Свет
Црноморските делфини се жртви во војната во Украина
Руската поморска активност во Црното Море доведе до смрт на илјадници делфини од почетокот на конфликтот, а еден еколог прави сè што може за да алармира за последиците на војната врз дивиот свет во регионот.
Иван Русев, началник на украинскиот истражувачки оддел на националниот парк Tuzly Estuaries, на почетокот на мај на „Фејсбук“ објави за трагичната загуба на уште 100 црноморски делфини во претходниот месец.

„За жал, во текот на април 2023 година повеќе од сто мртви делфини се регистрирани во заливите на Севастопол и другите брегови на окупираниот Крим и блиските Новоросијск, Сочи, Геленџик“, напиша Русев според преводот на американскиот весник „УСА тудеј“ (USA Today).
„Ова е потврда на фактот за активноста на непријателски подморници и подморници во тој дел на Црното Море во близина на Крим и Новоросијск“, напиша Русев.
Ова не е првпат Русев да алармира за тоа што се случува со популацијата на делфини во Црното Море. Во август 2022 година украинскиот биолог рече дека приближно 5.000 делфини умреле како последица на конфликтот.

„Никогаш не сум видел вакво нешто“, изјави Русев за „Киев индипендент“. „Ова е нешто апсолутно ново и застрашувачко за научниците“.
Русев ги обвини руските бродови и подморници стационирани во Црното Море за смртните случаи на делфините тврдејќи дека нивниот сонар влијае на здравјето на животните.
„Делфините паѓаат во зоната на зрачење на навигациските уреди на бродовите, што ги оневозможува нивните органи за навигација и ехолокација“, објаснува тој.

Сонарот е особено опасен за цицачите, како што се делфините, бидејќи тие се потпираат на подводниот звук за навигација, фаќање плен и комуникација со други делфини.
Воениот сонар како нискофреквентен активен сонар (LFA) генерира звучни бранови кои може да патуваат стотици милји под водата и може да доведат до повреди и смрт кај некои животни.
Русев тврди дека сонарот што го користат руските поморски сили ги оштетува акустичните системи на делфините во Црното Море, ги заслепува и ги спречува да јадат.
„Не може да се ориентираат во морето и да ловат риба“, вели Русев, „затоа секој ден губат телесна тежина и им ослабува имунолошкиот систем“.
Русев 40 години ги надгледува бреговите на Украина и никогаш не видел толку смрт и уништување како од почетокот на војната.
„Севкупно, проценуваме дека умреле најмалку 50.000 делфини, а најмногу 100.000“, рече Русев во видеоинтервју за Радио Слободна Европа.
Според украинското Министерство за заштита на животната средина и природните ресурси, во Црното Море живеат околу 253.000 делфини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп го ограничи бројот на бегалци во САД на 7.500 за наредната година
Американскиот претседател Доналд Трамп го постави годишниот лимит за прием на бегалци на 7.500 лица за фискалната 2026 година, што претставува најниско ниво досега.
Одлуката е дел од поширока промена на политиката кон бегалците, при што Трамп најави дека приоритет ќе имаат Јужноафриканци од белата етничка заедница Африканери, тврдејќи дека се соочуваат со расен прогон — тврдење што властите во Јужна Африка го негираа.
Трамп претходно го паузираше приемот на бегалци, наведувајќи дека ќе продолжи само ако тоа е „во најдобар интерес на САД“. До септември годинава, во земјата пристигнале само 138 Јужноафриканци.
Во документот објавен денес, Белата куќа најави дека ќе се разгледува прием и на други жртви на „незаконска или неправедна дискриминација“, а интерен владин извештај сугерира дека приоритет би можел да се даде и на Европејци кои биле мета поради ставови против масовна миграција или поддршка на популистички партии.
Покрај тоа, администрацијата најави дека надзорот над програмите за бегалци ќе се префрли од Стејт департментот на Министерството за здравство и социјални услуги.
Свет
Маж од Флорида осуден за убиство на трудна девојка која одбила да абортира
Судoт во Флорида го прогласи 23-годишниот Донован Фејсон за виновен за убиство на неговата 18-годишна девојка Кајлин Фиенго, која одбила да абортира, пренесе „Унилад“.
Злосторството се случило во ноември 2022 година, кога Фејсон ја намамил Кајлин во парк и ја застрелал во глава. Нејзиното тело било пронајдено во автомобил од полициски службеник за време на рутинска патрола, а покрај неа била најдена и слика од ултразвук.
Истрагата открила пораки во кои Фејсон ја притискал да абортира. Во една од нив ѝ напишал: „Абортирај!!!“, а пред убиството му испратил порака на пријател: „Се колнам во гробот на брат ми, ќе се решам од неа.“
Тужителите навеле дека Фејсон бил лут и под притисок бидејќи живеел со друга жена која дознала за аферата.
Поротата го прогласи за виновен на 27 октомври, а му се заканува смртна казна. Семејството на жртвата изјави дека пресудата „не ја враќа Кајлин, но барем ќе спречи да им наштети на други“.
Свет
Хамас предаде тела, Израел порачува: „Борбата за нашите заложници не запира“
Израел ги презеде телата на двајца заложници кои ги држел Хамас во Газа, пренесе ЦНН. Посмртните останки биле предадени преку Црвениот крст и пренесени на идентификација во израелскиот форензички институт.
Од кабинетот на израелскиот премиер соопштија дека „напорите за враќање на сите заложници продолжуваат и нема да престанат додека не се вратат сите“.
Примопредавањето се случува два дена по израелските воздушни напади во Газа, во кои, според палестинското министерство за здравство, загинале повеќе од 100 лица. И покрај ескалацијата, и Израел и Хамас изјавиле дека остануваат посветени на прекинот на огнот посредуван од САД.
Американскиот претседател Доналд Трамп порача дека „ништо нема да го загрози примирјето“ и се закани дека ќе го „елиминира Хамас“.
Последното примопредавање, според медиумите, поминало без компликации, за разлика од претходните случаи кога Хамас ја повлекуваше одлуката за предавање поради израелски напади.

