Свет
Трамп побара од Нетанјаху да не го напаѓа Иран, не го послуша

Одамна е јасно дека постојат растечки разлики меѓу израелскиот премиер Бенјамин Нетанјаху и актуелниот американски претседател Доналд Трамп во врска со односите меѓу Израел и Иран.
Трамп во повеќе наврати побара од Нетанјаху да почека, бидејќи Белата куќа сè уште се обидува да преговара со Техеран за неговата нуклеарна програма. Но, Израел одлучи дека е време да се дејствува – без оглед на ставот на Вашингтон.
Израелските власти проценија дека Иран во моментов е во најслабата позиција во регионот во последно време, особено по минатогодишното воено и политичко слабеење на Хезболах во Либан, што, според нив, отстрани една од клучните закани за безбедноста на Израел. Затоа, Нетанјаху заклучи дека повеќе нема причина да се чека – дури и ако Американците не го одобруваат тоа.
Американскиот државен секретар Марко Рубио, веднаш откако беше објавено дека се извршени израелски воздушни напади, издаде кратко соопштение во кое јасно наведе дека САД се дистанцираат од потегот на Израел, нарекувајќи го „едностран“.
Пред нападот, американските претставници објавија дека САД нема да му дадат никаква воена поддршка на Израел доколку одлучи да го нападне Иран. Тоа беше порака што требаше да биде многу јасна во Техеран.
Изјавата на Рубио, во која не се споменуваше американската помош за Израел во случај на иранска одмазда, го покрена прашањето – дали ова е само тактички маневар насочен кон одвраќање на нападите врз американските бази во регионот или е вистински знак за расцеп во односот Трамп-Нетанјаху?
Затоа што, реално, американската помош за Израел во случај на ирански контранапад е речиси сигурна – но чудно е што Вашингтон јавно не го нагласил ова, како што обично прави.
Од друга страна, израелските претставници тврдат дека „координацијата со Американците била целосна и договорена однапред“, но американската страна сè уште не го потврдила ова тврдење.
Иран предупреден
Рубио испрати многу јасна порака до Иран: „Да бидам јасен – Иран не смее да ги таргетира американските позиции или персонал“.
Оваа порака има двоен ефект: одвраќање на директни напади врз американски цели и истовремено поставување основа за можен американски одговор во случај Иран да возврати со напади врз Израел.
Во моментот кога Израел започна напади врз Иран, сирените се огласија низ Израел за населението да може да побара засолниште. Јасно е дека се очекува одговорот на Техеран – и прашањето е како ќе одговорат САД. Минатата година, САД интервенираа во регионот во два наврати за да помогнат во одбраната на Израел. Но, опасноста е во тоа што конфликтот може брзо да излезе од контрола.
За разлика од некои минати кризи, овој пат се чини дека немало поширока координација меѓу Израел и неговите сојузници. Сè започна многу брзо, без најави и без дипломатска подготовка каква што видовме претходно. Следните часови и денови ќе бидат клучни. Не само за регионот, туку и за односите меѓу Тел Авив и Вашингтон, анализира Би-би-си.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.
Свет
Зеленски: Ќе ги вратиме изгубените територии преку дипломатија, а не со сила

Украинскиот претседател Володимир Зеленски, зборувајќи за потенцијалните нови граници меѓу Русија и Украина, рече дека Украина е подготвена да разговара за тоа.
„Ако утре има прекин на огнот, ако немаме сила да ги вратиме овие територии, тогаш сме подготвени да разговараме за тоа. Подготвени сме да ги вратиме некогаш во иднина преку дипломатски средства, а не со сила“, рече Зеленски во интервју за „Аксиос“, одговарајќи на прашањето дали е подготвен да ги признае промените на границите.
Тој исто така рече дека би бил подготвен да поднесе оставка по завршувањето на војната, но дека Украина продолжува да одговара на руските напади.
Зеленски исто така рече дека ако руските претставници не ја запрат војната во Украина, подобро е да си најдат свои нуклеарни засолништа.
Украинскиот претседател е убеден, рече тој по средбата со американскиот претседател Доналд Трамп, кој потоа објави на платформата Truth Social, дека сега верува дека Украина може целосно да ја добие војната, и дека добил поддршка од Трамп за целни напади врз руските енергетски објекти и фабрики за оружје.
„Секако, бев позитивно изненаден“, рече Зеленски, кратко пред да го напушти Генералното собрание на ОН и да се врати во Киев, коментирајќи ја објавата на Трамп.
Кога беше прашан што се променило, Зеленски рече дека тоа е „односот на Трамп со Путин“ и дека по средбата во Алјаска каде што Трамп му дал на Путин, според него, „повеќе отколку што заслужува“, американскиот претседател сфатил дека сојузот со Путин „нема да му донесе успех“.
Зеленски рече дека Трамп му рекол дека Украина треба да изврши реципрочни напади „око за око“ врз руската енергетска инфраструктура и складиштата за оружје и дека тој ќе „работи за да се осигури“ дека Украина ќе добие неодреден нов систем со долг дострел.
Украинскиот претседател додаде дека Трамп наскоро би можел повторно да го промени курсот, според написите.
Фото: принтскрин
Свет
Калас го критикува Трамп: Европа не може сама да ја носи одговорноста за украинската војна

Шефицата на европската дипломатија, Каја Калас, изјави дека Европа не ја сноси единствената одговорност за прекинување на конфликтот во Украина и дека не може сама да го носи овој товар.
Калас со тоа одговори на неодамнешните изјави на американскиот претседател Доналд Трамп нагласувајќи дека е неопходна заедничка акција на сите сојузници за решавање на кризата.
„Европа не може сама да го носи товарот на војната во Украина“, рече Калас додавајќи дека ова е особено важно со оглед на ветувањата на Белата куќа да се залага за прекин на борбите.
Според „Политика“, во европските дипломатски кругови се проценува дека изјавите на Трамп алудираат на постепено повлекување на САД од украинскиот конфликт со префрлање на главната одговорност на европските членки. Како одговор, Калас истакна дека Вашингтон мора да остане во целосна солидарност со НАТО потсетувајќи дека САД се најголемиот и најважен сојузник на алијансата.
Оваа контроверзност следуваше по моментот кога украинскиот претседател Володимир Зеленски пристигна во Њујорк на 80-тото заседание на Генералното собрание на ОН, каде што се сретна и со претставници на Белата куќа. Трамп претходно изјави дека Украина, со поддршка од Европската Унија и финансиска помош од НАТО, е способна да ги врати изгубените територии.
Реагирајќи на таков став, портпаролот на Кремљ, Дмитриј Песков, оцени дека американскиот претседател дава нови изјави под влијание на „визијата на шефот на киевскиот режим“.
Фото: принтскрин