Свет
Турската опозиција обвинува за манипулација со пребројувањето на гласовите
![](https://makfax.com.mk/wp-content/uploads/2023/05/Erdogan-Kilicdaroglu.jpg)
Лидерот на Републиканската народна партија (ЦХП), Кемал Киличдароглу, го повика турскиот Врховен изборен совет да постапи одговорно и да побрза со објавувањето на резултатите од претседателските избори тврдејќи дека владејачката Партија на правдата и развојот (АКП) на претседателот Реџеп Таип Ердоган ја блокира волјата на Турција, пренесува „Ал џезира“.
„Драга моја нацијо, тие го блокираат системот со повторени приговори на гласачките места, каде што имаме поголем број гласови. Не можете да го спречите тоа што ќе се случи преку приговори. Нема да дозволиме ‘завршена работа’ “, истакна Киличдароглу од партиското седиште во Анкара во неделата вечерта.
Киличдароглу, сепак, истакна ќе прифати втор круг и дека ќе победи.
„И покрај сите негови лаги и напади, Ердоган не го доби посакуваниот исход. Никој не треба да биде уверен дека ова е ‘завршена работа’. Изборите не се добиваат на балкон“, истакна тој очигледно алудирајќи на обраќањето на Ердоган.
Партијата на Ердоган, од друга страна, го обвини ривалскиот кандидат за „обид за атентат на националната волја“, а портпаролот Омер Челик ги нарече тврдењата на Киличдароглу неодговорни.
Кандидатот аутсајдер, Синан Оган, исто така се огласи со тврдења дека неговиот табор „слушнал дека се вршат некои манипулации во процесите на пребројување гласови во странство“.
„Нема да дозволиме ‘завршена работа’ со манипулација со странски гласови. Не кревајте тензии. Ова е само до вториот круг“, напиша Оган на „Твитер“.
Претседателот на Врховниот изборен совет, Ахмет Јенер, ги отфрли обвинувањата од опозицијата дека ги одложува резултатите посочувајќи претходно во неделата дека податоците се внесуваат во системот и се споделуваат со медиумите и политичките партии во мигот кога пристигнуваат.
Со преброени повеќе од 99 % од гласачките ливчиња, првично удобното водство на Ердоган се намали на 49,4 отсто – нешто под мнозинството од 50 % потребни за да се избегне вториот круг, пренсува „еАнадолија“. Неговиот главен ривал од опозицијата, Киличдароглу, освои 44,9 % од гласовите, Синан Оган освои само 5,3 %.
Додека повеќето од домашните гласови се веќе пребројани, повеќето гласачки ливчиња од странство допрва треба да се пребројат. Распределбата на гласовите може да се промени и во зависност од тоа како изборното тело се справува со гласовите дадени за Мухарем Инџе, кој се повлече од трката, но сепак освои околу 0,5 %.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Свет
Северна Кореја: Тестиравме нова ракета, може да носи боева глава од 4,5 тона
![](https://makfax.com.mk/wp-content/uploads/2024/07/raketa-EPA-1.jpg)
Северна Кореја објави дека успешно тестирала нова тактичка балистичка ракета која може да носи супер голема боева глава од 4,5 тона, објави денеска државната новинска агенција КЦНА.
Се наведува дека тестирањето на новата тактичка балистичка ракета, наречена Хвасонгфо-11 Да-4.5, било спроведено со симулирана тешка боева глава за да се потврди стабилноста и точноста.
Државната ракетна администрација ќе изврши уште едно лансирање на ист тип на проектили во јули за да ја тестира „моќта на експлозија“ на супер големата боева глава, соопшти КЦНА.
Хвасонгфо-11 или Хвасонг-11 е серија балистички ракети со краток дострел развиени од Северна Кореја, инаку познати како КН-23 и КН-24.
КН-23 најверојатно е ракета што Северна Кореја и ја испорачала на Русија и ја користела во војната против Украина, според украинските власти кои ги испитуваат остатоците од проектили лансирани од Русија од декември.
Северна Кореја и Русија негираат каква било трговија со оружје, но нивните врски се развија брзо откако нивните лидери се состанаа во септември во Русија за поблиска воена соработка.
Свет
Нетанјаху: Ослободувањето на директорот на болницата „Ал Шифа“ во Газа е сериозна грешка
![](https://makfax.com.mk/wp-content/uploads/2023/11/netanjahu6.jpg)
Израелскиот премиер Бенјамин Нетанјаху изјави дека ослободувањето на уапсениот директор на болницата „Ал Шифа“ во Газа е „сериозна грешка и етички неуспех“.
Израелските министри и високите безбедносни функционери си ја префрлаат вината еден на друг, тврдејќи дека не се одговорни за ослободувањето на директорот на најголемата болница во Појасот Газа.
„Тој човек, под чија одговорност беа чувани и убиени нашите заложници, треба да биде во затвор“, рече Нетанјаху во изјавата, пренесоа израелските медиуми.
Тој нареди истрага како се случило директорот на болницата Мухамед Абу Селмија да биде пуштен на слобода.
Шефот на израелската служба за безбедност Ронен Бар утре ќе му ги презентира на Нетанјаху резултатите од истрагата, соопштија од кабинетот на премиерот.
Израелскиот лидер нагласи дека одлуката за ослободување на Абу Селмија е донесена без знаење на политичкиот ешалон и шефовите на безбедносните агенции.
Премиерот на Израел формира меѓуагенциско тело составено од Министерството за одбрана, израелската армија, Службата за безбедност и Советот за национална безбедност, кое ќе служи за одобрување на ослободување на затворениците чија истрага е завршена.
Абу Селмија, лекар во болницата, беше уапсен од израелски војници во ноември под сомнение дека му дозволил на Хамас да ја користи болницата во главниот град Газа како центар на операции.
Тој беше уапсен додека се обидуваше да се евакуира на југот на Појасот Газа преку хуманитарниот коридор контролиран од војската и беше одведен на сослушување во службата за безбедност Шин Бет, пренесуваат светските медиуми.
Тој утрово беше вратен во Газа со уште 54 палестински затвореници.
Абу Селмија беше ослободен без обвинение и судење, а Нетанјаху рече дека одлуката за негово ослободување е донесена по петиција на организација за човекови права.
Тие организации тврдеа дека центарот за притвор бил преполн и дека Палестинците биле малтретирани таму, пренесува „Асошиејтед прес“. Ова ја натера владата да префрли поголем дел од палестинските затвореници во други затвори и да ослободи некои.
Директорот на болницата Шифа рече дека бил држен во тешки услови и мачен. Тој и другите палестински здравствени службеници ги негираа израелските обвинувања.
Болницата Шифа беше нападната од Израел двапати од почетокот на војната против Хамас во Газа на 7 октомври минатата година.
„Кој од затворениците ќе биде ослободен, независно одлучуваат безбедносните службеници, врз основа на професионални проценки“, напиша Нетанјаху во повикот за истрага.
Абу Селмија на прес-конференцијата по неговото ослободување рече дека мачењето било речиси секојдневно и дека биле мачени и други палестински затвореници.
Свет
„Горд сум што сум Американец“: Трамп ја поздрави одлуката на Врховниот суд за неговиот делумен имунитет
![](https://makfax.com.mk/wp-content/uploads/2023/11/tramp.jpg)
Поранешниот американски претседател Доналд Трамп ја поздрави денешната одлука на Врховниот суд на САД, која му овозможи да бара имунитет од гонење за некои од дејствијата што ги презеде за време на неговото претседателствување за да ги поништи резултатите од претседателските избори во 2020 година.
Трамп одлуката на Врховниот суд ја окарактеризира како голема победа за Уставот и демократијата.
– Голема победа за нашиот Устав и демократија. Горд сум што сум Американец – напиша Трамп во објава на неговата платформа „Truth Social“.
Оваа одлука на Врховниот суд ја поништи одлуката на федералниот апелационен суд донесена во февруари оваа година, со која беше утврдено дека Трамп не ужива имунитет за наводните злосторства што ги направил за време на неговиот претседателски мандат за поништување на резултатите од изборите во 2020 година.
Трамп инсистираше на тоа дека не може да му се суди за дејствија кои датираат од неговото време како претседател на САД, вклучително и обвиненијата поврзани со нападот на Капитол на 6 јануари 2021 година од страна на неговите поддржувачи во обид да го спречи Конгресот да ја потврди победата на неговиот демократски ривал, Џо Бајден на претседателските избори.