски односи со новата држава Палестина, вклучително и отворањето на белгиска амбасада и склучувањето меѓународни договори, ќе се спроведе откако ќе бидат постигнати целите на Њујоршката декларација“, изјави белгискиот премиер Барт де Вевер.
Да потсетиме дека вчера, францускиот претседател Емануел Макрон официјално ја призна државата Палестина во име на Франција. „Франција денес ја признава државата Палестина… за мир меѓу израелскиот и палестинскиот народ“, свечено изјави Макрон.
„Дојде време“, рече францускиот претседател во својот говор во Њујорк на конференцијата за решението со две држави, потврдувајќи дека со тоа е верен на историската посветеност на Франција кон Блискиот Исток.
Претходно, Велика Британија, Канада, Австралија и Португалија ја признаа Палестина.
фото: принтскрин
Европа
Платите во руската воена индустрија паднаа за прв пат по инвазијата

Платите во руските воени компании паднаа минатиот месец за прв пат од почетокот на тоталната инвазија врз Украина, дури и додека просечните плати низ целата земја продолжуваат да растат. Наодите доаѓаат од студија на порталот Новаја Газета Европа, објавува „Москва Тајмс“.
Анализирајќи речиси 600.000 огласи за работа од 1.200 воени компании на платформата за регрутирање hh.ru, „Новаја Газета Европа“ откри дека платите во одбранбениот сектор се намалиле за 10 проценти во август 2025 година во споредба со истиот месец во 2024 година.
Падот доаѓа откако беше забележан најголем раст на платите во првата година од војната, кога порастот на државните нарачки создаде недостиг на работна сила и со тоа ги зголеми приходите.
До 2025 година, економијата достигна „пресвртница“, според заменик-министерот за индустрија Василиј Осмаков. Фабриките повеќе не можеа да го прошират производството само со вработување нови работници и воведување прекувремена работа.
Ова забавување ги поткопува предупредувањата издадени од Државната Дума кон крајот на 2024 година за претстоен недостиг од 400.000 работници во одбранбената индустрија. До средината на 2025 година, повеќето фабрики се чини дека го достигнале својот максимален капацитет.
Податоците исто така покажуваат дека вработувањето во одбраната достигна врв во август 2022 година, кога секторот сочинуваше речиси 2% од сите отворени работни места.
Сепак, до летото 2025 година, одбранбените компании објавија само 34.500 слободни работни места за три месеци, што е значителен пад во споредба со 52.000 во истиот период претходната година. Дури и во јануари 2022 година, месецот пред инвазијата, вработеноста беше на повисоко ниво од денес.
Сепак, постои исклучок од овој тренд, а тоа се производителите на беспилотни летала и ракети. Според податоците од „Новаја Газета Европа“ и Американскиот институт за проучување на војната, приходите на производителите на беспилотни летала се зголемиле 2,5 пати од 2022 година, а нивните плати сè уште растат.
фото: принтскрин