Свет
Трамп: Нѐ поканија да дојдеме на Гренланд; Владата на Гренланд: Тоа не е вистина

Владата на Гренланд остро го демантираше тврдењето на американскиот претседател Доналд Трамп дека американска делегација е поканета да ја посети самоуправната данска територија.
Уша Венс, сопруга на американскиот потпретседател Џеј Ди Венс, би требало да слета на Гренланд во четврток, заедно со американскиот советник за национална безбедност Мајк Волц и министерот за енергетика Крис Рајт.
Посетата предизвика бран на незадоволство во земјата. Премиерот во заминување Муте Б. Егеде ја нарече „многу агресивна“ американска кампања за преземање на арктичкиот остров.
„Дојдовме до точка кога ова повеќе не може да се опише како невина посета на сопругата на политичар. Единствената цел е да се демонстрира моќ над нас“, рече Егеде.
Трамп, сепак, вчера изјави дека „функционерите на Гренланд“ побарале Вашингтон да испрати делегација. „Народот на Гренланд бара од нас да дојдеме таму“, рече претседателот.
Но, владата на Гренланд јасно стави до знаење дека тоа не е вистина.
„За евиденција: Владата на Гренланд, не упати никаква покана за каква било посета – приватна или официјална“, се вели во објавата на официјалниот владин профил на Фејсбук.
Пипалук Линге, висок член на парламентот на Гренланд и претседател на парламентарната комисија за надворешна и безбедносна политика, изјави за Политико дека тврдењето на Трамп за поканата „не е точно“.
Таа додаде дека се планира протест за пристигнувањето на Уша Венс во градот Сисимиут, откако во изминатите две недели се одржаа уште два протести против најавите на Трамп за преземање на Гренланд.
„Протестираме политички, во име на народот на Гренланд“, рече Линге.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Јапонците бесни поради царините на Трамп, бараат итно објаснување

Главниот преговарач за тарифи на Јапонија, Рјосеи Аказава, силно ги повика САД да ја ревидираат наредбата за тарифи на претседателот на состанокот со високи американски претставници во Вашингтон, соопшти јапонската влада.
Јапонија бара објаснувања бидејќи недостатокот на писмена потврда за договорот со САД доведе до забуна околу тоа дали тарифите наметнати од американскиот претседател Доналд Трамп, кои стапија во сила во четвртокот, ќе бидат додадени на постојните.
Аказава разговараше три часа со министерот за трговија Хауард Лутник и половина час со министерот за финансии Скот Бесент, објави јапонската влада. На состаноците, Аказава, исто така, побара САД да издадат претседателски декрет за намалување на тарифите за увоз на јапонски автомобили.
Според договорот постигнат минатиот месец, САД се согласија да ги намалат царините за увоз на јапонски автомобили од 27,5 проценти на 15 проценти, но не поставија рок. „Јапонија ќе остане во тесна комуникација со САД на различни нивоа“, соопшти јапонската влада без да го прецизира одговорот на САД на нејзините најнови барања.
Свет
Реакција од фон дер Лајен за средбата Путин – Трамп

Претседателката на Европската комисија, Урсула фон дер Лајен, објави дека денес разговарала со украинскиот претседател Володимир Зеленски.
„Разговаравме за настаните од изминатите неколку дена и следните чекори кон мировен договор, членството на Украина во Европската Унија и обновата на земјата“, рече таа.
„Ставот на Европа е јасен – ние целосно ја поддржуваме Украина и ќе продолжиме да играме активна улога во обезбедувањето праведен и траен мир“, додаде фон дер Лајен.
Таа не учествуваше во вчерашниот телефонски разговор меѓу американскиот претседател Доналд Трамп и Зеленски и лидерите на неколку клучни европски земји, вклучувајќи ги лидерите на Германија, Полска и Италија.
Денес беше потврдено и дека во следните денови ќе се одржи средба меѓу Трамп и рускиот претседател Владимир Путин. Кремљ вели дека подготовките се во тек, а Путин рече дека Обединетите Арапски Емирати би можеле да бидат едно од можните места за самитот.
Свет
Премиерот на Камбоџа го номинира Трамп за Нобелова награда за мир, испрати писмо до Осло

Премиерот на Камбоџа потврди дека го номинирал претседателот на Соединетите Американски Држави, Доналд Трамп, за Нобелова награда за мир, наведувајќи го неговото извонредно државничко творештво во прекинувањето на граничниот конфликт меѓу Камбоџа и Тајланд.
Хун Манет ја објави информацијата на Фејсбук, заедно со фотографија од американскиот претседател и писмо испратено до Норвешкиот Нобелов комитет. Во писмото се велича интервенцијата на Трамп како еден пример за неговите „исклучителни достигнувања во деескалацијата на тензиите во еден од најнестабилните региони во светот“.
„Ројтерс“ објави дека повикот на Трамп до лидерите на Тајланд и Камбоџа на 26 јули ги обнови напорите за прекинување на еден од најинтензивните конфликти меѓу двата соседа во поновата историја.
Тоа доведе до договорено примирје во Малезија на 28 јули. Двете земји се согласија во да обезбедат непријателствата да не се разгорат повторно и да поканат набљудувачи од Југоисточна Азија.
Пакистанските власти објавија во јуни дека ќе го номинираат Трамп за Нобелова награда за мир за неговата работа во решавањето на конфликтот со Индија, а израелскиот премиер Бенјамин Нетанјаху го објави истото минатиот месец.
Фото: ЕПА