Европскиот парламент треба да го суспендира процесот на одобрување на трговскиот договор меѓу Европската унија и Соединетите Американски Држави, кој беше договорен во јули, дознава „Би-Би-Си“ од извори блиски до Комисијата за меѓународна трговија на Европскиот парламент.

Одлуката за суспензија, според истите извори, треба официјално да биде објавена утре попладне во Стразбур.

Како што пишува „Би-Би-Си“, станува збор за договорот што во јули го постигнаа американскиот претседател Доналд Трамп и претседателката на Европската комисија Урсула фон дер Лајен, при средба на голф-игралиштето на Трамп во Шкотска.

Договорот предвидува намалување на американските царини на целиот увоз од Европската унија на 15 отсто. Во тој момент, договорот во Брисел беше оценет како поволен, со оглед на тоа што Трамп претходно се закануваше со воведување царини до 30 отсто на европска стока.

Меѓутоа, како што нагласува „Би-Би-Си“, договорот сè уште треба формално да добие одобрување од Европскиот парламент. Комисијата за меѓународна трговија досега нема завршено анализа на договорот, што сега доведе до одлука за привремена суспензија на процесот.

Дополнителен притисок врз договорот се појави во саботата, само неколку часа по новата закана на Трамп за воведување нови американски царини, поврзани со прашањето за Гренланд. Влијателниот германски пратеник во Европскиот парламент Манфред Вебер тогаш изјави дека „одобрување во овој момент не е можно“.

Во завршната фаза на преговорите за трговскиот договор, Европската унија, потсетува „Би-Би-Си“, привремено ги суспендираше сопствените контрамерки, односно царините на американска стока во вредност од 93 милијарди евра.

Таа суспензија истекува на 6 февруари. Ако до тој датум не дојде до продолжување на суспензијата или до парламентарно одобрување на договорот, европските царини на американска стока ќе стапат на сила веќе на 7 февруари.

„Би-Би-Си“ заклучува дека натамошниот развој на настаните би можел сериозно да ги искомплицира трговските односи меѓу Брисел и Вашингтон, во време кога трансатлантските односи веќе се под притисок поради бројни отворени политички и безбедносни прашања.

Во тешката железничка несреќа што се случи на југот на Шпанија загинаа 41 лице, а шестгодишно девојче е единствениот преживеан член од своето семејство, излегувајќи од остатоците на возот речиси без повреди. Меѓу загинатите се нејзините родители, братот и братучедот, јави Асошиејтед прес.

Според весникот „Ла Вангардија“, девојчето по несреќата било пронајдено босо на шините од припадник на Цивилната гарда, откако успеало да избега низ скршен прозорец. Нејзиниот братучед Хуан Баросо изјави за новинарите дека девојчето е во добра здравствена состојба и дека во болница ѝ биле ставени три конци на главата.

Градоначалникот на Пунта Умбрија, од каде што потекнува семејството на девојчето, Хосе Карлос Ернандес, изјави дека утеха наоѓа во фактот што девојчето е надвор од животна опасност.

„Многу луѓе се многу тажни поради жртвите од оваа страшна несреќа, но имаше и многу кои преживеаја, како чудото на девојчето кое е безбедно“, изјави Ернандес за новинарите денеска, откако предводеше минута молк за жртвите.

Во Пунта Умбрија е прогласена тридневна жалост за жртвите, меѓу кои и семејството Заморано Алварез, чие презиме го потврди градскиот совет. Семејството се наоѓало во предните вагони кои го претрпеле најсилниот удар кога возот, од сè уште неутврдени причини, излетал од шините.

Градоначалникот Ернандес потврди дека девојчето сега се наоѓа со бабата и дедото во хотел во Кордоба, најблискиот град до местото на несреќата.

„Има прекрасна фамилија која ќе направи сè што е потребно за да има среќен живот“, рече градоначалникот.

Фото: ЕПА

Премиерката на Данска, Мете Фредериксен, изјави дека Копенхаген нема да се откаже од Гренланд поради американските закани за царини кои имаат за цел да ја принудат продажбата на островот.

Коментирајќи ја можноста ЕУ да воведе реципрочни мерки против САД, Фредериксен рече дека трговската војна меѓу сојузниците е „многу лоша идеја“, објави „Ројтерс“.

Иако се надеваше дека мерки како што е таканаречената „трговска базука“ можат да се избегнат, таа рече дека Европа мора да најде одговор ако САД воведат царини.

Сепак, Фредериксен посочи дека би претпочитала да се справи со безбедносните загрижености на САД со соработка. Таа рече дека Копенхаген предложил потрајно безбедносно присуство на Арктикот за таа цел.

фото/Depositphotos