Свет
Турција ја завршува потрагата по преживеани

Турција објави дека денес завршуваат спасувачките напори во потрагата по преживеани во подрачјата погодени од разорниот земјотрес што на 6 февруари ги погоди јужните делови од земјата и северот од Сирија.
Повеќе од 46.000 луѓе загинаа, а се очекува бројот на жртвите да се зголеми во наредните денови.
Ниту Турција, ниту Сирија не објавија колку луѓе се уште се водат за исчезнати по земјотресот.
„Никој не е жив. Мислам дека нема повеќе луѓе што можеме да ги спасиме“, рече Муџдат Ердоган, член на спасувачките екипи во Турција.
Спасувачите од Киргистан вчера спасија две лица од петчлено сириско семејство од урнатините на зграда во Антакија на југот на Турција. Брачниот пар заедно со едното од нивните деца беа спасени живи. Мајката и таткото преживеаа, но детето подоцна почина од дехидрација, соопшти спасувачката екипа. Постарата сестра и близнакот не го преживеале земјотресот.
„Слушнавме плач додека копавме. Кога ќе најдеме живи луѓе, секогаш сме среќни“, изјави за Ројтерс Атај Османов, член на спасувачката екипа. Десет возила на брза помош чекаа во блиската улица.
Спасувачите бараа целосна тишина додека екипите се искачуваа на врвот на урнатините на зградата каде што беше пронајдено семејството.
Светската здравствена организација проценува дека на околу 26 милиони луѓе низ Турција и Сирија им е потребна хуманитарна помош.
Илјадници Сиријци кои побараа засолниште во Турција од граѓанската војна, повторно се вратија во своите домови во воената зона.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Лавров: Спремни сме да се договориме со САД за Украина

Рускиот министер за надворешни работи Сергеј Лавров изјави дека Кремљ е подготвен да постигне договор со САД за Украина, но додаде дека одредени работи сè уште треба да се координираат и прецизираат.
„Претседателот на Соединетите Американски Држави верува, и мислам дека е во право, дека се движиме во вистинската насока“, рече Лавров во интервју кое ќе биде емитувано во целост во недела на емисијата „Face the Nation with Margaret Brennan“ на Си-Би-Ес.
Изјавите доаѓаат откако Русија го нападна Киев, убивајќи 12 лица и ранувајќи повеќе од 90, во најсмртоносниот напад врз украинскиот главен град во последните неколку месеци, токму кога Трамп се обидува да го протурка својот предлог за ставање крај на војната.
На прашањето на водителот Бренан што го оправдува убивањето цивили откако Украина во март изјави дека е подготвена за прекин на огнот, Лавров одговори: „Ние таргетираме исклучиво воени цели или цивилни објекти што ги користи војската“. Тој додаде дека „претседателот Путин тоа јасно го кажа многу пати, и овој пат не е поинаку“.
Лавров јасно стави до знаење дека нападот бил извршен намерно: „Доколку украинските воени сили го користеле тој објект, тогаш рускиот министер за одбрана и воените команданти на терен имаат целосно право да нападнат таква цел“.
Свет
Израел изрази сочувство три дена по смртта на папата

Израелската влада синоќа изрази сочувство за смртта на папата Франциско, три дена откако почина 88-годишниот поглавар на Католичката црква.
„Државата Израел изразува најдлабоко сочувство до Католичката црква и католичката заедница во светот поради смртта на папата Франциско“, објави канцеларијата на премиерот Бенјамин Нетанјаху.
Односите меѓу Израел и Светата столица значително се влошија од почетокот на израелската офанзива врз Газа. Папата Франциско честопати ги критикуваше постапките на Израел во палестинската енклава, каде што живеат околу илјада христијани.
Израелската влада претходно изрази сочувство за смртта на Франциско во понеделникот, но ја избриша објавата по неколку часа.
За разлика од другите земји кои ќе бидат претставени од највисоките функционери на погребот на папата в сабота, Израел испраќа само амбасадор, објави „Тајмс оф Израел“.
Свет
Зеленски: Русија со ракети од Северна Кореја го нападна Киев

Украинскиот претседател Володимир Зеленски рече дека прелиминарните информации укажуваат дека балистичка ракета произведена во Северна Кореја била употребена во рускиот воздушен напад врз Киев што беше извршен завчера, а во која загинаа најмалку 12 лица.
„Според прелиминарните информации, Русите користеле балистичка ракета произведена во Северна Кореја. Нашите специјални служби ги проверуваат сите детали“, рече тој.
Доколку се потврди дека ракетата е произведена во Северна Кореја, тоа, според него, ќе биде уште еден доказ за криминалната природа на сојузот меѓу Русија и Пјонгјанг.
„Тие убиваат луѓе и уништуваат животи заедно – тоа е единственото значење на нивната соработка. Русија континуирано користи такво оружје – ракети, артилерија. За возврат, Пјонгјанг добива можност да го усоврши своето оружје во реални воени услови“, рече Зеленски.
Тој повика на „вистински притисок“ врз Русија да ги запре нападите врз Украина.
„Дури и покрај меѓународните дипломатски напори за завршување на војната, Русија продолжува да убива цивили“, рече Зеленски. „Тоа значи дека Путин не се плаши од ништo“, додаде тој.
Нагласи дека мора да има целосно и безусловно запирање на нападите и дека Русија мора да се согласи со тоа.
„Оваа војна мора праведно да заврши. А за навистина да ја гарантираме безбедноста на нашите луѓе, мора дополнително да го зајакнеме нашиот противвоздушен штит“, рече украинскиот претседател.
„Државите соработници кои ги ценат луѓето и животот мора да ги спречат убиствените сојузи“, додаде тој.