Свет
Чавушоглу во ОН: Средоземното Море се претвора во гробишта на очајни луѓе

Медитеранот се претвора во гробишта на очајни луѓе, изјави турскиот министер за надворешни работи, Мевлут Чавушоглу, пред Генералното собрание на ОН, каде главна тема е миграцијата.
„Дозволете да го свртам вниманието кон ужасната реалност. Медитеранот, лулката на вековните цивилизации, се претвора во гробишта на очајни луѓе“, рече Чавушоглу, пренесе агенцијата „Анадолија“.
Министерот посочи дека во светот има околу 260 милиони мигранти, повеќе од 68 милиони лица ги загубиле своите домови, а бројот на бегалци изнесува 25 милиони.
„Овие бројки постојано растат поради глад, тероризам и политичка нестабилност. Имајќи го ова предвид, ниту една влада не смее да го игнорира овој проблем“, рече Чавушоглу.
„Мртвите деца кои лежат на бреговите се срам за целиот свет и за човештвото“, додаде првиот дипломат на Анкара.
Тој истакна дека, за жал, најголемиот товар на хуманитарните последици од сириската криза бил оставен на грбот на Турција.
„Обврските не се исполнети. Нашите повици за споделување на товарот и одговорноста не беа слушнати. Без оглед на тоа, продолживме да го следиме хуманитарниот пристап“, додаде турскиот министер.
Чавушоглу посочи и дека трилатералната средба на врвот на Турција, Русија и Иран спречила уште поголема хуманитарна трагедија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Париз, Лондон и Берлин повикаа да престане хуманитарната катастрофа во Газа

Хуманитарната катастрофа во Појасот Газа мора веднаш да престане, повикаа вчера во заедничко соопштение Париз, Лондон и Берлин.
„Хуманитарната катастрофа на која сме сведоци во Газа мора веднаш да престане“, нагласија трите европски земји.
Тие на овој начин одговорија на алармот објавен од ОН и невладините организации дека постои ризик од непосреден и широко распространет глад во Газа. Трите европски престолнини ја повикуваат европската влада веднаш да ги укине ограничувањата за испорака на помош.
Франција, Велика Британија и Германија, исто така, потсетуваат дека Израел мора да ги почитува своите обврски според меѓународното хуманитарно право.
„Дојде моментот да се стави крај на војната во Газа“, додадоа тие и ги повикаа сите страни да го прекинат конфликтот со склучување на договор за моментално прекин на огнот.
Регион
Топлотниот бран ги затвори Акропол и археолошките локалитети во Атина

Поради топлотниот бран и високите температури што од почетокот на седмицава ја зафатија Грција, археолошките локалитети во Атина, како и Акропол и во текот на викендов ќе бидат затворени за туристи во периодот од 12 до 17 часот.
Новиот топлотен бран што ја зафати Грција, според најавите и прогнозите се очекува да трае до недела.
Вчера беше најтоплиот ден, просечната максимална температура достигна 37,6 степени Целзиусов, на Пелопонез измерени речиси 46 степени, а во многу делови од земјата надмина 42 степени.
Свет
Русија до Западот: Тврдоглаво игнорирате додека режимот во Киев се обидува да ја спаси кожата на Зеленски

„Тврдоглаво се обидувате да игнорирате како темелно корумпираниот режим во Киев се обидува да ја спаси кожата на украинскиот претседател Володимир Зеленски, доведувајќи ја во прашање иднината на својата земја. За тоа детално ќе разговараме на посебниот состанок што го побаравме за 31 јули, каде што предлагаме фокусирање на акциите што ја поткопуваат потрагата по дипломатски пат за решавање на украинскиот конфликт – вклучително и обидите да се попречи директниот руски-украински преговарачки процес во Истанбул“, изјави заменикот на рускиот амбасадор во ОН, Дмитриј Пољански, на седницата на Советот за безбедност, обраќајќи им се на претставниците на западните земји, пренесува ТАСС.
Според него, Русија подолго време и доследно предлага решавање на украинската криза по дипломатски пат.
„Но вас тоа не ве задоволува – сè додека сте подготвени да продолжите да се борите против Русија преку рацете на Украинците. А фактот што ги има сè помалку – воопшто не ве вознемирува“, предупреди рускиот дипломат.
Русија и Украина во мај и јуни одржаа две рунди преговори, по што следуваше размена на заробеници и предавање на телата на загинатите украински војници. Двете страни исто така разменија нацрти меморандуми за решавање на конфликтот.