Свет
Шведска ја затвора истрагата за експлозиите на Северен тек 1 и 2, Германија ја продолжува

Шведското јавно обвинителство денеска соопшти дека ќе се откаже од дополнителните истраги за експлозиите на гасоводите Северен тек 1 и 2.
„Заклучокот од истрагата е дека Шведска нема јурисдикција и затоа истрагата треба да се затвори“, се вели во соопштението на шведското обвинителство, пренесува Ројтерс.
Неколку германски медиуми, меѓу кои и весниците Цајт и Зидојче Цајтинг, вчера објавија дека шведското Јавно обвинителство најверојатно ќе ја затвори истрагата за саботажата на гасоводите Северен тек 1 и 2 во Балтичкото Море.
Шведскиот јавен обвинител Матс Љунгквист очигледно сака да ја прекине постапката, а евидентно е дека шведските власти не успеале да идентификуваат ниту еден конкретен осомничен во нивната земја, објави германскиот економски портал „Виршафтсвохе“.
Истрагата на Германија за експлозиите на гасоводите Северен тек 1 и 2 ќе продолжи и покрај шведското повлекување, објави Ројтерс.
Во септември 2022 година беа регистрирани неколку експлозии во близина на островот Борнхолм во Балтичкото Море, а малку подоцна беше откриена штета на гасоводите „Северен тек“ кои пренесуваат руски гас до Германија.
Потоа беа започнати истраги во Шведска, Германија и Данска.
Во ноември 2022 година, Љунгквист го потврди сомнежот дека се работи за саботажа откако беа пронајдени остатоци од експлозив.
Во заедничко писмо до Советот за безбедност на ОН во летото 2023 година, амбасадите на Германија, Данска и Шведска напишаа дека истражителите откриле траги од експлозив на сомнителна едрилица.
Се наведува дека едрилицата била користена за транспорт на експлозиви користени во саботажа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Париз, Лондон и Берлин повикаа да престане хуманитарната катастрофа во Газа

Хуманитарната катастрофа во Појасот Газа мора веднаш да престане, повикаа вчера во заедничко соопштение Париз, Лондон и Берлин.
„Хуманитарната катастрофа на која сме сведоци во Газа мора веднаш да престане“, нагласија трите европски земји.
Тие на овој начин одговорија на алармот објавен од ОН и невладините организации дека постои ризик од непосреден и широко распространет глад во Газа. Трите европски престолнини ја повикуваат европската влада веднаш да ги укине ограничувањата за испорака на помош.
Франција, Велика Британија и Германија, исто така, потсетуваат дека Израел мора да ги почитува своите обврски според меѓународното хуманитарно право.
„Дојде моментот да се стави крај на војната во Газа“, додадоа тие и ги повикаа сите страни да го прекинат конфликтот со склучување на договор за моментално прекин на огнот.
Регион
Топлотниот бран ги затвори Акропол и археолошките локалитети во Атина

Поради топлотниот бран и високите температури што од почетокот на седмицава ја зафатија Грција, археолошките локалитети во Атина, како и Акропол и во текот на викендов ќе бидат затворени за туристи во периодот од 12 до 17 часот.
Новиот топлотен бран што ја зафати Грција, според најавите и прогнозите се очекува да трае до недела.
Вчера беше најтоплиот ден, просечната максимална температура достигна 37,6 степени Целзиусов, на Пелопонез измерени речиси 46 степени, а во многу делови од земјата надмина 42 степени.
Свет
Русија до Западот: Тврдоглаво игнорирате додека режимот во Киев се обидува да ја спаси кожата на Зеленски

„Тврдоглаво се обидувате да игнорирате како темелно корумпираниот режим во Киев се обидува да ја спаси кожата на украинскиот претседател Володимир Зеленски, доведувајќи ја во прашање иднината на својата земја. За тоа детално ќе разговараме на посебниот состанок што го побаравме за 31 јули, каде што предлагаме фокусирање на акциите што ја поткопуваат потрагата по дипломатски пат за решавање на украинскиот конфликт – вклучително и обидите да се попречи директниот руски-украински преговарачки процес во Истанбул“, изјави заменикот на рускиот амбасадор во ОН, Дмитриј Пољански, на седницата на Советот за безбедност, обраќајќи им се на претставниците на западните земји, пренесува ТАСС.
Според него, Русија подолго време и доследно предлага решавање на украинската криза по дипломатски пат.
„Но вас тоа не ве задоволува – сè додека сте подготвени да продолжите да се борите против Русија преку рацете на Украинците. А фактот што ги има сè помалку – воопшто не ве вознемирува“, предупреди рускиот дипломат.
Русија и Украина во мај и јуни одржаа две рунди преговори, по што следуваше размена на заробеници и предавање на телата на загинатите украински војници. Двете страни исто така разменија нацрти меморандуми за решавање на конфликтот.