Свет
Фицо до Путин: Да се вратиме на тоа што некогаш беше нормално за економска соработка меѓу државите

Словачка сака да ги нормализира односите со Русија и да увезува повеќе руски гас преку гасоводот Турски тек, изјави словачкиот премиер Роберт Фицо пред рускиот претседател Владимир Путин. Тоа е спротивно на ставовите на Европската Унија, која до крајот на 2027 година сака целосно да се ослободи од руската енергија како казна за инвазијата на Москва врз Украина во 2022 година.
Членките на ЕУ, Словачка и Унгарија, се обидуваат да ги задржат политичките врски со Русија, која ги задоволува повеќето од нивните енергетски потреби.
„Сакам отворено да кажам дека сме исклучително заинтересирани за стандардизација на односите меѓу Словачка и Русија“, рече Фицо на состанок со Путин на маргините на одбележувањето на капитулацијата на Јапонија во Втората светска војна во Пекинг. „Да се вратиме на тоа што беше нормално кога станува збор за економската соработка на државите“, додаде тој.
Турски тек е единствениот гасовод преку кој рускиот гас стигнува во Европа по експлозиите на Северен тек во септември 2022 година и откако Украина на 1 јануари ја запре транзитната рута преку својата територија.
Фицо исто така рече дека Словачка повторно почнала да издава визи на руски државјани, кои беа суспендирани по нападот врз Украина.
Тој додаде и дека земјата е заинтересирана руските компании да учествуваат во изградбата на нова нуклеарна електрана – проект кој неговата влада има намера да ѝ го додели на американската компанија Westinghouse.
Фицо најави дека во петок, во западноукраинскиот град Ужгород, ќе се сретне со украинскиот претседател Володимир Зеленски. Тој рече дека ќе го отвори прашањето за неодамнешните украински напади кои го запреле дотокот на руски гас преку гасоводот Дружба во Словачка и Унгарија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Џими Кимел се враќа на екранот

Американскиот водител Џими Кимел утре се враќа на екранот со својот популарен ноќен шоу-програм, откако продукцијата беше привремено стопирана поради неговите контроверзни коментари за убиството на Чарли Кирк, соопшти Дизни.
„Емисјата ја суспендиравме за да избегнеме дополнителни тензии во чувствителен момент за земјата“, порачаа од компанијата, додавајќи дека по разговори со Кимел, одлучиле да продолжат со снимањето.
Кимел, познат по својата критика кон Доналд Трамп, на 14 септември коментираше дека осомничениот напаѓач, Тајлер Робинсон, бил поддржувач на поранешниот претседател. Тој ја исмеа и реакцијата на Трамп по убиството на Кирк, прикажувајќи изјава во која претседателот зборува за реновирање на Белата куќа.
„Ова не е начин на кој возрасен човек тагува по убиство на пријател. Вака четиригодишно дете тагува за златна рипка“, саркастично додаде Кимел.
Емисјата на Кимел се емитува на „Еј-би-си“, телевизија во сопственост на Дизни.
Свет
Франција ја призна Палестина

Францускиот претседател Емануел Макрон вечерва на Генералното собрание на ОН потврди дека Франција ја признава Палестина како независна држава.
Со ова, Франција се приклучува на земји како Обединетото Кралство, Канада и Австралија, кои го направија истиот чекор во последните недели.
„Светот е на чекор до губење на шансата за мир. Време е да се стави крај на војната во Газа“, порача Макрон, додавајќи дека решението со две држави е единствен пат.
Израел остро реагираше, оценувајќи дека признавањето е награда за тероризмот и повтори дека палестинска држава нема да се случи.
Палестинските власти го поздравија чекорот и го оценија како неповратен пат кон дводржавно решение.
Со Франција, вкупно 153 земји-членки на ОН – речиси 80 отсто ја имаат признато Палестина.
Во меѓувреме, Израелската офанзива продолжува. Според здравствени власти во Газа, во последните 24 часа загинале 61 лице, со што вкупната бројка од 7 октомври 2023 достигнува 65.344 загинати.
Свет
Голем напад со беспилотни летала врз Москва, небото е затворено

Москва вечерва беше нападната со беспилотни летала.
Градоначалникот на Москва, Сергеј Собјанин, објави дека противвоздушните сили собориле вкупно девет дронови , а подоцна уште два. Жителите на Московскиот регион слушнале експлозии на пристапот кон градот, а според првите информации што ги објавија руските медиуми, нема повредени или голема материјална штета.
Многу откажани и одложени летови
Повеќе од 35 летови беа откажани и одложени на московските аеродроми Шереметјево, Домодедово и Внуково во вечерните часови поради украински напади со беспилотни летала. Работата на аеродромот Шереметјево беше привремено суспендирана.
„До 20:19 часот по московско време, 21 лет беше одложен, а уште еден откажан во Шереметјево. Девет одложувања и две откажувања беа регистрирани во Домодедово, а четири летови беа одложени во Внуково“, објавуваат руските медиуми.
Руските медиуми наведуваат дека по нападот, тајната служба на ФСБ и Истражниот комитет ќе спроведат истрага и дека се очекува кривична постапка за тероризам. Оперативните служби на терен ги проверуваат остатоците од беспилотните летала и проверуваат дали предизвикале дополнителна штета.