Свет
Трамп: Престануваме да ја финансираме Јужна Африка

Американскиот претседател Доналд Трамп вчера, без да наведува докази, изјави дека одредени групи луѓе во Јужна Африка се третираат „многу лошо“ и најави дека ќе го прекине финансирањето на земјата додека не се реши проблемот.
„Јужна Африка конфискува земја и многу лошо постапува со одредени класи на луѓе“, напиша Трамп во објавата на платформата „Truth Social“.
„САД нема да го толерираат ова, ние ќе дејствуваме. Исто така, ќе го прекинам целото идно финансирање на Јужноафриканската Република додека не заврши истрагата за оваа ситуација!“, објави тој.
Ројтерс наведува дека не е јасно што довело до објавата на Трамп. Амбасадата на Јужна Африка во Вашингтон не одговори на барањето за коментар надвор од редовното работно време.
Соединетите држави ветија дека ќе и помогнат на Јужна Африка со речиси 440 милиони долари во 2023 година, покажаа најновите податоци на американската влада. Јужна Африка моментално претседава со Г20, по што САД го преземаат.
Претседателот на Јужна Африка минатиот месец рече дека со нетрпение очекува да работи со Трамп
Минатиот месец, јужноафриканскиот претседател Сирил Рамафоса рече дека не е загрижен за односот на земјата со Трамп. Тој рече дека разговарал со Трамп по неговата изборна победа и дека со нетрпение очекува да работи со неговата администрација.
За време на неговата прва администрација, Трамп рече дека САД ќе ги истражат недокажаните убиства на бели фармери во Јужна Африка и насилното преземање земјиште. Преторија тогаш одговори дека е погрешно информиран. Не е јасно дали администрацијата на Трамп спровела истрага.
Маск: Тие туркаат геноцид врз белите луѓе
Блискиот соработник на Трамп, Илон Маск, е роден во Јужна Африка. Во 2023 година, Маск одговори на Икс на видеото на екстремно левичарската јужноафриканска политичка партија која ја пее старата песна против апартхејдот, пишувајќи: „Тие отворено вршат притисок за геноцид врз белите луѓе во Јужна Африка“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Келог: Русија не го добива конфликтот, Украина се бори храбро

Специјалниот претставник на американскиот претседател, Кит Келог, изјави дека Русија не го добива конфликтот во Украина. Неговите зборови ги пренесува „Скај њуз“ од Варшавскиот безбедносен форум.
Келлог истакна дека Европа денес е сведок на конфликт каков што не е виден од Втората светска војна. Според неговата процена, Москва не напредува во согласност со своите цели, а украинската страна се бори храбро и исклучително добро. Тој нагласи дека борбата меѓу Москва и Киев мора да заврши.
Претходно, портпаролот на рускиот претседател, Дмитриј Песков, нагласи дека Русија продолжува да ги спроведува своите стратешки воени операции во Украина, насочени и кон сегашноста и кон иднината на земјата. Песков потсети дека претседателот Владимир Путин постојано ја нагласувал потребата од решавање на основните причини за украинската криза, како и потребата Москва да ги постигне целите поставени од почетокот на конфликтот.
Фото: принтскрин
Свет
Песков: Украина продолжува со милитаристичка политика наместо дијалог

Украина продолжува со својата милитаристичка политика наместо дијалог, изјави денес Дмитриј Песков, портпарол на рускиот претседател, Владимир Путин.
„Гледаме дека тие (Украина) продолжуваат со овој милитаристички став наместо да размислуваат како да се вклучат во дијалог со цел заеднички да бараат безбедносни гаранции за време и во рамките на дијалогот“, изјави Песков пред новинарите, пренесува „РИА новости“.
Тој додаде дека Кремљ слуша разни гласови од европските престолнини и затоа продолжува да ја следи ситуацијата.
Одговарајќи на прашање за изјавите на претседателката на Европската комисија, Урсула фон дер Лајен, во врска со создавањето ѕид од беспилотни летала во Европа, Песков рече дека историјата покажува дека градењето ѕидови е секогаш лоша работа.
„Многу е тажно што оваа милитаристичка конфронтациска политика на Украина сега потенцијално би можела да почне да се материјализира во создавање нови ѕидови на поделба“, истакна тој.
Фото: принтскрин
Европа
„Шпионирала за Киев, планирала да труе војници“: Русите уапсија готвачка на Крим

Федералната служба за безбедност (ФСБ) на Русија објави дека уапсила 45-годишна Русинка, главен готвач во ресторан во Севастопол, на Крим, под сомнение за шпионажа за Украина и план за труење руски војници, објави „Киев пост“.
Неименуваната жена, која е во притвор, е обвинета дека работела за Главната дирекција за разузнавање на Украина (ХУР) во последните две години. ФСБ тврди дека таа ги понудила своите услуги на украинската разузнавачка служба уште во септември 2023 година.
Таа наводно користела „Воцап“ за да споделува информации со своите врски за локациите и за рутите на рускиот воен персонал и опрема во Севастопол, поранешното главно пристаниште на руската Црноморска флота. ФСБ конкретно тврди дека таа фотографирала бродови на Црноморската флота стационирани во Севастополскиот Залив, кои подоцна биле користени од украинските вооружени сили за планирање ракетни напади.
Таа е обвинета и за план за труење припадници на руските специјални сили, кои го посетувале ресторанот во кој работела.
Кримскиот одред на ФСБ соопшти дека жената е обвинета за велепредавство според член 275 од Рускиот кривичен законик додавајќи дека истрагата за нејзините криминални активности е во тек. Во соопштението за медиумите на ФСБ се наведува дека ова е уште еден пример за тоа како „украинските специјални служби ја дестабилизираат општествено-политичката ситуација и предизвикуваат економска штета на државата со активно регрутирање сторители на саботажи и терористички напади“.
фото: принтскрин