Свет
Херои на четири нозе: како кучињата помагаат во спасувачките операции по земјотреси

Кучињата се обучени да го душкаат човековиот мирис, да стојат мирно и гласно да лаат за да ги предупредат своите водичи дека пронашле живот, пишува „Ал џезира“
Неколку часа по двата силни земјотреса и стотиците последователни потреси што ги погодија југоисточна Турција и северозападна Сирија на 6 февруари, во Турција почнаа да пристигнуваат многу потребните спасувачи – К9-тимовите од целиот свет.
К9 е куче специјално обучено да им помага на безбедносните сили и на тимовите за итни случаи во спасувачките операции, борбата против дрогата или друго. Овие кучиња, меѓу другото, потекнуваат од Ел Салвадор, Германија, Мексико, Катар, Јужна Кореја, Швајцарија, Украина и од САД.
Спасувачите на четири нозе, кои може да најдат жртви само по мирис, се потребни за да им помогнат на турските тимови во очајничките операции, каде што се урнаа згради високи до 14 ката, што го отежнува пронаоѓањето преживеани по вид или звук.
„Редог“, волонтерски тим К9 од Швајцарија, е на терен во турскиот град Искендерун, кој работи со локалниот тим ГЕА.
Од пристигнувањето на 6 февруари, тим од 10 луѓе и шест обучени кучиња заедно со ГЕА досега пронашле 39 живи луѓе под урнатините.
Второто куче ги потврдува наодите од првото
Кучињата се обучени да го душкаат мирисот на една личност, да стојат мирно и гласно да лаат за да ги предупредат своите водичи каде го нашле. Второто куче потоа се ослободува за да се види дали може да ги потврди наодите од првото.
Ако двете кучиња потврдат, тоа им овозможува на луѓето спасувачи да ги фокусираат своите напори за копање на тоа конкретно место додека не го пронајдат лицето.
„Мислам дека тоа е еден од најемотивните моменти во мојот живот… моментот кога едно од нашите кучиња ни сигнализира дека пронашло луѓе во урнатините“, изјави за „Ал џезира“, Матијас Гербер, заменик-шефот за пребарување урнатини во „Редог“.
Кучињата работат по цел ден во тимови од тројца околу урнатините, наизменично во смени од 20 минути, по што следуваат паузи од 40 минути.
Во еден случај, откога нивните кучиња сигнализирале локација на која се закопани луѓето, спасувачките тимови почнале да копаат на местото и набргу слушнале тропање зад урнатините на жртвите заробени внатре потврдувајќи го она што кучињата веќе го откриле.
„По осум часа напорна работа, тие спасиле четири лица“, изјави за „Ал џезира“, Џијан Форстер, водач на тимот „Редог“, кој работи со три кучиња.
Играчка или храна како награда
Секојпат кога кучето ќе најде личност, тоа е пофалено и наградено со играчка или храна.
„Тој сака да наоѓа луѓе бидејќи секојпат добива награда“, рече Форстер.
„Главната работа е што кучето се забавува и сака да бара луѓе“.
Ако преживеаниот не е затрупан премногу длабоко, кучињата може многу бргу да го помирисаат. Но, некои згради во Искендерун имаат шест ката, кои се урнати, со 2-3 метри бетон помеѓу секое ниво, што е предизвик.
„Доколку е потребно време за да се појави мирисот, мора да одиме на локацијата и да отстраниме дел од урнатините и да се обидеме повторно. Тоа е прилично тежок процес ако лицето е закопано длабоко“, рече Гербер.
Опишувајќи го неодамнешното спасување, Форстер рече: „Дојдовме до урнатините и почнавме да гледаме на врвот на покривот на зградата и таму не најдовме мирис. И тогаш Џан помисли дека ветерот доаѓа од запад, па ја пребаравме источната страна на урнатините и таму кучињата открија мирис на личност“.
Кучињата што работат со „Редог“ на теренот во Турција – меѓу нив лабрадори, германски и белгиски овчари, златни ретривери – имаат до седум години искуство во работа во спасувачки мисии и помогнале да се најдат преживеани по катастрофите во Јапонија, Непал и во Албанија.
Сепак, вели Гербер, во последните 30 години од неговата работа со кучињата спасувачи сегашната мисија во Турција носи најголем предизвик и е најтрагичната што тој ја доживеал, со оглед на обемот на уништувањето.
Куче – подобро од која било технологија
„За нашите кучиња е многу тешко да најдат луѓе ако има толку многу урнатини. Тоа е голема пречка за нас. Добро е ако можеме да се вратиме на истото место на урнатините откога ќе се отстранат некои катови и повторно да бараме бидејќи тогаш ќе имаме шанса да најдеме живи луѓе, дури и ако се закопани многу длабоко“, рече Гербер.
„Ужасно е тоа што се случи овде. Сите овие урнати згради, сите оние луѓе што ги загубија своите роднини, своите домови. Тоа е страшно“, изјави Гербер.
„Среќни сме што помагаме овде со нашите кучиња, да ги извлечеме луѓето живи. Тоа е навистина важно. Навистина ме трога што можеме да помогнеме овде“.
Невладината организација „Нешнал дизестер дог фаундејшн“, со седиште во Калифорнија, обучи седум од 12-те кучиња спасувачи распоредени од САД, кои моментно бараат преживеани во Турција.
Дениз Сандерс, директорката за комуникации и операции на тимот за пребарување, изјави за „Ал џезира“ дека кучињата се „многу подобри во откривањето мириси од која било технологија што ја имаме“.
„Тие собираат миризливи честички во воздухот и потоа го следат својот нос буквално до најсилниот извор на мирис, кој е местото на потенцијалната жртва“, вели Сандерс.
Зборувајќи од минатите искуства во работата по земјотреси, како, на пример, на Хаити, таа вели дека кучињата покажале оти може да мирисаат „многу разни мириси, кои се многу распрснати во воздухот“, и тоа длабоко и до 6-9 метри под површината.
„Особено на Хаити имавме згради високи шест-седум ката, кои се урнаа… Знаеме дека кучињата можеа да ги лоцираат преживеаните и да нè предупредат“, рече Сандерс.
За кучето да биде тренирано и вешто да најде преживеани, природно треба да има нагон, решителност и безгранична енергија, рече Сандерс.
„Ова не е вашето домашно милениче, неколкупати да му фрлите играчка во дворот, а тој да се измори и да легне. Овие кучиња ќе одат додека не паднат или додека не им кажете дека е време да престанат. Таков вид издржливост и решителност е токму она што ни треба… Тие се на терен една-две недели и мора да покријат огромна површина, да проверат толку многу локации и да зачекорат низ толку многу ридови од урнатини.
Мексиканско куче прогласено за херој
Спасувачките K9 се посветени на својата работа и се соочуваат со истите опасности како и нивните колеги луѓе.
Протео, германски овчар што работел со мексиканскиот спасувачки тим во Кахраманмараш, го загубил животот кога врз него паднале остатоците од зградата што ја пребарал. Мексиканското Министерство за одбрана го прогласи за херој.
Gracias #Proteo por tu heroica labor, cumpliste la misión #perrito del #EjércitoMexicano #fuerzaturquia🇹🇷 #sismo #esperanza pic.twitter.com/bQdgxT3wnH
— @SEDENAmx (@SEDENAmx) February 12, 2023
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Официјалната истрага покажа дека подморницата „Титан“ имплодирала поради лоша конструкција

Американска истражна агенција утврди дека подморницата „Титан“ на компанијата „Оушенгејт“, која имплодираше за време на нуркањето кај олупината на бродот „Титаник“ во јуни 2023 година, беше уништена поради низа сериозни недостатоци во дизајнот и тестирањето, објави Би-би-си.
Во несреќата загинаа сите пет лица на бродот, вклучувајќи го и директорот на „Оушенгејт“, Стоктон Раш.
Според извештајот на Националниот одбор за безбедност на сообраќајот (НТСБ), процесот на инженерскиот развој на „Титан“ бил „несоодветен“, што довело до грешки што предизвикале подморницата да не ги исполни стандардите за цврстина и издржливост.
Националниот одбор за безбедност на сообраќајот тврди дека „Оушенгејт“ никогаш правилно не го тестирал „Титан“ и затоа не знаел колку е силна подморницата всушност. Покрај тоа, компанијата не била свесна дека бродот е оштетен и требало да биде повлечен од употреба пред фаталното нуркање.
„Титан“ исчезна во Северниот Атлантик додека се обидувал да стигне до остатоците од „Титаник“, кои се наоѓаат на околу 600 километри од канадскиот град Сент Џонс во покраината Њуфаундленд и Лабрадор.
Во август 2024 година, крајбрежната стража на САД издаде посебен извештај во кој ја опишува несреќата како „целосно спречлива“ и ја критикува „Оушенгејт“ за „сериозно погрешни безбедносни практики“.
Подморницата на своето последно патување ја управувал Стоктон Раш, а бил придружуван од познатиот истражувач на длабокоморските длабини Пол-Анри Наргеолет, британскиот милијардер Хамиш Хардинг и пакистанскиот бизнисмен Шахзада Давуд и неговиот 19-годишен син Сулејман Давуд.
Сите платиле до 250.000 долари за да учествуваат во експедицијата.
За време на истрагата, НТСБ откри сериозни проблеми во безбедносната култура на „Оушенгејт“. Додека некои вработени тврдеа дека безбедноста е приоритет, други, вклучувајќи го и поранешниот директор за поморски операции и еден техничар, опишаа работна средина „во која безбедноста, а особено прашањата за дизајнот, систематски се игнорираат“.
Еден техничар рече дека имал забелешки на деловниот модел на „Оушенгејт“, особено на практиката патниците да се нарекуваат „специјалисти за мисија“ за да се избегнат законски ограничувања. Според американските прописи, нелегално е да се превезуваат патници на експериментални подморници.
Техничарот рече дека го предупредил Раш, велејќи: „Не можете само да ја смените титулата на некого ако сте платени за тоа“. Во подоцнежен разговор за истото прашање, Раш наводно му рекол: „Ако крајбрежната стража стане проблем, ќе купам конгресмен и ќе го решам“.
фото: принтскрин
Европа
(Видео) Италијанец се преправал дека е слеп 50 години, ја измамил државата за повеќе од еден милион евра

76-годишен маж од областа Виченца во Италија се преправал дека е целосно слеп повеќе од 50 години за да добие надомест за инвалидитет, измамувајќи ја државата за повеќе од еден милион евра. Измамата е откриена кога финансиската полиција го снимила како извршува секојдневни задачи без никакви проблеми, како што се градинарство и пазарување на пазарот, објавува „Кориере дел Венето“.
На снимката објавена од финансиската полиција, човекот е снимен како внимателно избира овошје и зеленчук на пазарот. Дома е снимен како врши градинарски активности, вклучувајќи кастрење и полевање растенија. Сите овие задачи ги извршувал со целосна леснотија, иако официјално бил регистриран како 100% инвалид поради слепило.
Жителот на Монтекио Маџоре е обвинет за сериозна измама против државата.
Според обвинението, човекот незаконски примал бенефиции и надоместоци наменети за слепи лица повеќе од педесет години, со што се стекнал со незаконска бенефиција од повеќе од еден милион евра. Истрагата е покрената по вкрстена проверка на податоците на корисниците на социјално осигурување, а членовите на финансиската полиција од Арзињано поминале повеќе од два месеци следејќи го. Утврдено е дека тој почнал да прима пензија и надомест за придружба уште во 1972 година, по наводна несреќа на работа.
#GdiF #Vicenza Denunciato un falso invalido per truffa ai danni dello Stato, avendo percepito indebitamente, per più di 50 anni, indennità e sussidi per un importo superiore al milione di euro.#NoiconVoi pic.twitter.com/DvqBzrir2l
— Guardia di Finanza (@GDF) October 13, 2025
Старецот е снимен како извршува голем број секојдневни задачи без ничија помош, вклучително и користење опасни алатки како што се ножици за кастрење и тримери за жива ограда. Тој, исто така, редовно одел сам на градскиот пазар, избирајќи намирници и плаќајќи во готово од сопствениот паричник.
Врз основа на цврсти докази, поткрепени со сведочење на експерти, судската власт во Виченца поднесе обвинение против лажно слепиот човек. Финансиската полиција ги извести надлежните институции за сите бенефиции веднаш да бидат суспендирани. Даночната ревизија утврди нелегален приход од над 200 илјади евра во последните пет години, период за кој може да се направи проценка, и е предложено да се конфискува овој износ.
„Оваа операција сведочи за континуираната посветеност на Финансиската полиција во борбата против измамите во секторот за социјална помош и пензиско осигурување. Јавните средства наменети за поддршка на најранливите и навистина сиромашните социјални групи неправедно се одземаат“, соопшти Покраинската команда на Финансиската полиција во Виченца.
фото: принтскрин
Европа
Зеленски: Русија ја таргетираше енергетската инфраструктура со 300 дронови и 37 ракети

Украинскиот претседател Володимир Зеленски денеска објави дека Русија употребила 300 беспилотни летала и 37 ракети за напад врз украинската инфраструктура во текот на ноќта.
„Оваа есен, Русите го користат секој ден за да ја таргетираат нашата енергетска инфраструктура“, напиша тој на Икс.
Украинската приватна енергетска компанија ДТЕК претходно соопшти дека постројка за производство на гас во регионот Полтава е затворена по рускиот напад врз енергетската инфраструктура во текот на ноќта.
Извори од индустријата за Ројтерс изјавија дека руските напади предизвикале „значајна“ штета на гасниот сектор на Украина.
Главниот извршен директор на украинската државна компанија Нафтогас рече дека нападите го нарушиле работењето на неколку клучни постројки.
Тој нагласи дека тие имале директно влијание врз домашното производство на гас и дека Киев ќе мора да ги покрие загубите преку увоз.
фото: принтскрин