Свет
Трамп: Договорот со Кина за „Тик-ток“ е на маса

Американскиот претседател Доналд Трамп синоќа изјави дека договорот за „Тик-Ток“ со Кина е на маса, и покрај ескалацијата на трговската војна меѓу Вашингтон и Пекинг.
„Кина не е многу ентузијаст за потпишувањето“, рече Трамп во Овалната соба.
„Имаме договор со некои многу добри луѓе, некои многу богати компании, кои би завршиле одлична работа со тоа, но ќе мора да почекаме и да видиме што ќе се случи со Кина. Има многу на маса. Мислам дека Кина всушност ќе сака да го направи тоа“, додаде тој.
Преговорите продолжуваат.
Трамп најави 90-дневна пауза на неговите нови „реципрочни“ царини за повеќето земји, но ги задржа претходно воведените царини од 104 отсто за Кина и воведе дополнителни 21 отсто како одмазда.
Минатата недела Трамп го продолжи рокот за присилна продажба на „Тик-ток“ за 75 дена, дозволувајќи и на популарната платформа за социјални медиуми да продолжи да работи во САД.
Сопственикот на компанијата, „Бајт денс“, вели дека преговорите со САД продолжуваат, но дека секој договор со Вашингтон ќе биде предмет на кинескиот закон.
Иднината на „Тик-ток“ остана неизвесна откако законот потпишан од поранешниот американски претседател Џо Бајден бара од „Бајт денс“ да ја продаде платформата или да се соочи со забрана. Неколку американски компании, вклучувајќи го и „Амазон“, наводно понудиле да ја преземат платформата за споделување видеа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Кина го губи „Тик-ток“ во САД, „Бајт денс“ останува со мал удел

Американскиот претседател Доналд Трамп потпиша уредба со која се потврдува договорот за одвојување на „Тик-ток“ од кинеската компанија „Бајт денс“ и пренос на мнозинскиот удел во рацете на американски инвеститори.
Според планот, конзорциум предводен од софтверскиот гигант „Оракл“ ќе управува со американските операции на „Тик-ток“, ќе ги чува податоците во домашни сервери и ќе добие лиценца за алгоритмот што препорачува содржини. Очекувањата се американските инвеститори да држат околу 80 отсто од уделите, додека „Бајт денс“ ќе остане со минорен дел.
„Тик-ток“ во САД има околу 180 милиони корисници, а со овој договор платформата ќе продолжи да биде достапна под американска контрола и построг надзор. Од администрацијата на Трамп велат дека целта е заштита на националната безбедност и податоците на корисниците.
Свет
Трамп: Нема да дозволам Израел да го анектира Западниот Брег

Американскиот претседател Доналд Трамп изјави дека нема да дозволи Израел да го анектира Западен Брег, одбивајќи ги барањата на дел од крајно десните израелски политичари за проширување на израелскиот суверенитет врз оваа територија.
„Не, нема да дозволам. Тоа нема да се случи. Доста е, време е ова да запре“, рече Трамп во Белата куќа, објаснувајќи дека темата ја покренал по телефонскиот разговор со премиерот Бенјамин Нетанјаху за состојбата во Појасот Газа.
Притисокот за анексија доаѓа од дел од десното крило на коалицијата на Нетанјаху, кое бара формално воведување на израелскиот суверенитет врз Западен Брег. Овие барања предизвикуваат силна загриженост кај арапските лидери, од кои дел се сретнаа со Трамп на маргините на Генералното собрание на Обединетите нации во Њујорк.
Западен Брег е освоен од Израел во војната во 1967 година. Палестинците со децении го бараат како дел од својата идна држава, заедно со Источен Ерусалим и Појасот Газа. На оваа територија денес живеат околу 2,7 милиони Палестинци и околу 700.000 израелски доселеници. Повеќето земји во светот не ги признаваат израелските населби таму и ги сметаат за нелегални според меѓународното право.
Изјавата на Трамп доаѓа во чувствителен момент на засилени судири во Газа и зголемен дипломатски притисок за изнаоѓање долгорочно решение за израелско-палестинскиот конфликт.
Свет
Трамп најави нови царини на лекови, камиони и мебел

Американскиот претседател Доналд Трамп објави дека од 1 октомври ќе стапат на сила нови царини: 100 отсто на увоз на брендирани лекови, 25 на тешки камиони, 50 на кујнски ормари и 30 проценти на тапациран мебел.
Трамп изјави дека целта е заштита на домашното производство и националната безбедност, додека Американската стопанска комора и повеќе сојузници предупредија дека мерките ќе ги погодат блиските трговски партнери и голем дел од индустријата.