Свет
Украина: Русите во Мариупол наредија карантин поради појава на колера

Руските официјални лица во окупираниот Мариупол наредија карантин поради појава на колера, соопштија украинските власти.
Петро Андријушченко, советник на градоначалникот на Мариупол, за украинската телевизија изјави дека градот се подготвува за епидемија на колера поради големиот број мртви тела и ѓубре што се натрупува во градот.
Андријушченко, кој го напуштил градот за време на руските напади на Мариупол, се повика на извори кои се уште се во градот и тврди: „Зборот колера се почесто може да се слушне во градот меѓу локалните власти и нивните надзорници. Колку што знаеме, епидемијата горе-долу веќе започна“.
Тој вели дека се свесни за изолирани случаи на колера во Мариупол, град кој беше во голема мера уништен во месеците руски напади од воздух, море и копно.
Украинскиот портал Киев Индипендент објави дека украинското Министерство за здравство предупредило дека закопувањето на телата во масовни гробници и недостатокот на вода за пиење создаваат ризик од ширење на колера во Мариупол.
Министерството почна да известува за потенцијални случаи на колера во регионот на 1 јуни, според Киев Индипендент.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Јеменскиот премиер е убиен во израелски напад, со него загинаа и неколку министри

Јеменските бунтовници Хути денеска соопштија дека премиерот на владата во Сана, Ахмед ал-Рахави, е убиен во израелски воздушен напад, заедно со неколку министри.
Според Хутите, нападот се случил во четвртокот во јеменскиот главен град Сана, а во него загинале и неколку соработници на премиерот.
Израелските медиуми, повикувајќи се на арапски извори, ја потврдуваат смртта на ал-Рахави и додаваат дека воздушниот напад бил извршен врз станот каде што живеел.
Според извештаите на „Тајмс од Израел“, иако нападот се смета за одделен од претходниот напад насочен кон десетици високи министри на Хутите, постојат индиции дека израелската војска извршила втор напад врз претставници на Хутите кои се собирале надвор од главниот град за да присуствуваат на говор на лидерот на групата, Абдул Малик ал-Хути.
Ситуацијата ја нагласува зголемената тензија во Јемен и продолжувачката конфронтација меѓу израелските сили и Хути бунтовниците.
Регион
(Видео) Силна бура го парализираше црногорското приморје, најкритично во Котор

Силна бура го погоди црногорскиот приморски појас утрово, оставајќи го Котор и околните градови под тежок пороен дожд. Которскиот Залив е целосно погоден од силниот дожд и ветрови, а морето е разбрането, со големи бранови кои се спојуваат со сивото небо.
Туристите, кои вчера уживале во пливање, денес се соочуваат со потполно нестабилни услови.
„Колку и да уживавме во пливањето вчера, денес можеме да пливаме на улица“, изјавил еден од нив.
Ситуацијата е особено критична во близина на Вирпазар, каде што сообраќајот е прекинат поради несреќа, објави РТЦГ. Локалните власти апелираат на внимание и ги советуваат граѓаните да ги следат предупредувањата за безбедност.
Регион
(Видео) Драма на скопскиот аеродром: Aвион од Крит со 200 лица слета во Скопје наместо во Белград

Патници на авиокомпанијата „Виз ер“ кои требаше да летаат од Крит за Белград, наместо тоа завршија на аеродромот во Скопје околу 4 часот утрото, пренесува N1.rs.
Летот, кој бил закажан 15 минути по полноќ, првично бил пријавен како празен, што ги изненадило и полицијата и вработените на скопскиот аеродром.
Јелена, една од патничките, изјавила дека околу 200 лица излегле од авионот, без претходна информација за пренасочувањето. Патниците најпрво добивале СМС-пораки за одложување, а потоа, во 4:20 часот, полетале кон Скопје. На аеродромот биле задржани во авионот подолго време, а не им било дозволено да излезат сè додека една жена не почувствувала влошување на здравјето. На крајот, патниците останале на празен аеродром додека не им бил обезбеден автобус за Белград.
Пилотот им појаснил дека неговото работно време е завршено и дека повеќе информации ќе добијат на аеродромот, но и таму вработените биле целосно збунети бидејќи им било пријавено дека авионот е празен. Патниците се обратиле и до Амбасадата на Србија, но добиле одговор дека не може ништо да се стори, со образложение дека „аеродромот во Белград не работи и не прима авиони“.
Според официјалните информации, веб-страницата на белградскиот аеродром го прикажува летот како откажан, додека на македонскиот аеродром е евидентиран како реализиран, но со задоцнување од повеќе од три часа. На веб-сервисот FlightRadar се забележува дека авионот наместо во Белград, слетал во Скопје, без објаснување за причините.