Свет
Убиството на тинејџерот е непростливо, рече Макрон по немирите во Париз
![](https://makfax.com.mk/wp-content/uploads/2023/06/francija-policija-1.jpg)
Францускиот претседател Емануел Макрон изјави дека вчерашното убиство на 17-годишно момче од страна на полицијата во Париз е непростливо.
„Имаме адолесцент, кој беше убиен. Тоа е необјасниво и непростливо“, им рекол Макрон на новинарите во Марсеј, пренесе „Ројтерс“.
Тој додаде дека ништо не ја оправдува смртта на еден млад човек повикувајќи ги правосудните органи да си ја завршат работата.
Синоќа, во париското предградие Нантер се случија немири и спорадични судири меѓу разгневената младина и полицијата како израз на растечкото незадоволство кај граѓаните во локалната заедница поради убиството на тинејџер.
Француската влада најави зголемено полициско присуство во Париз и другите големи градови и повика на смиреност.
Француското Обвинителство вчера соопшти дека води истрага против полицаецот, кој вчераутро во предградие на Париз уби 17-годишно момче откако младиот човек одбил да го запре автомобилот.
Во соопштението се наведува дека полицаецот пукал во автомобилот по што возачот починал од добиените рани.
Се додава дека еден патник бил приведен и набргу ослободен, но дека полицијата не можела да стапи во контакт со другиот патник, пренесе „Ројтерс“.
Според извештаите, возачот и претходно ѝ бил познат на француската полиција затоа што одбил да го запре возилото.
Министерот за внатрешни работи, Џералд Дарманен, објави дека Генералниот инспекторат на националната полиција спроведува истрага „со цел да се расветлат околностите на оваа драма“.
Минатата година Франција забележа рекордни 13 смртни случаи поврзани со пукање на полицајци при регулирање на сообраќајот, а годинава е втор таков смртен случај.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
Земјотрес ја погоди Црна Гора
![](https://makfax.com.mk/wp-content/uploads/2024/07/zemjotres-cg.jpg)
Земјотрес со јачина од 3 степени според Рихтеровата скала го потресе подрачјето на Црна Гора, јавува ЕМСЦ.
Епицентарот на земјотресот бил во близина на границата со Босна и Херцеговина, на околу 25 километри источно од Гацко, а бил почувствуван и на територијата на Херцеговина. Земјотресот е регистриран на длабочина од 9,2 километри.
Нема податоци за евентуална материјална штета предизвикана од земјотресот.
Свет
Шефот на кабинетот на Зеленски: Украина не е подготвена на компромис со Русија за да се стави крај на војната
![](https://makfax.com.mk/wp-content/uploads/2024/05/zelenski1.jpg)
Украина не е подготвена да постигне компромис со Русија и да отстапи од кој било дел од својата територија за да стави крај на војната, изјави началникот на кабинетот на украинскиот претседател Володимир Зеленски, Андриј Јермак.
Тој го изјави ова во вторникот во Вашингтон на новинарско прашање како ќе ја коментира изјавата на републиканскиот претседателски кандидат Доналд Трамп дека може бргу да го прекине конфликтот во Украина доколку биде избран за претседател на САД во ноември.
Јермак рече дека Украина ќе ги послуша сите совети за да постигне, како што наведе, праведен мир, но дека не може да прави компромиси кога станува збор за независноста, слободата, демократијата, територијалниот интегритет и суверенитет, пренесе „Ројтерс“.
Јермак е во посета на Вашингтон пред самитот на НАТО следната недела во главниот град на САД, каде што се очекува Украина да биде главна тема.
Досега САД испратија воена помош за Украина во износ од повеќе од 50 милијарди долари. Американскиот секретар за одбрана, Лојд Остин, во вторникот изјави дека САД набргу ќе објават повеќе од 2,3 милијарди долари нова воена помош за Украина.
Свет
Израел нареди евакуација на третина од Газа; ОН: Прашањето е каде да се оди
![](https://makfax.com.mk/wp-content/uploads/2024/02/gaza34.jpg)
ОН соопшти дека одлуката на Израел да ги евакуира Палестинците од областите Кан Јунис и Рафа е најголемата таква наредба во Појасот Газа откако борбите принудија 1,1 милион луѓе да го напуштат северниот дел на енклавата во октомври.
Портпаролот на ОН, Стефан Дужарик, во понеделникот рече дека наредбата за евакуација се однесува на една третина од Газа, а процената на Агенцијата на ОН за палестински бегалци (UNRWA) вели дека околу 250.000 луѓе моментно живеат во областа.
Тој смета дека „евакуацијата во толку голем обем само ќе ги влоши страдањата на цивилите и ќе ја зголеми потребата за хуманитарна помош“.
Тој предупреди дека луѓето се соочени со „невозможен избор повторно да се преселат, некои веројатно втор или третпат, во области кои едвај имаат доволно простор и функционални услуги, или да останат во област во која ќе има жестоки борби“.
Според Министерството за здравство на Газа, речиси 38.000 луѓе загинале во борбите. Во енклавата живеат околу 2,3 милиона луѓе.
„За ваша безбедност, мора веднаш да се евакуирате во хуманитарна зона“, објави на социјалните мрежи Авичај Адрае, портпарол на израелските одбранбени сили на арапски јазик.
Додека израелската воена операција против Хамас се одолжува во својот десетти месец, цивилите во Газа се притиснати во сè потесните делови на земјата поставувајќи шатори во урнатините на градовите, од кои веќе побегнале, или покрај морскиот брег.
Многу жители на Кан Јунис се преселија таму од Рафа, откако беше цел на Израел во мај, предизвикувајќи околу милион луѓе да избегаат за само неколку недели. Дотогаш Рафа беше последното прибежиште за цивилите во Појасот Газа.
Наредбата за евакуација дојде откога претходно во понеделникот беа лансирани најмалку 20 ракети од областа Кан Јунис кон израелските заедници, кои се граничат со Газа, според израелската војска.
Луиз Вотериџ, портпаролка на Агенцијата за помош и работа на ОН (UNRWA), која им помага на палестинските бегалци, рече дека наредбата за евакуација може да влијае на околу четвртина милион луѓе во Кан Јунис – од кои на многумина ќе им биде тешко да се евакуираат поради лошите временски и хуманитарни услови.
Дури и ако може да заминат, рече таа, не е јасно каде може безбедно да одат: „Дури и најздравите луѓе ќе се борат да се движат на овие температури со недостиг на храна и вода“. Таа додаде: „А каде да одат тогаш? Тоа е следното прашање“.