Свет
Шведските истражувачи откриле можен лек против педофилијата
Студија заснована на 50 педофили и спроведена од Универзитетот „Каролинска“, една од водечките медицински установи во Шведска, идентификувала можен лек против педофилијата, објави националниот радиодифузер СВТ.
Во студијата половина од избраните педофили добиле „дегареликс“, лек што бргу го намалува нивото на тестостерон и веќе се користи за лекување рак на простатата. Другата половина добила плацебо со солена вода.
Според заклучоците на студијата, кај оние што го примиле лекот било откриено дека имаат помала веројатност да злоупотребуваат. Ова се рефлектира во анализираните фактори на ризик, како што се преокупираност со секс, девијантно однесување и самооценет ризик. Позитивниот ефект бил забележан од самите учесници.
„Не би можел да живеам со себе ако некогаш повредам дете“, вели Нилс, еден од учесниците, за СВТ.
Иако самиот го оцени ризикот од злоупотреба како мал, тој рекол дека ќе размисли за употреба на лекот во иднина.
Факторите на ризик се поврзани со функциите на мозокот погодени од тестостеронот, објасни Кристофер Рам, истражувач од Институтот „Каролинска“ и водач на студијата. Според него, лекот ќе дејствува како хемиска сопирачка за итни случаи за луѓето што сметаат дека може да повредат дете.
Спротивно на лековите претходно користени за т.н. хемиска кастрација, кои овозможуваат тестисите да произведат повеќе тестостерон на почетокот на третманот, привремено зголемувајќи го ризикот од злоупотреба, новиот лек доведува до голем пад на нивото на тестостерон, со ефект што трае неколку месеци.
Јан Антфолк, професор по психологија на академијата „Турку“ во Финска и експерт за истражување на педофилијата, ја пофали студијата како одлично изведена, но тврди дека намалувањето на одредени измерени ризици не значи намалување на сексуалната злоупотреба на децата. Затоа, тврди тој, неопходни се долготрајни студии за следење и споредби со психолошки третман пред тестираниот лек да стане одобрен лек.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Поради планирање на терористички напад обвиненија добија трoјца тинејџери во Германија
Суд во германската провинција Северна Рајна-Вестфалија поднесе обвиненија против тројца тинејџери за планирање на терористички напад, пренесува ДПА.
Осомничените, на возраст од 15 и 16 години, беа уапсени во април за време на велигденските празници. Тие планирале напад во согласност со целите на терористичката група „Исламска држава“.
Обвинителството тврди дека тинејџерите ги разменувале плановите преку апликацијата „Телеграм“ и разговарале за напади во цркви и полициски станици.
Регион
Во Јабланица прогласена тридневна жалост: Загинаа 15 лица, се трага по уште исчезнати
Градоначалникот на општина Јабланица Дамир Шабановиќ деновите од недела до вторник ги прогласи за Денови на жалост во врска со трагичната смрт на сограѓанин во природна катастрофа што го зафати подрачјето на Јабланица, пренесува Ал Џезира Балканс.
Деновите на жалост се одбележуваат со спуштање на знамињата на половина копје на зградите на општината и јавните установи основани од општина Јабланица.
Културни, забавни и слични програми нема да се одржуваат на јавни места, а физичките и правните лица кои вршат угостителска дејност, како и локалните медиуми ќе го приспособат своето работење.
Досега на подрачјето на Јабланица и Коњица се пронајдени телата на 15 лица, а по 10 до 15 исчезнати лица се уште се трага.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.