Свет
Шолц: Не ја исклучуваме можноста авионската несреќа во Литванија да е резултат на хибридна војна

Германските лидери ја потенцираа можноста дека вчерашната несреќа на товарниот авион на ДХЛ во Литванија се должи на саботажа или хибридна војна.
Товарниот авион летал од Лајпциг, Германија, за Литванија, а требало да слета на аеродромот во Вилнус кога паднал на неколку километри од пистата. Авионот се лизгал по земјата неколку стотици метри пред да удри во куќата, соопштија литванските власти.
На прашањето дали несреќата е резултат на хибридна војна, германскиот канцелар Олаф Шолц изјави за јавната телевизија ЗДФ дека размислуваат за тоа.
„Размислуваме за тоа, внимателно ја следиме ситуацијата, во моментот не можеме да потврдиме, но тоа би можело да биде така – има многу лоши форми на хибридна војна што ги гледаме во Германија“, рече канцеларот и додаде дека причината за несреќата треба внимателно да се истражи, но дека не би обвинил никого додека не може да го докаже тоа.
Неговите коментари следуваа по сличните изјави на германската министерка за надворешни работи, Анален Баербок, која, според извештајот на „Ројтерс“, им изјавила на новинарите на самитот на Г7: „Фактот дека сега, заедно со нашите литвански и шпански партнери, сериозно треба да се запрашаме дали ова е несреќа или повеќе хибриден инцидент, што покажува во какви нестабилни времиња живееме во моментот, дури и во центарот на Европа“.
Литванските власти, од друга страна, ја минимизираа можноста за саботажа инсистирајќи на тоа дека сè уште не се пронајдени докази што би укажувале на саботажа.
„Нашите првични информации не покажуваат дека ќе треба да истражиме посериозни дејства“, рече обвинителот Артурас Урбелис во изјавата што ја пренесе „Ројтерс“.
„Можеби ќе најдеме знаци на друга активност додека истражуваме“, додаде тој.
Американскиот Национален одбор за безбедност во транспортот испраќа свој персонал да помогне во истрагата, објави „Ројтерс“, заедно со претставници од „Боинг“ и Федералната управа за авијација на САД.
На снимката од блиската безбедносна камера се гледа како авионот паѓа, а потоа исчезнува. По неколку моменти, на небото се појавува голем огнен облак.
Во несреќата загина еден член на екипажот. Тројцата други на летот, вклучувајќи го и пилотот, преживеале, заедно со 12 лица во куќата, кои биле евакуирани на безбедно, според локалните власти.
Шефот на литванската контраразузнавачка служба, Дариус Јаунискис, на прес-конференција за новинарите изјави дека тероризмот не е исклучен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белата куќа: Се надеваме на директни преговори меѓу Русија и Украина следната недела

Белта куќа изрази надеж дека Русија и Украина ќе се сретнат следната недела во Истанбул и ќе продолжат со директни преговори со цел да се постигне напредок кон завршување на војната, пренесува агенцијата „Анадолија“.
„Колку што јас разбирам, а на тоа и се надеваме, дека Русија и Украина ќе учествуваат во директни разговори и преговори следната недела во Истанбул. Веруваме дека тој состанок ќе се одржи, а тоа е состанок што претседателот го поддржа и силно го застапуваше за двете страни да се сретнат и директно да преговараат“, изјави портпаролката на Белата куќа, Каролин Левит.
Таа додаде дека американскиот претседател, Доналд Трамп, од почетокот на војната јасно ставил до знаење дека сака решение на преговарачка маса, а не на бојното поле: „Тоа им го кажа и на двајцата лидери, и јавно и приватно. Значи, се надеваме дека следната недела ќе направиме чекор напред.“
Левит додаде дека нема планови претседателот да испрати американски претставник на преговорите, но не ја исклучи таа можност.
Втората рунда директни преговори меѓу Русија и Украина е предложена за 2 јуни во Истанбул, откако двете страни се сретнаа на 16 мај. Тогаш, меѓу другото, се договорија за размена на заробеници и за подготовка на нацрт-документи за понатамошни мировни чекори.
Додека Русија најавува дека ќе го претстави нацрт-документот на преговорите, Украина бара да го добие однапред, пред самата средба.
Кремљ го оцени ставот на Украина како неконструктивен.
Свет
Драма на најпрометниот аеродром во Лондон: луѓето во паника поради сомнителен пакет

Еден од терминалите на аеродромот Хитроу беше евакуиран поради „соменителен пакет“, оставајќи илјадници патници во неизвесност.
Патниците беа евакуирани од Терминалот 3 на најпрометниот британски аеродром по дојава за сомнителен предмет во зградата.
Метрополитенската полиција претходно соопшти дека е на терен и дека се справува со ситуацијата.
Портпарол на полицијата изјави за „Д Сан“: „Станува збор за сомнителен пакет и сме на лице место, постапуваме.“
На социјалните мрежи беа објавени бројни видеа и фотографии од луѓе кои сведочат дека биле евакуирани поради безбедносната закана.
Сепак, полицијата подоцна потврди дека станувало збор за „лажна тревога“ и дека повеќе нема закана.
Возовите на „Хитроу експрес“ исто така беа погодени од вонредната состојба – операторот објави на социјалните мрежи дека има доцнења на некои од нивните услуги.
Сè уште не е потврдено дали ќе има доцнења и кај летовите поради евакуацијата.
„Попладнево, нашите тимови реагираа на потенцијално сомнителен предмет во Терминал 3. Како претпазливост, еден мал дел од терминалот беше привремено евакуиран додека надлежните органи ги извршија потребните проверки. Проблемот сега е безбедно решен. Им се извинуваме на патниците за предизвиканата непријатност.“, беше соопштено.
Свет
Турција воведе казни за патниците кои ќе станат пред да запре авионот

Турција воведе казни за патниците кои ќе станат пред да се изгаси знакот за сигурносен појас по слетувањето, соопшти турската Агенција за цивилно воздухопловство, а пренесува Би-Би-Си.
Агенцијата наведува дека паричните казни се воведени поради поплаките од патници. Новите правила стапија на сила порано овој месец.
Агенцијата предупреди дека е забележано сериозно зголемување на ваквите инциденти, при што многу поплаки се однесуваат на патници кои земаат рачен багаж од преградите над седиштата пред целосното запирање на авионот.
Десетици милиони туристи секоја година ја посетуваат Турција. Воздухопловната агенција соопшти дека комерцијалните авиокомпании сега мора да ги информираат патниците за новите правила за време на летот и да ги пријават оние кои нема да ги почитуваат. Патниците мора да бидат информирани дека не смеат да ги одврзуваат појасите, да стануваат од седиштата и да ги отвораат преградите за багаж пред да се изгаси знакот за сигурносен појас.