Свет
Шестмина повредени во пукнање поради конфликт меѓу тинејџери – нов ужасен инцидент во Америка
Шест тинејџери се полесно повредени во пукање по прославата на американскиот празник „Јунинати“ во Милвоки, во американската сојузна држава Висконсин, соопшти полицијата.
Оттаму додаваат дека вчера имале акција во близина на паркот Роуз, откако четири девојчиња и две момчиња на возраст меѓу 14 и 19 години биле повредени во пукање, но животите не им се загрозени, објави Си-Ен-Ен.
Шефот на полицијата во Милвоки, Џефри Норман, изјави дека верува оти пукањето произлегло од расправија меѓу тинејџери. Се претпоставува дека меѓу застреланите е и 17-годишен тинејџер кој го предизвикал конфликтот.
„Милвоки, што се случува со нашите деца? Родители, старатели, возрасни, мораме да дадеме се од себе да го спречиме ова насилство што нашите деца го носат на овие улици. Ниту еден пиштол, ниту оружје не треба да биде во рацете на нашата младина“, рече Норман на прес-конференција.
Тој додаде дека тоа е приказна која „се случува премногу често“, алудирајќи на постојаните пукања низ американските улици.
Полицијата соопшти дека ја продолжува истрагата за инцидентот.
Градоначалникот Кавалиер Џонсон изјави дека во моментот на инцидентот имало илјадници луѓе во областа.
„Јунинати“ е федерален празник во САД, во знак на сеќавање на еманципацијата на поробените црнци. Ја одбележува годишнината од прогласувањето слобода за сите робови во Тексас на 19 јуни 1865 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски се обрати до нацијата: Се браниме кај Харков, во Доњецк е исклучително тешко
Украинските сили продолжуваат со одбранбените операции околу северните погранични населби во регионот Харков, изјави украинскиот претседател, Володимир Зеленски во вечерното обраќање до нацијата.
„Нашите сили извршуваат контранапади и ја штитат украинската територија веќе втор ден“, рече Зеленски.
Украинската војска претходно соопшти дека руските сили се задржани во пограничните села во „сивата зона“, додека Русија објави дека зазела пет локални населби.
Ситуацијата, рече Зеленски, е особено напната во регионот на Доњецк, поточно во правец на Покровское, кај селата Семенивка и Нетаилова.
Зеленски додаде дека попречувањето на руските офанзивни акции сега е задача број еден.
Свет
Макрон: Се надевам дека Французите нема да мора да се борат во Украина
Францускиот претседател Емануел Макрон уште еднаш не ја исклучи можноста за интервенција на француската армија во Украина, но истовремено изрази надеж дека неговата земја нема да мора да војува и да испраќа свои војници во војна.
Како што пренесува „Украинска правда“, Емануел Макрон рече дека во одреден момент Европејците треба да бидат подготвени да ја спречат Русија да напредува понатаму во Украина, но тој најискрено се надева дека нема да мора да се борат.
„Ако сакаме мир, мораме да го заштитиме. Затоа треба да се вооружиме и затоа треба да бидеме средство за одвраќање и убедување. Ако одите предалеку и ги загрозувате нашите интереси и нашата безбедност, тогаш јас не исклучувам интервенци во конфликтот“, рече Макрон.
Тој нагласи дека украинскиот суверенитет и територијалниот интегритет се под закана, но истовремено владеењето на правото и општите правила се под закана.
„И ако оставиме сè како што е во Украина, тогаш ќе победи правото на посилниот. И не можеме да бидеме сигурни бидејќи тоа се случува на 1.500 километри. Значи, во Украина нашата иднина и нашата безбедност се во прашање“, заклучи францускиот претседател.
Свет
Големи пропалестински протести во Малме пред евровизиското финале, се бара исклучување на Израел од натпреварот
Денеска во центарот на Малме, Шведска се одржува масовен пропалестински протест поради учеството на Израел на овогодинешното натпреварување.
Голем број луѓе почнаа да се собираат на главниот плоштад во Малме од 16 часот.
Протестот почна на главниот плоштад во Малме, а насобраните од ова место се упатија кон арената Малме, каде што се одржува Евровизија.
Во четвртокот, кога претставничката на Израел настапи во втората полуфинална вечер, на улиците на Малме протестираа повеќе од 30.000 луѓе, според проценките на шведската полиција.
Барањата се исти – бојкот на Евровизија и исклучување на Израел од натпреварувањето.