Свет
Трамп помилува поранешен војник осуден за убиство на ирачки затвореник

Американскиот претседател Доналд Трамп го помилува поранешниот поручник на американската армија, Мајкл Беена, од Оклахома, кој беше осуден во 2009 година за убиство на ирачки затвореник, пренесува „Спутник“.
Секретарот за печат за Белата куќа, Сара Сандерс, изјави дека претседателот Трамп потпишал извршна наредба со која целосно го помилува поранешниот војник.
„Случајот на Беена привлече широка поддршка од војската, избраните претставници на Оклахома и од јавноста. За време на издржувањето на казната, Беена беше примерен затвореник. Поради тоа, тој целосно го заслужува ова помилување“, рече Сандерс.
Во 2008 година Беена го застрела осомничениот оперативец на Ал каеда, Али Мансур Мухамед, за да се одмазди за смртта на двајца припадници на неговиот вод кои биле убени во експлозија. Следната година тој беше осуден на 25 години затвор, но казната му беше намалена за 10 години и тој беше пуштен на условна слобода во 2014 година.
На судењето Беена признал дека, наместо да ја почитува наредбата и да го одведе затвореникот дома, тој го одвел човекот на еден железнички мост, го соблекол гол и го испрашувал под закана со оружје за експлозијата во која загинале неговите соборци. Беена рече дека притвореникот се придвижил кон него, што го поттикнало да го убие во самоодбрана.
Државниот јавен обвинител на Оклахома претходно побара помилување за Беена минатиот февруари. Барањето беше обновено минатиот месец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Најмалку 25 лица загинаа во текот на ноќта во нови напади на израелската армија врз Појасот Газа

Најмалку 25 лица загинаа во текот на ноќта во нови напади на израелската армија врз Појасот Газа, во време кога мировните преговори се во застој.
Според здравствени извори, голем дел од жртвите се убиени додека чекале хуманитарна помош во близина на граничниот премин Зиким со Израел. Меѓу загинатите има и четири лица од иста семејна зграда во градот Газа.
Организацијата на Обединетите нации предупреди на ризик од масовна глад во енклавата, и покрај тврдењата на Израел дека не ги блокира доставите на помош. Според ОН, големиот дел од помошта не може да стигне до населението поради воени блокади и грабежи.
Преговорите за прекин на огнот меѓу Израел и Хамас се прекинати, откако американските и израелските преговарачи се повлекоа од Катар. Израелскиот премиер Бенјамин Нетанјаху најави дека се разгледуваат „алтернативни опции“, додека Хамас смета дека повлекувањето било тактика на притисок.
Свет
Поради пожарите во Турција евакуирани се над 2.600 лица

Турската Дирекција за управување со вонредни ситуации (АФАД) евакуираше 2.619 лица откако оваа недела Турција се соочи со серија интензивни шумски пожари во повеќе провинции, јави весникот „Дејли сабах“.
Пожарите, поттикнати од екстремно високи температури, силен ветер и сушно време, мобилизираа илјадници спасувачи и доброволци кои учествуваат во гаснењето на огнот. Екипите се активни од воздух и копно, а според АФАД, ангажирани се 4.231 лице, 45 летала и 1.236 копнени возила.
Најтрагичниот инцидент се случи во средата, во руралниот дел на провинцијата Ескишехир, каде животот го загубија десет лица – пет шумски работници и пет припадници на организацијата АКУТ за пребарувачко-спасувачки операции, додека се бореле со огнената стихија.
Претседателот на Турција, Реџеп Тајип Ердоган, изјави во петокот дека во гаснењето учествуваат 27 авиони, 105 хеликоптери, 6.000 возила и 25.000 лица. Тој изрази сочувство до семејствата на загинатите.
Свет
Париз, Лондон и Берлин повикаа да престане хуманитарната катастрофа во Газа

Хуманитарната катастрофа во Појасот Газа мора веднаш да престане, повикаа вчера во заедничко соопштение Париз, Лондон и Берлин.
„Хуманитарната катастрофа на која сме сведоци во Газа мора веднаш да престане“, нагласија трите европски земји.
Тие на овој начин одговорија на алармот објавен од ОН и невладините организации дека постои ризик од непосреден и широко распространет глад во Газа. Трите европски престолнини ја повикуваат европската влада веднаш да ги укине ограничувањата за испорака на помош.
Франција, Велика Британија и Германија, исто така, потсетуваат дека Израел мора да ги почитува своите обврски според меѓународното хуманитарно право.
„Дојде моментот да се стави крај на војната во Газа“, додадоа тие и ги повикаа сите страни да го прекинат конфликтот со склучување на договор за моментално прекин на огнот.