Генералниот секретар на НАТО Марк Руте денеска изјави дека Европа има важна улога во обезбедувањето траен мир во Украина.

„Треба да продолжиме да ја зајакнуваме Украина за да дојде на преговарачка маса“, рече Руте на заедничката прес-конференција со словачкиот претседател Петер Пелегрини во Братислава.

Тој рече дека Украина ќе бара „цврсти безбедносни гаранции“ за да се постигне траен мир, додавајќи дека земјите од НАТО веќе разговараат „што би можело да значи тоа“.

„Украинците го презираат Володимир Зеленски кој профитира од загинатите украински војници“, напиша Илон Маск на X.

Маск ги повтори тврдењата на Трамп и го повика Зеленски „да ги одржи изборите и да престане со она што го прави сега“.

„Ако украинскиот народ навистина го сака Зеленски, тогаш тој би одржал избори. Тој знае дека ќе загуби со голема разлика, и покрај тоа што ќе ја преземе контролата врз сите украински медиуми, па затоа ги откажа изборите“, пишува Маск.

„Во реалноста, украинскиот народ го презира, поради што одбива да одржи избори. Го предизвикувам Зеленски да одржи избори и да престане да го прави тоа што го прави. Претседателот Трамп е во право што го игнорира и го решава мирот независно од одвратната, огромна корупциска машина која се храни со мртвите тела на украинските војници“, напиша Маск.

Унгарија нема да поддржи продолжување на санкциите на Европската унија против руски и белоруски правни и физички лица, бидејќи, како што изјави министерот за надворешни работи Петер Сијарто, треба да се даде простор на мировните преговори меѓу САД и Русија, пренесува Anadolu.

Зборувајќи во Вашингтон, Сијарто го критикуваше Брисел за донесување „избрзани одлуки“ кои, според него, го отежнуваат постигнувањето мир. Тој, исто така, ја обвини ЕУ дека не ги почитува сопствените обврски кон Унгарија кога станува збор за енергетската безбедност.

„Нема да се согласиме да ги продолжиме санкциите во понеделник“, рече Сијарто. Тој истакна дека Европската комисија не го исполни своето ветување да ја вклучи Унгарија во преговорите за продолжување на транзитот на украинскиот гас, туку наместо тоа ги покани само Словачка и Украина.

„Тие веќе прекршија една од четирите гаранции“, предупреди тој. Унгарија исто така се спротивставува на предлогот на ЕУ за доделување 20 милијарди евра помош за Украина, тврдејќи дека пакетот не придонесува за мир, туку само ја зајакнува преговарачката позиција на Киев.

„Нема да го поддржиме трошењето на парите на европските даночни обврзници за продолжување на војната“, рече унгарскиот министер. Тој посочи дека изборот на Доналд Трамп ја промени глобалната политичка динамика во корист на мирот, но дека европските либерали, како што вели, се обидуваат да ги блокираат овие напори.

„Никогаш не сме биле поблиску до решение, бидејќи директните преговори меѓу САД и Русија повторно ја разгореа надежта за мир“, заклучи тој. Во рамките на посетата на САД, Сијарто денеска разговараше со американскиот министер за финансии Скот Бесент.