Иранскиот претседател Хасан Рохани во говорот што го емитува државната иранска телевизија изјави дека Исламската Република нема да води војна против која било нација, пренесува „Спутник“.

Рохани рече дека страните што му се противат на Иран се група неискусни политичари.

Во четвртокот два танкера за нафта наводно беа нападнати во Оманскиот Залив, во близина на Ормуската Теснина. САД побрзаа да го обвинат Иран за наводно саботирање на танкерите.

По инцидентот, американскиот претседател, Доналд Трамп, нареди распоредување на „УСС Мејсон“, разорувач од класата „Арлеј Бурк“, во областа, ефикасно проширувајќи го американското воено присуство во регионот.

САД и Иран доживеаја драматична криза во односите кога Трамп ги повлече САД од заедничкиот сеопфатен план за дејствување во 2015 година во потег што го осудија другите потписнички на договорот. Вашингтон потоа продолжи да наметнува санкции против Иран.

Една година по повлекувањето на САД, Иран објави дека делумно ќе ги прекине своите обврски од договорот.

Неодамна Организацијата за атомска енергија на Иран објави дека земјата ќе ги надмине ограничувањата за резервите на ураниум наведени во нуклеарниот договор и дека исто така може да ги надмине нивоата на резервите од тешка вода и ограничувањата во збогатувањето на ураниумот наведени во договорот.