Свет
Хаос во Индија: најмалку 16 лица загинаа во лизгање земјиште, многу затрупани, 75 лица евакуирани

Најмалку 16 лица загинаа, а се стравува дека многу останале затрупани при лизгање на земјиштето во планинско село во западната индиска држава Махараштра по обилните монсунски дождови, соопштија денеска државните власти.
Десетици спасувачи и обучени планинари беа распоредени за да најдат преживеани под урнатините, но тешките временски услови ги отежнаа спасувачките напори.
Властите испратија медицински екипи да им помогнат на повредените, пренесува АП.
Свлечиштето се активирало среде ноќ во селото Иршалвади, на 60-ина километри од Мумбај, објавија медиумите повикувајќи се на официјални претставници.
Надлежните изјавија дека во селото има вкупно 48 семејства, а околу 75 лица се евакуирани.
Поради обилните монсунски дождови, училиштата се затворени, патиштата се поплавени, а железничкиот сообраќај е во прекин низ Махараштра, најбогатата држава во Индија.
Училиштата и факултетите во Мумбаи денеска се затворени.
Во неколку области во Махараштра во средата паднаа повеќе од 100 милиметри дожд на квадратен метар, а во следните 24 часа се очекуваат обилни врнежи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Мелони: Пријавена сум во Меѓународниот кривичен суд за соучество во геноцид

Италијанската премиерка Џорџа Мелони вчера изјави дека таа и двајца министри се пријавени во Меѓународниот кривичен суд за наводно соучество во геноцид поврзан со израелската офанзива во Газа.
Во интервју за италијанската телевизиска станица РАИ, Мелони рече дека министерот за одбрана Гвидо Кросето и министерот за надворешни работи Антонио Тајани се пријавени во Меѓународниот кривичен суд и рече дека „мисли“ дека тоа се однесува и на Роберто Чинголани, шефот на одбранбената групација Леонардо.
„Верувам дека нема друг случај во светот или во историјата со вакви обвинувања“, рече Мелони.
Таа не прецизираше кој го поднел случајот против неа и министрите.
Меѓународниот кривичен суд истражува, гони и суди лица обвинети за геноцид, воени злосторства и злосторства против човештвото.
Италија беше место на серија демонстрации во изминатата недела, при што стотици илјади луѓе излегоа на улиците во знак на протест против масовните убиства во Газа, а многу демонстранти беа насочени кон Мелони.
Нејзината десничарска влада, во голема мера цврст поддржувач на Израел, неодамна се дистанцира од она што го нарекува „несразмерна“ офанзива во Газа, но не прекина никакви трговски или дипломатски врски, ниту ја призна државата Палестина.
Мелони рече дека е „зачудена“ од обвинувањето за соучество во геноцид бидејќи „секој што ја познава ситуацијата знае дека Италија, на пример, не одобрила нови испораки на оружје во Израел по 7 октомври“.
фото: принтскрин
Свет
Нетанјаху: Ќе продолжиме да ги постигнуваме сите воени цели, Газа повеќе нема да биде закана

Израелскиот премиер Бенјамин Нетанјаху вчера вечер им вети на Израелците дека ќе ги постигне сите цели на војната против Хамас во Газа, почнувајќи со враќањето на „сите заложници“.
„Граѓани на Израел, ние сме во одлучувачки денови. Ќе продолжиме да ги постигнуваме сите цели на војната: враќањето на сите заложници, уништувањето на моќта на Хамас и ветувањето дека Газа повеќе нема да биде закана за Израел“, напиша Нетанјаху во соопштение објавено откако земјата ја одбележа втората годишнина од крвавиот напад на Хамас што го предизвика конфликтот.
Втора годишнина од нападот на Хамас се совпаѓа со разговорите во Шарм ел-Шеик меѓу делегациите на Хамас и Израел, насочени кон завршување на војната во Газа.
Вториот ден во вторник заврши без никаков видлив напредок, според египетски извори, додека американскиот претседател Доналд Трамп изјави во Вашингтон дека постои „реална перспектива“ за мировен договор.
Разговорите се водат во присуство на Катар и со египетско посредништво.
Иако Израел и Хамас ги поддржаа широките принципи на планот од 20 точки на американскиот претседател за прекин на борбите, ослободување на заложниците и доставување помош во Газа, сè уште постојат спорови меѓу двете страни.
фото: принтскрин
Европа
Путин: Се докажа дека бевме во право во февруари 2022 година

Желбата на луѓето од Донбас и Новорусија да ја поврзат својата иднина со Русија докажа дека одлуките донесени во февруари 2022 година биле правилни, изјави рускиот претседател Владимир Путин. Тој го изјави ова отворајќи го состанокот со командантите на групите на сили во Санкт Петербург, пишува ТАСС.
Путин истакна дека фактот што „жителите на тие региони со огромно мнозинство гласаа за својата иднина како дел од Русија ја потврдува исправноста и актуелноста на одлуките донесени на почетокот на војната“.
Рускиот претседател, исто така, потсети дека 30 септември го означува „Денот на повторното обединување“ на самопрогласената Донецка Народна Република и Луганска Народна Република и (делови од) Запорошката и Херсонската област со Руската Федерација.
фото: принтскрин