Свет
Трамп нареди повлекување на Националната гарда од Вашингтон
Американскиот претседател, Доналд Трамп, нареди повлекување на војниците на Националната гарда од Вашингтон, оценувајќи дека ситуацијата е под контрола по неколкудневните протести предизвикани поради смртта на Џорџ Флојд.
„Само што ѝ наредив на нашата Национална гарда да започне да се повлекува од Вашингтон сега кога сè е совршено под контрола. Тие ќе се повлечат, но можат да се вратат брзо, доколку е потребно“, објави тој на „Твитер“.
Десетици илјади демонстранти се собраа вчера во Вашингтон и во другите градови на САД, повикувајќи ги властите да стават крај на расизмот и полициската бруталност.
Дванаесетти ден по ред протести се одвиваа во бројни урбани центри, Њујорк, Атланта, Филаделфија, Чикаго, Лос Анџелес, Сан Франциско, Сиетл, Бостон и Мајами, но и во помалите рурални области низ целата земја.
Едно од поголемите изненадувања беше собирот на меѓу 150 и 200 демонстранти, како дел од движењето „Животот на Црнците е важен“ во Видор, град на истокот во Тексас, познат по долгогодишните врски со Кју Клукс кланот.
Интензитетот на протестите започна да опаѓа во средата, откако властите во Минеаполис ги уапсија сите четворица полицајци вклучени во смртта на Флојд. Дерек Шовин, бел полицаец, кој го гушеше Флојд со коленото скоро девет минути, иако повеќепати рече дека не може да дише, е обвинет за убиство од втор степен.
Њујорк денес го укина полицискиот час, по примерот на Лос Анџелес и Вашингтон, кои го направија тоа порано, како и многу други градови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Над 1.300 починати на аџилак во Саудиска Арабија
Бројот на починати за време на овогодишниот аџилак е 1.301, изјави денеска министерот за здравство на Саудиска Арабија, Фахад Ал Џалаџел. Министерот, чии зборови ги пренесе државната телевизија, рече дека причината за смртта е „патување на долги растојанија под директно сонце без соодветна заштита“.
Меѓу загинатите има многу постари лица и оние кои пателе од хронични заболувања. Околу 83 отсто од смртните случаи се оние кои немале одобрение за аџилак. Секоја година десетици илјади верници се обидуваат да учествуваат без официјална дозвола, која се плаќа и се доделува според квоти, а која овозможува пристап до климатизирани простори.
Хаџ е еден од петте столбови на исламот и секој муслиман кој може да си го дозволи е должен да ја исполни оваа верска должност барем еднаш во својот живот.
Свет
Напаѓачи упаднаа во црква и синагога во Русија, убија полицајци, му го пресекоа грлото на попот
Вооружени напаѓачи отвориле оган врз синагога, православна црква и полициска станица во рускиот регион Дагестан, а неколку луѓе биле убиени, јавуваат новинските агенции.
Според првичните информации се работи за координиран напад на исламистички терористи. Руските власти најавија и дека го истражуваат нападот како терористички чин.
Убиени се шест полицајци, еден свештеник и еден чувар на црквата. Двајца од напаѓачите зад неколку напади се убиени, соопшти руското Министерство за внатрешни работи. Напаѓачите му го пресекле грлото на свештеникот, потврдија дагестанските власти. Според првичните информации, убиен е и чуварот на црквата, кој бил вооружен само со пиштол. Другите свештеници се затвориле во црквата и чекале помош.
Девет лица се ранети во нападите, според Ројтерс. Извештаите велат дека еден полицаец е убиен кога се пукало во синагога во Дербент, седиште на древна еврејска заедница во северниот дел на Кавказ. Во исто време, нападната е и православната црква, а непознати напаѓачи пукале и во полициската станица во Махачкала.
Дирекцијата на Истражниот комитет на Русија за Република Дагестан објави дека покренала истрага за тероризам во врска со нападите според Кривичниот законик на Руската Федерација.
Свет
Расте бројот на жртви на Крим – тројца загинати и над 100 повредени во украинскиот напад, тврдат Русите
Бројот на загинати по нападот на Вооружените сили на Украина на Севастопол се искачи на три лица, а меѓу жртвите има и две деца, соопшти денеска гувернерот на Крим, Михаило Развозаев.
„Бројот на ранети се искачи на речиси 100 лица. Мобилизиран е целиот здравствен систем, ангажирани се лекари и медицински персонал. Оперативните сали се во функција. На жртвите им е укажана сета неопходна медицинска помош“, напиша тој на каналот Телеграм.
Развозаев истакна дека нападот бил извршен со балистички проектили со касетна муниција. Тој додаде дека веќе отишол во болница за да ги види жртвите.
Обвинителот од Севастопол Андреј Шевцов е на местото на инцидентот, јавува Известија.
„Одбивањето на ракетниот напад е завршено. Според прелиминарните информации, уништени се пет воздушни цели на небото над водното подрачје. Но, фрагментите од соборените цели паднале во крајбрежната област“, рече Развозаев.
Тој додаде дека откако паднале остатоци од воздушни цели соборени од руските сили за воздушна одбрана, избувнал шумски пожар на површина од 150 квадратни метри, пренесува ТАСС.
Противпожарните екипи излегле на местото на настанот. На северната страна фрагменти од ракета предизвикале пожар во станбена зграда.
Блокиран е и преминот на автомобили на Кримскиот мост, а сообраќајот е обновен 20 минути подоцна.
Министерството за одбрана на Русија соопшти дека во 12:15 часот по московско време нападот на украинските вооружени сили врз цивилната инфраструктура на Севастопол бил спречен со системи за противвоздушна одбрана.