Претседателот на Србија, Александар Вучиќ, денеска за ТВ Прва изјави дека министерот Дарко Глишиќ е подобро.

„Многу е подобро отколку пред ден и пол. Тој зборува, иако сè уште не е тоа целосно нормално, но е прекрасно што зборува и ги движи десната рака и нога, што се големи промени. Добро е што можеше да каже од кога се чувствувал лошо и како дошло до тоа. На скенер се виде дека дошло до кинење на вратната артерија, која предизвикала хематом во мозокот, додека не се згрутчи и не доведе до мозочен удар. За среќа, ударот се случи во студио, блиску до болницата“, рече Вучиќ.

Тој нагласи дека е во постојан контакт со семејството на Глишиќ, особено со неговиот син Лука, и додаде дека семејството било многу исплашено.

Говорејќи за реакциите на опозицијата на здравствената состојба на министерот, Вучиќ рече дека тие немаат елементарно воспитување, а сепак сакаат да ја водат државата.

„Некои се радуваа кога беше убиен Зоран Ѓинѓиќ, но јас тоа не го правев. Доколку тоа ми се случеше мене, ни тоа немаше да им биде доволно – би сакале да умрам во уште пострашни маки. Кога умре Милошевиќ, лудаците славеа. Но, се гледа дека ништо не се сменило. Тоа е нешто полошо од тоа некој да не е добар човек – проблемот е што тие луѓе немаат елементарна пристојност. Не мора секого да жалите, но е ред барем да молчите и да изразите сочувство кога некој ќе умре, или да посакате побрзо закрепнување кога некој е болен“, изјави претседателот.

Вучиќ додаде дека е навикнат на такви коментари, но дека на семејството на Глишиќ не му било лесно да ги слуша и чита тие зборови.

Американското Министерство за здравство и социјална заштита ќе ги откаже договорите и ќе го повлече финансирањето за некои вакцини што се развиваат за борба против респираторни вируси како ковид-19 и грип. Роберт Ф. Кенеди јуниор во вторник објави соопштение во кое наведува дека 22 проекти, во вкупна вредност од 500 милиони долари, за развој на вакцини користејќи мРНК технологија ќе бидат прекинати.

Одлуката на Кенеди да ги прекине овие проекти е последен потег со кој тој, како долгогодишен критичар на вакцините, ги реализира своите сомнежи во ефикасноста на вакцините во рамките на националниот здравствен систем. Кенеди ја повлече препораката за вакцините против ковид-19, го распушти одборот кој носи препораки за вакцини и не даде силна поддршка за вакцинирање додека ситуацијата со епидемијата на сипаници се влошуваше.

Стручњаците тврдат дека мРНК технологијата е безбедна

Министерот за здравство ги критикуваше мРНК вакцините во видео објавено на неговите профили на социјалните мрежи, објаснувајќи ја одлуката за укинување на проектите што ги водат најголемите фармацевтски компании во земјата, вклучувајќи Pfizer и Moderna, кои нудат заштита од вируси како грип, ковид-19 и H5N1.

„За да ги замениме проблематичните мРНК програми, даваме предност на развој на побезбедни, пошироко ефективни стратегии за вакцини, како вакцини базирани на целиот вирус и нови платформи кои не пропаѓаат кога вирусите мутраат“, рече Кенеди во видеото.

Стручњаците за заразни болести тврдат дека технологијата мРНК користена во вакцините е безбедна, а заслугата за нејзиниот развој во првата администрација на Трамп ја припишуваат на забавувањето на пандемијата на коронавирус во 2020 година. Тие предупредија дека идните пандемии ќе биде потешко да се сопрат без помош на мРНК технологијата.

„Најопасна одлука во последните 50 години“

„Мислам дека во моите 50 години во јавното здравство никогаш не сум видел опасна одлука како оваа,“ изјави Мајк Остерхолм, експерт за заразни болести и подготовка за пандемии од Универзитетот во Минесота. Тој истакна дека мРНК технологијата нуди предност на брзo производство, што е клучно при нова пандемија која бара нова вакцина.

„Одлуката да се стават мРНК проектите на чекање е кратковида, имајќи предвид дека сè уште постои загриженост за можнота пандемија на птичји грип“, рече за Асошиетед Прес д-р Пол Офит, експерт за вакцини од Детската болница во Филаделфија. „Тие сигурно спасиле милиони животи“, рече Офит за постојните мРНК вакцини.

Научниците ја користат мРНК не само за вакцини против заразни болести, туку и за истражување на имунотерапија за рак. На почетокот на оваа година, милијардерот и технолошки претприемач Лери Елисон ја пофали мРНК технологијата во Белата куќа поради нејзиниот потенцијал во лекување на рак.

Традиционално, вакцините се произведуваат преку одгледување делови од вирусот, често во кокошки јајца или големи садови со клетки, а потоа тој материјал се прочистува. Пристапот со мРНК започнува со исечок од генетскиот код кој носи инструкции за производство на протеин.

Министерството најави дека „другите примени на мРНК технологијата во рамките на министерството не се погодени од ова соопштение“.

мРНК технологијата се користи во одобрени вакцини против ковид-19, но уште не е одобрена за вакцина против грип. Moderna, која истражуваше комбинирана вакцина против ковид-19 и грип базирана на мРНК, изјави дека верува дека мРНК може да го забрза производството на вакцина против грип во споредба со традиционалните вакцини.

Министерството најавува „инвестиции во подобри решенија“

Напуштањето на мРНК проектите означува „промена на приоритетите во развојот на вакцини“, наведува министерството во соопштението, додавајќи дека ќе почнат да инвестираат во „подобри решенија“. „Сакам да бидам целосно јасен, Министерството за здравство и социјална заштита поддржува безбедни, ефективни вакцини за секој Американец кој сака да се вакцинира“, изјави Кенеди.

Фокусот е на „универзална вакцина што го имитира „природниот имунитет“

Неколку часа подоцна, во вторник, говорејќи на прес-конференција во Анкориџ, Аљаска, заедно со двајца републикански сенатори од државата, Кенеди рече дека се работи на алтернатива.

Тој изјави дека фокусот на администрацијата е на „универзална вакцина“ која го имитира „природниот имунитет“. „Веруваме дека ќе биде ефективна, не само против коронавирусот, туку и против грипот“, рече Кенеди.

Хезболах ја обвини либанската влада дека направила голем грев со тоа што планирала да воспостави државен монопол врз оружјето. Вчера, либанската влада ја овласти либанската армија да изготви план со кој ќе се ограничи оружјето низ целата земја на шесте официјални безбедносни сили, што би претставувало голем предизвик за Хезболах.

Одлуката дојде откако САД и партиите што се спротивставуваат на движењето извршија притисок врз владата во Бејрут јавно да се обврзе да го разоружа, поради загриженоста дека Израел ќе ги интензивира нападите врз земјата ако тоа не го стори.

Хезболах објави дека потегот е резултат на американски „диктати“ и дека ќе се третира „како да не постои“.

„Владата на премиерот Наваф Салам направи голем грев со тоа што одлучи да го одземе оружјето од Либан за да се спротивстави на израелскиот непријател. Одлуката целосно им служи на интересите на Израел“, се вели во соопштението.

Во него се наведува дека шиитските министри ја напуштиле седницата на кабинетот пред гласањето, како знак на „отфрлање на таквата одлука“.

Седницата во либанската претседателска палата беше првата каде што владата се осврна на прашањето за оружјето на Хезболах, што беше незамисливо кога групата беше на врвот на својата моќ, пред минатогодишната војна со Израел, во која беше убиен и нејзиниот лидер Хасан Насралах.

Владата ќе се состане повторно утре за да ги продолжи дискусиите за предлозите на САД за временска рамка за разоружување на Хезболах.