Свет
Цукерберг призна: „Фејсбук“ направи грешка

Основачот на „Фејсбук“, Марк Цукерберг, призна дека направиле грешка во случајот со компанијата „Кембриџ аналитика“ (CA).
Станува збор за скандалот поврзан со претседателските избори во САД во 2016 година поради кој акциите на „Фејсбук“ забележаа вртоглав пад. Имено, беше откриено дека „Кембриџ аналитика“ (CA), компанија специјализирана за стратешки комуникации, собрала податоци од милиони корисници на „Фејсбук“ без нивна согласност со цел да ги искористи за изработка на софтвер што би овозможил предвивување и влијание врз гласањето на бирачите.
Податоците биле собрани преку апликација за психолошко тестирање која ја презеле 300.000 корисници на социјалната мрежа. Истата била креирана од страна на рускиот психолог Александар Коган, кој потоа неоправдано ги отстапил податоците на компанијата CA.
Цукерберг во својата објава на „Фејсбук“ напиша дека дошло до прекршување на довербата меѓу „Фејсбук“ и луѓето кои ги споделиле своите податоци со социјалната мрежа.
„Јас го креирав ‘Фејсбук’ и на крајот од денот јас сум одговорен за она што се случува на нашата платформа“, напиша тој.
Цукерберг, исто така, најави конкретни мерки. За почеток, тој вети дека ќе ги испита сите апликации кои имале пристап до голема количинаа информации до моментот кога во 2014 година платформата го ограничила пристапот до информации за корисниците.
„Ние имаме одговорност да ги заштитиме вашите информации, а ако не можеме, не заслужуваме да обезбедуваме услуги. Јас работам за да утврдам што точно се случило за да може да преземеме мерки со цел истото да не се повтори. Добрата вест е дека најважните чекори за спречување вакви ситуации веќе се преземени пред неколку години. Сепак, направени се грешки и затоа и во иднина треба напорно да се работи“, напиша во своето обраќање Цукерберг.
Инаку, во 2013 година истражувачот од Универзитетот во Кембриџ, Александар Коган, направил апликација за тестирање на особините на личноста. Ваквата апликација достапна преку „Фејсбук“ ја презеле околу 300.000 луѓе кои ги споделиле своите податоци, но и некои информации за нивните пријатели. Поради начинот на кој тогаш функционирал „Фејсбук“ како платформа, Коган имал пристап до десетици милиони податоци во врска со фејсбук-пријателите на оние корисници кои преземале тестот. Во 2015 година новинарите на „Гардијан“ информирале дека Коган ги споделил собраните податоци од апликацијата со компанијата „Кембриџ аналитика (CA)“, која ги искористила за изработка на софтвер што би овозможил предвивување и влијание врз гласањето на бирачите.
„Против нашите правила е програмерите да користат податоци без согласност на луѓето, така што веднаш откако бевме информирани ја забранивме апликацијата на Коган и побаравме тој и ‘Кембриџ аналитика’ официјално да потврдат дека ги избришале сите податоци што ги презеле неовластено, при што ги добивме сертификатите кои ги побаравме“, информираше Цукенберг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
САД и Кина постигнаа договор

САД И Кина се согласија за значително намалување на царините за стоките меѓусебно за период од 90 дена, по разговорите што се одржаа викендов.
Зборувајќи во Женева, американскиот министер за финансии, Скот Бесент, изјави дека двете страни ќе ги намалат своите царини за 115%, откако се согласија за 90-дневна пауза.
Тоа е значителна деескалација на трговската војна што ескалираше минатиот месец. Пред денешниот договор, САД ги зголемија царините за кинеските стоки на 145% (вклучувајќи дополнителни 20% наметнати за ограничување на увозот на фентанил во САД), додека Пекинг возврати со царини од 125% за американскиот увоз.
Бесент им рече на новинарите дека двете страни покажале големо почитување за време на разговорите и дека двете страни сакаат избалансирана трговија.
Европа
Курдските паравоени групи се распуштаат: „Го завршуваме вооружениот бунт во Турција“

Милитантната група Курдистанска работничка партија (ПКК), која е во конфликт со турската држава повеќе од четири децении, одлучи да се распушти и да ја прекине вооружената борба, објави новинска агенција блиска до групата.
Одлуката на ПКК ќе има далекусежни политички и безбедносни последици за регионот, вклучително и за соседна Сирија, каде што курдските сили се сојузници на американските сили.
Новинската агенција „Фират“ објави, како што ја нарече, конечна декларација од конгресот што ПКК го одржа минатата недела во северен Ирак, како одговор на повикот во февруари од затворениот курдски лидер Абдула Оџалан за нејзино распуштање.
Канцеларијата на турскиот претседател Таип Ердоган и Министерството за надворешни работи сè уште не го коментираа соопштението. Повеќе од 40.000 луѓе се убиени во конфликтот откако ПКК започна бунт во 1984 година. Турција и нејзините западни сојузници ја означија ПКК за терористичка група.
Свет
Десетици кутии со нацистички материјал пронајдени во подрумот на Врховниот суд во Аргентина

Десетици кутии со нацистички материјал запленети од аргентинските власти за време на Втората светска војна неодамна беа повторно откриени во подрумот на Врховниот суд, објави судот денес.
Тие 83 кутии биле испратени во Аргентина од германската амбасада во Токио во јуни 1941 година со јапонскиот пароброд „Нан-а-Мару“, според информациите кои судот можел да ги поврзе, се наведува во соопштението за медиумите.
Во тоа време, големата пратка го привлече вниманието на властите, кои стравуваа дека нејзината содржина може да влијае на неутралноста на Аргентина во војната.
И покрај тврдењата во тоа време од страна на германските дипломатски претставници дека кутиите содржат лични предмети, аргентинските царински власти случајно претресоа пет кутии.
Тие пронајдоа разгледници, фотографии и пропаганден материјал од нацистичкиот режим, како и илјадници тетратки што ѝ припаѓале на нацистичката партија. Федерален судија ги заплени материјалите и го упати случајот до Врховниот суд.
Сè уште не е јасно зошто случаите биле испратени во Аргентина или какви мерки презел Врховниот суд во тоа време.
Осумдесет и четири години подоцна, судските службеници наишле на кутиите додека подготвувале материјали за музејот на Врховниот суд.
„Со отворањето на една од кутиите, идентификувавме материјал наменет за консолидирање и ширење на идеологијата на Адолф Хитлер во Аргентина за време на Втората светска војна“, соопшти судот.
Судот сега ги премести кутиите во просторија опремена со дополнителни безбедносни мерки и го покани Музејот на холокаустот во Буенос Аирес да учествува во нивното зачувување и каталогизирање.
Експертите ќе ги испитаат и за можни индиции за сè уште непознати аспекти на Холокаустот, како што се меѓународните мрежи за финансирање што ги користеле нацистите.
Аргентина остана неутрална во Втората светска војна до 1944 година, кога конечно ги прекина дипломатските односи со силите на Оската и објави војна на Германија и Јапонија.
Според Музејот на холокаустот, од 1933 до 1954 година, 40.000 Евреи дошле во Аргентина бегајќи од нацистичкиот прогон во Европа. Аргентина е дом на најголемото еврејско население во Латинска Америка.