Советот за безбедност на Обединетите нации се состанува денеска за да разговара за нападите на САД врз иранските нуклеарни постројки додека Русија, Кина и Пакистан предлагаат 15-членото тело да усвои резолуција со која се повикува на итен и безусловен прекин на огнот на Блискиот Исток.

Засега не е јасно кога треба да се гласа. Трите земји ја споделија нацрт-резолуцијата, велат дипломатите, и побараа од земјите-членки да го изнесат својот став до утре вечер. За усвојување на резолуцијата потребни се најмалку девет гласа „за“ без вето од петте постојани членки: САД, Франција, Велика Британија, Русија или Кина.

САД најверојатно ќе се спротивстават на нацрт-резолуцијата, која исто така ги осудува нападите врз иранските нуклеарни постројки. Нацртот не ги именува САД или Израел како напаѓачи.

Светот го очекува одговорот на Иран откако американскиот претседател Доналд Трамп рече дека ги „уништил“ клучните нуклеарни постројки во Иран, придружувајќи му се на Израел во најголемата западна воена акција против земјата од исламската револуција во 1979 година.

Иран побара состанок на Советот за безбедност на ОН, повикувајќи ја организацијата „да се пожали за очигледниот и незаконски чин на агресија со цел да го осуди на најсилно можно изразување“.

Пратеникот на Израел во ОН, Дени Данон, вчера изјави дека САД и Израел „не заслужуваат осуда, туку израз на благодарност што го направиле светот побезбедно место“. Генералниот секретар на ОН, Антонио Гутереш, ги нарече американските напади врз Иран опасна ескалација во регионот кој веќе е на работ и директна закана за меѓународниот мир и безбедност.

„Во овој опасен момент, од клучно значење е да се избегне втурнување во хаос. Нема воено решение. Единствениот начин е дипломатијата. Единствената надеж е мирот“, објави Гутереш.

Сириските медиуми јавуваат за напад на бомбаш-самоубиец во црквата Мар Елиас во главниот град Дамаск. Напаѓачот активирал експлозивна направа во самата црква.

Според безбедносните извори загинале најмалку 15 лица, додека медиумите првично јавија за 30. Од она што досега е познато има многу повредени лица во нападот.

Сведок, кој се претстави како Равад, изјави за Асошиејтед прес дека го видел напаѓачот, кој бил придружуван од уште две лица кои побегнале додека тој возел во близина на црквата.

„Пукаше пред црквата…потоа влезе во црквата и се разнесе“, рече тој.

Сирискиот министер за информации Хамза Мостафа го осуди нападот.

„Овој кукавички чин е во спротивност со граѓанските вредности кои не обединуваат“, напиша тој на социјалната мрежа Х

„Ние нема да отстапиме од нашата заложба за еднакво граѓанство… го потврдуваме и ветувањето на државата дека ќе вложи максимални напори за борба против криминалните организации и за заштита на општеството од сите напади кои ја загрозуваат неговата безбедност“, додаде тој.

Локалните извори јавуваат дека безбедносните сили брзо ја затвориле областа, ги евакуирале ранетите и поставиле безбедносен кордон околу местото на нападот.

Ниту една група веднаш не презеде одговорност за нападот, но сириското Министерство за внатрешни работи извести дека екстремист од Исламската држава влегол во црквата, пукал во присутните, а потоа се разнел со експлозивен елек, што било потврдено и со сведоштва.

Ова е прв терористички напад на Исламската држава во Сирија по падот на режимот на Асад.

Американскиот државен секретар Марко Рубио денеска ја повика Кина да влијае на Иран да не го затвора Ормутскиот теснец по нападот на Вашингтон врз иранските нуклеарни локации.

Рубио го упати повикот до Кина на „Фокс њуз“, откако иранската „Прес ТВ“ објави дека иранскиот парламент одобрил затворање на Ормускиот теснец, низ кој тече околу 20 отсто од глобалната нафта и гас.

„Ја охрабрувам кинеската влада во Пекинг да ги повика на ова бидејќи тие во голема мера зависат од Ормускиот Теснец за нивната нафта“, рече Рубио, кој е и советник за национална безбедност.

„Ако го затворат, тоа ќе биде уште една страшна грешка. За нив е економско самоубиство ако го направат тоа. И ние ги задржуваме опциите за да се справиме, но и другите земји треба да го разгледаат прашањето бидејќи ќе им наштети на економиите многу повеќе од нашата“.

Рубио рече дека затворањето на теснецот ќе биде огромна ескалација што ќе бара одговор од САД и другите. Кинеската амбасада во Вашингтон се уште не се огласила.

Американските власти рекоа дека ги уништиле главните ирански нуклеарни локации. Нападите претставуваат ескалација на актуелниот конфликт на Блискиот Исток.

Техеран рече дека ќе се брани со сите потребни средства. Денес, Рубио го предупреди Техеран да не иницира одмазда, велејќи дека таквата акција би била најлошата грешка што некогаш ја направиле, и додаде дека САД се подготвени да разговараат со Иран.