Свет
Француски сенатор тврди дека забраната за бурка не се спроведува во одредени области

Француската сенаторка Жacаклин Еустаче-Бринио, автор на извештајот за исламскиот радикализам во Франција, тврди дека одредени области на земјата не ја применуваат забраната на исламските превези на лицето, пренесува „Ла Кроа“.
Еустаче-Бринио, член на десниот центар Ле Републикан (ЛР), рече дека и покрај бројките, кои покажуваат сè помалку предупредувања и казни за носење бурка или никаб, законот не се спроведува во многу населби и гратчиња под влијанието на исламистите.
Донесена пред една деценија, француската забрана за превезот на целото лице, која беше ставена во сила од поранешниот конзервативен премиер Франсоа Фијон под претседателство на Никола Саркози, предвидува глоба од 150 евра за оние што го покриваат лицето на јавни места.
Од април 2011 година до март 2016 година полицијата извршила 1.726 проверки, издала 1.644 глоби и 82 предупредувања за оние што биле фатени со превез на целото лице. Француското Министерство за внатрешни работи тврди дека бројките се намалени по спроведувањето на законот и го наведе трендот како успех.
Француската забрана за превез предизвика бран слично законодавство во другите европски земји од 2010 година, вклучувајќи ги Австрија, Бугарија и Холандија, но во последните години имаше правни предизвици.
Во 2018 година Комитетот за човекови права на ОН ја критикува забраната на превезот на Франција и тврдеше дека со тоа се кршат правата на две жени што биле казнети за носење превез во јавност.
„Францускиот закон непропорционално му штети на правото на подносителот да ги манифестира своите религиозни убедувања“, рече комитетот.
Според обелоденетиот извештај на француската агенција за внатрешна безбедност, Генералниот директорат за внатрешна безбедност (ДГСИ), најмалку 150 населби во Франција сега се под контрола на исламистички радикали, вклучувајќи ги и париските предградија Сен-Сан Дени и предградија на други поголеми градови.
Францускиот претседател, Емануел Макрон, во минатото јасно стави до знаење дека ги признава проблемите на гетоизацијата и направи потези за затворање на радикалните џамии и здруженија за да се запре ширењето на радикалниот ислам во Франција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп до Канада: Нема договор ако ја признаете Палестина

Американскиот претседател Доналд Трамп објави дека поддршката и признавањето на палестинската држава од страна на Канада ќе го отежни склучувањето трговски договор меѓу двете земји, објави „Si-TV News“.
„Бај! Канада штотуку објави дека ја поддржува палестинската државност. Тоа ќе ни го отежни многу склучувањето трговски договор со нив. О, Канада!!!“, напиша Трамп на мрежата „Truth Social“.
Објавата дојде еден ден пред рокот на Трамп на 1 август за трговски договор, а американскиот претседател претходно изјави дека ќе воведе царини од 35 проценти на канадските стоки ако двете страни не постигнат договор.
Канадскиот премиер Марк Карни вчера изјави дека можеби нема да ги заврши преговорите со САД до 1 август, бидејќи претседателот објави нови трговски мерки што би можеле да им го отежнат бизнисот на некои канадски компании.
Канада има намера да ја признае државата Палестина во септември на седницата на Генералното собрание на ОН, изјави канадскиот премиер.
Тој, како што објави Ројтерс, рече дека оваа одлука се темели на фактот дека Палестинската самоуправа ќе спроведе реформи, вклучително и фундаментална реформа на институциите, и ќе одржи општи избори во 2026 година на кои Хамас нема да учествува.
Фото: принтскрин
Регион
Хрватска е подготвена да прифати деца од Газа

Хрватска ги отвора вратите за децата од Појасот Газа, објави Министерството за надворешни и европски работи, со акцент на „психосоцијална помош и едукација за опасноста од експлозивни направи“, објавија хрватските медиуми.
„Република Хрватска ќе ги отвори вратите за децата од Газа на ист начин како што ги отвори за децата од Украина, фокусирајќи се на психосоцијална помош и едукација за опасноста од експлозивни направи“, објави денес Министерството.
Во соопштението се нагласува дека Хрватска има искуство во ова од Татковинската војна и дека има меѓународно признато знаење за дејствување против мини.
Министерството пишува дека државата е подготвена да прифати деца доколку се појават можности, за што верува дека ќе се појават, и нагласува дека континуирано спроведува проекти поврзани со украинските деца, од кои околу 700 се згрижени во Хрватска, преку јавен повик.
Планот го објави државниот секретар на Министерството за надворешни работи за политички прашања, Франо Матушиќ, на меѓународната конференција за мирно решение на палестинското прашање и спроведување на решение за две држави во седиштето на ОН.
Свет
Русија го нападна Киев – најмалку шест загинати, меѓу нив и шестгодишно дете

Најмалку шест лица беа убиени, а десетици ранети во руските ракетни и напади со беспилотни летала врз Киев во зори утрово, неколку часа пред клучното гласање во украинскиот парламент – Врховната рада, за укинување на контроверзниот закон против корупција.
„Ноќеска, непријателот го нападна главниот град со ракети и беспилотни летала. Една ракета погоди станбена зграда, од која еден дел беше уништен“, објави министерот за внатрешни работи Игор Клименко на Телеграм, осудувајќи го „најновото воено злосторство“.
Во тој напад беа погодени 27 локации во градот, најмалку шест лица ги загубија животите, а 52 беа ранети, објави шефот на воената администрација на Киев, Тимур Ткаченко.
„Службите за итни случаи досега потврдија шест смртни случаи. Меѓу загинатите има дете, шестгодишно момче“, објави Ткаченко на Телеграм.
Градоначалникот на Киев, Виталиј Кличко, објави дека прозорците на педијатриското одделение во болницата биле скршени поради силата на експлозиите, но дека никој не е повреден.
Руските сили ги засилија нападите врз Украина во последните денови, откако американскиот претседател Доналд Трамп му даде рок од 10 дена на својот руски колега Владимир Путин во вторникот да ги прекине нападите под закана од нови санкции.
По последниот бран напади врз украинската престолнина, се очекува членовите на парламентот да гласаат за поништување на законот со кој се укинува независноста на антикорупциските тела и кој наиде на силни критики и отпор од јавноста и Европската Унија. Пратениците ќе го искажат своето мислење за новиот закон, кој им враќа целосна автономија на антикорупциските тела.
Законот донесен на 22 јули, кој подоцна го потпиша претседателот Володимир Зеленски, предвидува ставање на Националната агенција за борба против корупцијата (НАБУ) и Специјализираното обвинителство за борба против корупцијата (САПО) под надлежност на Генералниот обвинител, кој го назначува самиот шеф на државата.
Соочен со жестоки критики од граѓанското општество и Европската унија, претседателот Зеленски на крајот предложи нов нацрт-закон за враќање на независноста на двете агенции, за кој Врховната рада ќе гласа денес.
Министерот за надворешни работи Андриј Сибиха доцна во среда објави дека се работи на измена на законот.
„Украина има силно граѓанско општество и активна младина. Тие го искажаа своето мислење, украинските власти ги слушнаа нивните гласови и гласовите на нашите партнери“, рече тој.
Тој оцени дека „прилагодувањата“ се неопходни за да се заштитат антикорупциските тела од политички игри, особено од „руските“.