Свет
Убиецот на Џон Ленон по 45 години: Го убив за да бидам познат, само скријте ме некаде под тепих
Марк Дејвид Чепмен, кој го уби Џон Ленон, рече дека го убил од патетична желба да биде некој. Тој ова го изјави неодамна пред комисијата за условно ослободување во пресрет на 45-годишнината од шокантното злосторство.
„Ова беше поради мене и само мене, за жал, и имаше сè врска со неговата популарност“, изјавил во август седумдесетгодишниот Чепмен, кој е во казнено-поправната установа „Грин хејвен“ во округот Дачис, според транскриптот од интервјуто до кој во петокот дојде „Њујорк пост“.
Чепмен, кој го уби обожаваниот четириесетгодишен Ленон на 8 декември 1980 година, 14. пат безуспешно се обиде да излезе од затвор. Тој се извини за празнината што ѝ ја остави на публиката и на пријателите на рок-легендата, но, како што покажуваат документите, комисијата не поверувала во неговото каење.
На прашањето зошто сакал да го убие Ленон, одговорил: „За да бидам познат, да бидам нешто што не сум“.
„А потоа сфатив, еј, тука има цел“, продолжил Чепмен. „Не морам да умрам и можам да бидам некој. Толку ниско паднав“.
Во текот на претходните сослушувања за условно ослободување Чепмен давал слични изјави поврзани со желбата за слава кажувајќи дека сакал да биде познат и дека имал зло во себе.
На сослушувањето на 27 август повторно ја опишал бруталноста на убиството кажувајќи ѝ на комисијата дека доаѓал во Менхетн од Хаваи месеците претходно решен да ја убије рок-иконата откога се идентификувал со Холден Каулфилд од романот „Ловец во житото“ и почнал да верува дека Ленон е лажен.
Тогаш 25-годишниот Чепмен го чекал Ленон, но Ленон не се појавил. Два месеца подоцна, Чепмен се вратил откога опсесијата повторно почнала да се зголемува.
„Тогаш тоа утро, 8 декември, едноставно, знаев. Не знам како знаев, но знаев дека тоа ќе биде денот кога ќе го сретнам и ќе го убијам“, изјавил Чепмен.
Кога Ленон излегол од лимузината со сопругата Јоко Оно, Чепмен пукал во него четирипати во грбот, само неколку часа откога му бил потпишан албумот од страна на музичарот.
Тој бил осуден на казна од 20 години до доживотен затвор.
Во последните години Чепмен го минува времето читајќи ја Библијата навечер, играјќи одбојка со други затвореници и разговарајќи со сопругата Глорија, со која е во брак 46 години.
Чепмен изразил каење за убиството на неколку сослушувања за условно ослободување, вклучувајќи го и последното.
„Тој беше човечко битие“, рекол тој мислејќи на Ленон.
„Еве ме мене, живеам многу подолго и не само на семејството, туку и на неговите пријатели и фанови – се извинувам за агонијата низ која мораа да поминат. Во времето на злосторството воопшто не размислував за тоа, не ми беше гајле“.
Сепак, комисијата заклучила дека му недостига „вистинско каење или значајна емпатија“ кон жртвата. Следното сослушување за негово евентуално условно ослободување ќе може да се одржи во 2027 година.
Чепмен сега вели дека би сакал да избегне јавен интерес.
„Веќе немам никаков интерес да бидам познат“, рекол тој.
„Само ставете ме некаде под тепих. Веќе не сакам да бидам познат, точка“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ: Влеговме во изборна година, можеби покрај парламентарните ќе имаме и претседателски избори
Претседателот на Србија Александар Вучиќ изјави дека Србија „влезе во изборна година“ и дека единственото прашање е дали претседателските избори ќе се одржат покрај парламентарните избори. Тој додаде дека сè уште нема вести од САД во врска со српската нафтена индустрија и дека утре ќе биде организиран „голем состанок“ по овој повод.
Тој рече дека Србија се соочува со тежок период, но дека земјата се подготвила за него.
„Немам никакви вести, не верувам дека ќе има. Тежок период е пред нас, но ние се подготвивме. Имаме голем состанок утре во 11:30 часот, дотогаш треба да ги подготвиме сите потези, па ќе ве информираме што правиме“, им рече Вучиќ на новинарите
„Влеговме во изборна година, најдоцна за една година ќе имаме избори“, изјави Вучиќ пред новинарите.
Вучиќ рече дека сега останува да се подготват изборите и да се види кој ќе учествува на нив, колку листи и кои кандидати.
Вучиќ исто така рече дека, и покрај победата на изборите, СНС мора детално да анализира каде можело да се направи повеќе и што треба да се постигне за да се подобрат резултатите.
„Ќе мора да направиме големи и значајни промени“, рече Вучиќ.
Свет
Трамп до Мадуро: Мора да ја напуштите земјата
Претседателот на САД, Доналд Трамп, наводно му поставил ултиматум на венецуелскиот претседател Николас Мадуро веднаш да се откаже од власта, но Мадуро одбил, барајќи „глобална амнестија“ за себе и неговите сојузници, објави денес „Мајами Хералд“, повикувајќи се на неименувани извори.
„Можете да се спасите себеси и вашите најблиски, но мора да ја напуштите земјата сега“, наводно му рекол Трамп на Мадуро за време на телефонскиот разговор минатата недела, нудејќи безбеден излез за Мадуро, неговата сопруга и син „само ако Мадуро се согласи веднаш да поднесе оставка“.
Мадуро наводно одбил и упатил низа контрабарања, вклучувајќи имунитет од гонење во целиот свет и дозвола за откажување од политичка контрола, но задржување на контролата врз вооружените сили, според написите.
„Мајами Хералд“ објави дека немало понатамошен директен контакт меѓу Трамп и Мадуро, иако Мадуро наводно побарал втор повик минатиот викенд откако Трамп го прогласи воздушниот простор на Венецуела за „целосно затворен“.
Американскиот весник наведува дека разговорите биле посредувани од Бразил, Катар и Турција.
Трамп вчера потврди дека разговарал со Мадуро по телефон, но не даде никакви детали.
„Не сакам да коментирам ништо, но одговорот е да. Не би рекол дека поминало добро или лошо. Тоа беше телефонски разговор“, рече Трамп, според медиумите во регионот.
Фото: ЕПА
Свет
13 лица уапсени во врска со смртоносниот пожар во Хонг Конг
Полицијата во Хонг Конг уапси 13 лица како дел од истрагата за пожар во станбен комплекс во кој загинаа најмалку 151 лице, објави кинеската државна новинска агенција „Ксинхуа“, повикувајќи се на локалните власти.
Во извештајот се наведува дека седум од 20 примероци од материјалот на зградата, кои беа собрани од изгорените облакодери, не ги исполнуваа стандардите за отпорност на пожар.
„Ксинхуа“ додава дека полицијата продолжува да ја истражува несреќата.
Пожар зафати осум облакодери во Хонг Конг во средата, 26 ноември.
Фото: ЕПА

