Свет
Трамп изгубил 700 милиони долари додека бил претседател

Богатството на поранешниот претседател на САД, Доналд Трамп, е намалено за 700 милиони долари во периодот кога тој бил претседател на САД.
Според податоците на „Блумберг“, Трамп исто така го почувствувал влијанието на пандемијата на коронавирусот затоа што паднала вредноста на неговите згради, брендирани хотели и одморалишта, како и неговите приходи. Неговата флота авиони и терени за голф исто така изгубила од вредноста. Богатството на Трамп сега се проценува на 2,3 милијарди долари.
„Блумберг“ ги добил податоците со анализа на финансиските документи во периодот од мај 2016 година до јануари 2021 година.
Сепак, финансиите и семејниот бизнис на поранешниот американски претседател се предмет на истрага.
Комерцијалните недвижности сочинуваат три четвртини од неговото богатство, а заработувачката од деловните згради што ги поседува или е косопственик е намалена затоа што голем број луѓе работат од дома. Ова е тренд што може да трае долго време.
Дојче банк беше единствената банка што сакаше да му позајми пари на Трамп по неговиот банкрот во 90-тите години на минатиот век, но по неодамнешните немири во САД, објави дека повеќе нема да работи со него.
Трамп поседува и флота авиони, вклучително и „боинг 757“. Овие авиони се стари неколку децении и нивната вредност се намалува. Седум авиони вредеа 59 милиони долари во 2015 година, а пет од нив вредеа околу 6,5 милиони долари во 2020 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
40 ранети во Израел, двајца критично

Вкупно 40 лица побарале медицинска помош по вечерашниот ирански ракетен напад врз Израел, соопштија локалните здравствени служби. Двајца од повредените се во критична состојба.
Најголем број пациенти се лекуваат во болницата Ичилов во Тел Авив – 18 лица.
Според лекарите, пријавените повреди вклучуваат рани од шрапнели, вдишување чад и состојба на шок.
Свет
Израелската војска: Иран истрела помалку од 100 балистички ракети, повеќето ги пресретнавме

Портпаролката на израелската војска, Ефи Дефрин, рече дека помалку од 100 балистички проектили биле истрелани од Иран кон Израел.
Дефрин рече дека „повеќето од ракетите биле пресретнати од воздушната одбрана или паднале пред да стигнат до израелска територија“.
„Регистрирани се ограничен број погодоци на згради, а дел од штетата е предизвикана од фрагменти од пресретнати проектили“, додаде тој.
Според израелските медицински служби, во нападот биле ранети 40 лица.
Свет
Нетанјаху: Ова е можност за иранскиот народ да се спротивстави на режимот

Израелскиот премиер Бенјамин Нетанјаху вечерва и порача на јавноста дека можат да ги напуштат засолништата, откако новиот бран ирански ракети прелета над израелска територија.
„Иранскиот режим никогаш не бил послаб. Ова е можност за иранскиот народ да се спротивстави на режимот“, рече Нетанјаху во вечерашното обраќање.
Тој директно им се обрати и на граѓаните на Иран: „Јас сум со вас, израелскиот народ е со вас“, рече тој.
Министерот за одбрана на Израел, Израел Кац изјави дека Иран „ја преминал црвената линија со лансирање ракети кон израелските цивилни области“ и најави: „Техеран ќе плати висока цена“.
Оваа иранска одмазда следеше по израелските воздушни напади на иранска територија, при што беа погодени нуклеарни постројки и беа убиени високи команданти и научници.