Катар објави дека Израел и Хамас се на најблиската точка до постигнување договор за прекин на огнот во Газа за ослободување на десетици заложници.

Портпаролот на катарското Министерство за надворешни работи Маџед ал Ансари изјави дека разговорите биле позитивни и продуктивни, но тој не сака да навлегува во детали..

Хамас го прифати нацрт-договорот за прекин на огнот во Газа и ослободување на десетици заложници, соопштија денеска двајца претставници вклучени во преговорите.

Израелски официјален претставник изјави дека е постигнат напредок, но се разговара за детали.

Асошиетед прес доби копија од предложениот договор и египетски функционер и претставник на Хамас ја потврдија неговата автентичност. Планот треба да биде доставен до израелската влада за конечно одобрување.

САД, Египет и Катар ја поминаа изминатата година обидувајќи се да посредуваат за крај на 15-месечната војна и да обезбедат ослободување на десетици заложници заробени во нападот на Хамас на 7 октомври 2023 година, што ја предизвика таа војна.

Околу 100 Израелци се уште се држат како заложници во Газа, а израелската војска верува дека најмалку една третина, а можеби и половина од нив се мртви.

Официјалните лица изразуваат зголемен оптимизам дека е можен договор пред инаугурацијата на новоизбраниот американски претседател Доналд Трамп на 20 јануари, чиј пратеник за Блискиот Исток се приклучи на разговорите.

Договорот од три фази, заснован на рамката што ја претстави американскиот претседател Џо Бајден минатата година и одобрен од Советот за безбедност на Обединетите нации, ќе започне со постепено ослободување на 33 заложници во период од шест недели, вклучувајќи жени, деца, постари лица и ранети цивили, во замена за стотици палестински жени и деца затворени во Израел.

Меѓу ослободените заложници ќе има и пет израелски војници, кои ќе бидат разменети за по 50 палестински затвореници, вклучително и 30 осудени милитанти кои отслужуваат доживотна затворска казна. До крајот на првата фаза, сите цивилни затвореници, живи или мртви, треба да бидат ослободени или нивните тела да бидат предадени.

Во текот на првата 42-дневна фаза, израелските сили ќе се повлечат од населените центри, на Палестинците ќе им биде дозволено да почнат да се враќаат во своите домови во северниот дел на Газа, а хуманитарната помош ќе се зголеми со влез на околу 600 камиони секој ден.

Деталите за втората фаза мора да се договорат во текот на првата фаза.

Тројцата посредници, сепак, му дадоа усни гаранции на Хамас дека преговорите ќе продолжат според планираното и дека ќе се залагаат за договор за спроведување на втората и третата фаза пред крајот на првата, рече египетскиот претставник.

Во втората фаза, Хамас би ги ослободил преостанатите живи заложници, главно мажи војници, во замена за повеќе затвореници и целосно повлекување на израелските сили од Газа, според нацрт-договорот.

Во третата фаза, телата на преостанатите заложници ќе бидат вратени во замена за план за реконструкција од три до пет години што ќе се спроведе во Газа под меѓународен надзор.

Членови на десничарската Алтернатива за Германија (АФД) во југозападниот германски град Карлсруе им поделиле илјадници лажни авионски билети на мигрантите за депортација во нивната „безбедна земја на потекло“.

„Убаво е и во вашата татковина“, пишувало на флаерите, на кои се наведува датумот на заминување 23 февруари, кога во Германија се одржуваат предвремени парламентарни избори, објави „Политико“.

За време на партиската конвенција викендот, кандидатот за канцелар на АфД, Алис Вајдел рече дека партијата ќе изврши „големи репатријации“ доколку дојде на власт.

„Само ремиграцијата може да ја спаси Германија“, пишува на лажните авионски билети, како што се гледа на сликата што ја сподели АФД на социјалните мрежи.

Полицијата го истражува инцидентот како можен случај на говор на омраза, објави јавниот радиодифузен сервис SWR. Телевизијата објави и дека лажните карти се делеле во населби со голем број мигранти. Партијата, сепак, негираше дека конкретно таргетирала мигрантски населби. Политичките лидери во Германија го критикуваа потегот.

„Никој нема да дојде во Германија ако почувствува дека овде владее расизам, а тоа е чист расизам“, изјави кандидатот на Зелените за канцелар Роберт Хабек.

Германската Федерална разузнавачка агенција ја класифицира АФД како потенцијална екстремистичка организација. И покрај ова, партијата во моментов е на второто место по поддршка од гласачите низ целата земја.

Новоизбраниот американски претседател Доналд Трамп ги критикуваше надворешнополитичките резултати на претседателот во заминување Џо Бајден, нарекувајќи ги ново најниско ниво во американската историја.

„Кога ќе погледнете што се случи во последните четири години, мислам дека тоа беше најниската точка во историјата на нашата земја. Беше толку лошо“, изјави синоќа Трамп за каналот Newsmax.

Непосредно пред тоа, Бајден се пофали со достигнувањата на неговиот надворешнополитички тим, тврдејќи дека тие се најдобри во историјата на Белата куќа.

Трамп има дијаметрално спротивен став за резултатите од дипломатијата на Бајден.

„Не сакам да ги навредувам луѓето кога се на пат“, рече Трамп пред да ја нарече страшна, надворешната политика на Бајден.

За време на неговиот прв мандат 2017-2021 година, Трамп беше познат по затегнатите односи со традиционалните американски сојузници, како што се Германија и другите членки на НАТО, што доведе до стравувања дека САД би можеле да го напуштат долгогодишниот воен сојуз. Тој, исто така, бараше посилни врски со традиционалните американски ривали како Русија и Северна Кореја, анализираат медиумите.

Откако победи на изборите во ноември, Трамп успеа да ги подигне тензиите со Канада, членка на НАТО, нарекувајќи ја американска држава, дури и пред да влезе во Белата куќа, а исто така одби да ја исклучи употребата на воена акција за преземање на Гренланд, територијата на Данска, уште еден сојузник во НАТО..

Администрацијата на Бајден, од друга страна, го обвинува Трамп дека всушност го одредил датумот за повлекување од Авганистан и го скратил времето за подготовки. Тие, исто така, ги оспоруваат тврдењата на Трамп за вредноста на напуштената воена опрема во Авганистан.

Новоизбраниот американски претседател Трамп, кој ќе ја преземе функцијата на 20 јануари, изјави дека е убеден оти рускиот претседател Владимир Путин бил охрабрен од лошото американско повлекување од Авганистан и затоа извршил напад врз Украина.