Свет
„Фајненшл тајмс“: НАТО ја подготвува најголемата воена вежба од Студената војна, ќе ја симулира руската инвазија

НАТО планира в година да ја одржи својата најголема вежба од Студената војна, пишува „Фајненшл тајмс“.
На вежбата треба да учествуваат повеќе од 40.000 војници, кои ќе вежбаат одбрана од руска агресија против една од нејзините земји членки. Вежбата Steadfast Defender доаѓа како дел од брзиот притисок на НАТО да се трансформира во вистински воен сојуз, поттикнат од инвазијата на Украина.
Вежбата ќе почне напролет в година и се очекува да вклучи меѓу 500 и 700 воздушни борбени мисии, повеќе од 50 брода и околу 41.000 војници, соопштија претставници на НАТО.
Шведска, чија кандидатура за членство во НАТО допрва треба да биде ратификувана од Турција и Унгарија, исто така ќе биде вклучена, со што вкупниот број на земји ќе достигне 32. Вежбата ќе се одржи во Германија, Полска и на Балтикот во февруари и март и е дел од новата стратегија за обука со која воената алијанса ќе спроведува две големи вежби секоја година наместо една, пишува „Фајненшл тајмс“.
НАТО исто така ќе тренира за борба против терористичките закани надвор од неговите непосредни граници. Јенс Столтенберг, генералниот секретар на НАТО, минатиот јуни објави дека алијансата ќе го зголеми бројот на своите сили за висока готовност од 40.000 на над 300.000.
Тоа е дел од историскиот ремонт за придвижување на алијансата кон тешки воени способности наспроти лесните и мобилните сили распоредени на Балканот и во Авганистан. По таа изјава, лидерите на НАТО на самитот во Вилнус во јули се согласија со новите регионални одбранбени планови и создавањето на таканаречените сојузнички сили за одговор, мултинационални сили способни бргу да реагираат на заканите.
Балтичките земји беа особено гласни во повикот НАТО да го зајакне своето источно крило додека војниците се собираат на границата со Белорусија. Рускиот претседател Владимир Путин на почетокот на јули изјави дека нуклеарното оружје ќе биде преместено во Белорусија, иако нивното присуство сè уште не е потврдено.
НАТО распореди мултинационални баталјони во балтичките земји за да го забави напредокот на кој било агресор во случај на инвазија. Вежбите исто така се сметаат за клучен дел за демонстрирање на Москва дека алијансата е подготвена да се бори, објаснија претставници на НАТО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Бил Гејтс: Моите деца ќе добијат помалку од еден процент од вкупното богатство, решив дека нема да им правам услуга

Иако е еден од најбогатите луѓе во светот, Бил Гејтс не планира да го пренесе своето богатство на своите деца.
Милијардерот има три деца со поранешната сопруга Мелинда: Џенифер Кетрин Гејтс (29), Рори Џон Гејтс (25) и Фиби Адел Гејтс (22). Неодамна се појави на подкастот Figuring Out With Raj Shamani, каде отворено зборуваше за тоа како ги воспитувал своите деца.
Гејтс, чие богатство се проценува на 107 милијарди долари (околу 99,8 милијарди евра), објасни дека неговите деца ќе наследат само мал дел од неговото богатство кога ќе умре, поточно помалку од еден процент.
Во подкастот, тој беше прашан што мисли за тоа дали родителите, богати или сиромашни, треба да заштедат пари за да им ги остават на своите деца или треба да најдат друга употреба на своето богатство.
„Секој сам одлучува, а во мојот случај моите деца имаа одлично детство и образование, но ќе добијат помалку од еден процент од вкупното богатство, бидејќи решив дека нема да им правам услуга ако наследат повеќе“, одговори тој.
„Не се работи за династија, не барам од нив да го водат Мајкрософт. Сакам да им дадам можност сами да заработат пари и успех“, рече тој и додаде дека сака неговите деца да изградат нешто свое, а не цел живот да ги следи „сенката на неверојатната среќа и привилегија што ја имал нивниот татко“.
Гејтс, исто така, ја истакна важноста на отворената комуникација со децата за овие теми.
„Не сакате вашите деца никогаш да бидат збунети околу вашата поддршка и љубов кон нив. Затоа мислам дека е важно рано да ја објасните вашата филозофија: дека ќе ги третирате сите подеднакво и ќе им пружите неверојатни можности, но дека највисоката цел на тие ресурси е да се вратат на најпотребните преку фондацијата Гејтс“, рече тој, додавајќи дека основата на сите негови деца е многу успешна.
Гејтс, исто така, истакна дека видел примери каде децата на богатите поединци ги охрабруваат своите родители да бидат пофилантропски настроени.
„Видов случаи кога децата им кажуваа на своите родители да бидат подарежливи. Мислам дека помладите генерации понекогаш всушност ја отфрлаат идејата дека богатството едноставно се наследува“, рече тој.
Минатата година, во интервју за „Форбс“, Гејтс потврди дека поголемиот дел од своето богатство ќе биде дониран во хуманитарни цели, вклучувајќи ја и фондацијата Гејтс.
Свет
Се шири страв од новото руско електромагнетно оружје – способно да ја парализира целата непријателска опрема, велат аналитичарите

Москва развива оружје со електромагнетни импулси (EMP) што би можело суштински да ја промени природата на модерното војување, предупредуваат западните аналитичари. Се повеќе воено-технолошки достигнувања доаѓаат од Русија, веднаш откако во јавноста беше претставен ракетниот систем Орешник. Новото руско оружје е способно да го парализира НАТО без да испука ниту еден истрел. Оружјето, познато под името „Алабуга“, според западни извори би можело да ја неутрализира целата инфраструктура на непријателот – без потреба од употреба на нуклеарно оружје.
Според странските медиуми, рускиот претседател Владимир Путин ја разгледува можноста за употреба на ново тајно оружје.
Во екот на растечките тензии меѓу Москва и ЕУ, особено за улогата на НАТО алијансата во Украина, рускиот претседател Владимир Путин наводно дал зелено светло за забрзан развој на супероружје базирано на технологијата на електромагнетни импулси (EMP).
Оружјето засновано на овој принцип функционира со создавање на интензивен електромагнетен пулс кој може да ја уништи или оневозможи целата електронска опрема во голем радиус. Руската програма „Алабуга“ го користи овој концепт со поставување на високоенергетски електромагнетен генератор на балистичка ракета, која експлодира на височина од 200-300 метри.
Ракетата може буквално да го оневозможи речиси целото непријателско оружје и воена опрема, вклучувајќи проектили, системи за противракетна одбрана, бродови и тенкови, како и секаков вид на воена опрема од воздух, море и копно.
Проектилот „Алабуга“ предизвикува дефект на сите микро-кола.
Ефектот е разорен, се случува електронски колапс на површина со дијаметар од 3,5 километри.
Таквиот напад нема да предизвика директна физичка штета на луѓето или зградите, туку ќе ги остави парализирани воените системи, комуникациските мрежи, интернет инфраструктурата и здравствените установи.
Според британскиот новинар Питер Хиченс, кој пишуваше за таблоидот „Дејли мејл“, оружје како „Алабуга“ може да и овозможи на Русија „да победи во војната без да испука куршум и без да убие ниту еден човек“.
За „Алабуга“ првпат се слушна во 2014 година, кога протекоа информации од руски воени извори. Во 2017 година, високи функционери од компанијата „Радиоелектронске технологија“ потврдија дека проектот активно се развива и дека се работи за иднината на електронското војување.
Тогаш, пред осум години, британскиот таблоид „Дејли стар“ објави предупредување и сторија за радио-електронското оружје на кое работат во Русија, пренесувајќи мислење дека тоа ќе биде помоќно од нуклеарна бомба и ќе може да нокаутира цели армии.
Свет
Авион кружел во воздухот, а потоа се вратил на местото на полетување во САД

Авион на американска авиокомпанија на лет од Портланд до Лас Вегас бил принуден да се врати на меѓународниот аеродром во Портланд бидејќи по полетувањето биле забележани чад и необични мириси во пилотската и патничката кабина, соопштија локалните власти.
Авионот полетал во 9 часот и 10 минути и бил во воздух околу 40 минути додека не се пренасочил назад кон аеродромот во Портланд за евакуација, покажуваат официјалните документи за овој лет, кои ги објави локалната телевизија „Коин канал 6“.
„Авионот слета безбедно и немаше пожар или друга непосредна закана за безбедноста. Во тек се медицински контроли на екипажот и патниците“, се наведува во официјалното соопштение на аеродромот во Портланд.
Потврдено е дека нема повредени и дека се проверува авионот, пренесуваат светските медиуми.