Свет
Трамп: Во првите две минути од средбата со Путин ќе знам дали може да се постигне договор

Американскиот претседател Доналд Трамп денес изјави дека украинскиот претседател Зеленски може да присуствува на неговиот самит со рускиот лидер Владимир Путин во Алјаска во петок, но изрази скептицизам дека тоа ќе направи разлика во постигнувањето мировен договор, објави денес телевизиската мрежа Си-Ен-Ен.
„Тој (Зеленски) не беше дел од тоа. Би рекол дека може да оди, но беше на многу состаноци. Знаете, тој е таму три и пол години. Ништо не се случи“, им рече Трамп на новинарите во Белата куќа.
„Ќе имаме состанок со Владимир Путин и на крајот од тој состанок, веројатно во првите две минути, ќе знам точно дали може да се постигне договор или не“, рече Трамп.
На прашањето на новинарите „како ќе го знаe тоа“, Трамп одговори: „Затоа што тоа го правам. Склучувам договори“.
Трамп подоцна додаде дека состанокот меѓу Путин и Зеленски ќе биде неопходен.
„На крајот на краиштата, ќе ги ставам двајцата во иста просторија. Или ќе бидам таму, или нема да бидам таму, и мислам дека ќе се среди“, рече Трамп.
Претседателот на САД рече дека „може да има многу дефиниции“ за добар договор, но исто така, според „Си-ен-ен“, се чини дека ги намали очекувањата пред самитот во петок.
„Се радувам на средбата со Путин за која мислам дека ќе биде добра, но може да биде и лоша“, рече Трамп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Ким Џонг-ун го напушти Пјонгјанг: отпатува со воз за Пекинг

Севернокорејскиот лидер Ким Џонг-ун го напушти Пјонгјанг со специјален воз и се упати кон Пекинг, објави јужнокорејскиот „Ренхап“, повикувајќи се на извори.
Се очекува тој да присуствува на церемониите по повод 80-годишнината од победата во Втората светска војна во кинеската престолнина.
Според најавите, Ким Џонг Ун ќе присуствува на воена парада во чест на „победата во војната на кинескиот народ за отпор против јапонската агресија и Светската антифашистичка војна“.
Севернокорејската новинска агенција KCNA потврди дека лидерот на земјата ќе биде меѓу гостите на овие настани.
Специјалниот воз со кој патува севернокорејскиот претседател ќе пристигне во Пекинг по патување од 20 до 24 часа, а неговото пристигнување е закажано за вторник, 2 септември.
Фото: ЕПА
Свет
Лагард: Опасно е за светската економија ако Трамп ја преземе контролата врз Федералните резерви на САД

Претседателката на Европската централна банка (ЕЦБ), Кристин Лагард, денес предупреди дека доколку американскиот претседател Доналд Трамп ја преземе контролата врз Федералните резерви на САД (ФЕД), со оглед на неговите одлуки и изјави, „тоа би претставувало многу сериозна опасност за американската економија и за светската економија“.
Во интервју за француската радио станица Радио Класик, таа изјави дека преземањето „ќе биде тешко“, со оглед на тоа што Врховниот суд на САД пресуди дека отстранувањето на гувернерите на Федералните резерви може да се направи само во случај на сериозни инциденти.
„Доколку се случи, тоа би претставувало многу сериозна опасност за американската економија и глобалната економија, бидејќи монетарната политика на ФЕД влијае на стабилноста на цените и вработеноста, а последиците што би ги имало врз целиот свет би биле многу загрижувачки“, предупреди Лагард, пренесува Танјуг.
Минатата недела, Трамп ја отпушти една од членовите на Федералниот одбор на гувернери, Лиза Кук, поради тензиите меѓу американскиот претседател и Федералните резерви, кои со недели вршат притисок врз одборот на гувернери да ги намалат каматните стапки, иако службениците не се спремни да го сторат тоа, со оглед на инфлаторниот ризик што го гледаат во зголемувањето на царините.
На прашањето дали верува дека Соединетите Американски Држави остануваат земја управувана од владеењето на правото, Лагард одговори потврдно, „под услов Врховниот суд да се почитува и неговите одлуки да се почитуваат“. „Доколку тој судски орган е изложен на притисок, многу сум загрижена за владеењето на правото“, додаде таа.
Фото: принтскрин
Свет
Нетанјаху: Не е на маса договор за делумно примирје и ослободување на заложниците

Израелскиот премиер Бенјамин Нетанјаху го повтори својот став дека договор со Хамас за делумно примирје и ослободување на заложниците не е на маса, објавија денес израелските медиуми.
За време на шестчасовната седница на израелскиот кабинет за безбедност, министерот за национална безбедност Итамар Бен-Гвир се залагаше за гласање против предлогот за прифаќање какви било делумни договори, на што Нетанјаху одговори дека „нема потреба од гласање бидејќи тоа не е на маса“, објавува „Тајмс оф Израел“.
За време на состанокот, Нетанјаху рече дека претседателот на Соединетите Американски Држави, Доналд Трамп, го повикал и му рекол дека не прифаќа никакви делумни договори со Хамас и дека наместо тоа, ја води борбата против „таа терористичка група со полна сила“, објавува „Танјуг“.
„Заборавете на делумните договори. Одете со полна сила и завршете го тоа“, наводно му рекол Трамп на Нетанјаху, според израелскиот весник.
Пред состанокот на кабинетот за безбедност вестите на „Канал 12“ цитираа неименувани извори, кои велат дека Трамп врши зголемен притисок врз Нетанјаху што побргу да го победи Хамас.
Реагирајќи на изјавите на премиерот на Израел, Форумот на семејства на заложници и исчезнати лица изјави дека Нетанјаху ги отфрла делумните рамки за кои претходно се согласил и дека води стратегија што „не е стратегија на преговори, туку стратегија на опструкција“.
Фото: принтскрин