Четворица студенти од Хонг Конг, меѓу кои и двајца малолетници, беа осудени во денеска поради нивните улоги во антивладиниот заговор за поставување бомби на јавни места.

Во случај што се води според Законот за национална безбедност што Кина му го наметна на градот во 2020 година за да го задуши незадоволството, судот го осуди најстариот од четворицата на повеќе од пет години затвор, а другите тројца ги испрати во центри за рехабилитација за малолетници.

Понатамошни судски постапки се водат за уште четири лица на возраст од 19 до 26 години.

Четворицата осудени, сега на возраст од 17 до 21 година, биле членови на малку познатата група наречена „Враќање храбри“, која промовираше независност од Кина и повикуваше на отпор по наметнувањето на Законот за безбедност.

Групата во 2021 година наводно планирала да направи бомби користејќи го експлозивот ТАТП и да ги постави на јавни површини, вклучително и во судски згради. Пред да успеат да ги набават материјалите, полицијата за национална безбедност на Хонг Конг ги уапсила во јули истата година.

Припадниците на групата се изјасниле виновни за заговор за предизвикување експлозија наместо примарното обвинение за заговор за извршување терористички активности.

Според уредбата за злосторства во Хонг Конг, првото обвинение носи казна затвор до 20 години, но второто може да доведе и до доживотна казна затвор.

Обвинетиот Александар Ау, кој сега има 21 година, е осуден на пет години и осум месеци затвор, а тројцата други активисти на возраст од 17 и 18 години, биле „само пиони во заговорот“ и не успеале да набават состојки за ТАТП, посочи судијата Алекс Ли, кој го водел случајот.

Тие ќе бидат испратени во центри за обука – установи за малолетници фокусирани на рехабилитација во кои можат да се сместат млади од 14 до 20 години- во период до три години. Колку долго ќе останат таму ќе зависи од проценките што ќе ги спроведат одговорните во центрите.

Ова е втор случај покренат користејќи го Законот за национална безбедност на Хонг Конг во кој се осудени и малолетници.

Првиот случај за национална безбедност во кој беа вклучени малолетници беше завршен во октомври, при што четворица тинејџери – исто така членови на „Враќање храбри“ – беа притворени во Центар за обука за малолетници откако се  изјаснија виновни за заговор за поттикнување субверзија поради јавните говори за револуции.