Свет
Шојгу замина во Иран, неколку дена по посетата на Северна Кореја

Високиот руски безбедносен функционер, Сергеј Шојгу, денеска во Техеран разговарал со својот ирански колега, јавуваат руските и иранските медиуми, неколку дена по средбата со севернокорејскиот лидер Ким Џонг-ун во Пјонгјанг.
Русија ги продлабочи односите со Иран и Северна Кореја, двете нации непријателски настроени кон САД, од почетокот на нејзината војна во Украина.
Соединетите Држави гледаат на овие растечки пријателства со загриженост, забележувајќи дека и двете земји ја снабдуваат Русија со балистички ракети за употреба во војна, што Москва го негира.
Двете патувања на Шојгу доаѓаат во клучен момент во двегодишната војна, бидејќи Киев ги притиска Соединетите Држави и нивните сојузници да им дозволат да користат западно оружје со долг дострел за да напаѓаат цели како што се воените аеродроми длабоко во руската територија.
Претседателот Владимир Путин минатата недела изјави дека западните земји ќе бидат во директна војна со Русија доколку дадат зелено светло за употреба на такво оружје и дека Москва ќе одговори.
Новинската агенција Нур, поврзана со Врховниот совет за национална безбедност на Иран, објави дека Шојгу се сретнал со неговиот ирански колега Али Акбар Ахмадијан. Не беа споделени информации за исходот од таа средба.
Покрај средбата со Ким во Северна Кореја, Шојгу разговараше и со кинеската шефица на дипломатијата минатата недела.
Русија неколку пати изјави дека е блиску до потпишување голем договор со Иран, кој би го запечатил стратешкото партнерство меѓу двете земји.
Шојгу беше министер за одбрана на Русија до мај оваа година, кога беше назначен за секретар на Советот за безбедност, кој ги собира војската на претседателот Владимир Путин, шефовите на разузнавањето и други високи функционери.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Венс: САД размислуваат за испорака на ракети „Томахавк“ на Украина

Соединетите Американски Држави го разгледуваат барањето на Украина за испорака на ракети „Томахавк“, изјави во неделата американскиот потпретседател Џеј Ди Венс.
Украинскиот претседател Володимир Зеленски побара од Вашингтон да ги продаде овие ракети на европските земји, кои потоа ќе ги проследат до Украина.
Венс изјави за „Фокс њуз“ дека американскиот претседател Доналд Трамп ќе ја донесе „конечната одлука“ дали да дозволи таков договор.
„Секако разгледуваме неколку барања од Европејците“, рече Венс.
Ракети што можат да стигнат до Москва
Ракетите „Томахавк“ имаат дострел до 2.500 километри, што значи дека во украински раце би можеле да стигнат до Москва. Русија би го сметала обезбедувањето на такво оружје за Киев како ескалација на војната, пишува „Ројтерс“.
Трамп ги отфрли украинските барања за ракети со долг дострел во минатото, но оттогаш е фрустриран од одбивањето на рускиот претседател Владимир Путин да ја запре војната.
Кит Келог, специјалниот претставник на САД за Украина, откри дека Трамп навестил дека на Киев сега можеби ќе му биде дозволено да започне напади со долг дострел во Русија.
„Читајќи што кажа Трамп, како и што кажа потпретседателот Венс, одговорот е „да“. Искористете ја таа можност за да напаѓате длабоко. Нема безбедни засолништа“, изјави Келог за „Фокс њуз“ во неделата.
Фото: принтскрин
Свет
Лукашенко за Трамп: Понекогаш се согласуваме, понекогаш не

Белорускиот претседател Александар Лукашенко изјави дека се надева дека американскиот претседател Доналд Трамп нема да „изгради комбинација“ од продажба на американско оружје на европските земји и испорака на тоа оружје во Украина.
„Би сакал да видам некаков вид шема што нема да се случи, како „Ќе дадам оружје, ќе им го продадам на Европејците, а тие ќе ја снабдуваат Украина со што сакаат“. Гледајте, ние сме возрасни луѓе. Јас им ги дадов на Европејците, а Европејците платија. Или можеби не платија, но исто како што (поранешниот американски претседател Џозеф) Бајден даде оружје претходно, тоа отиде во Украина. Ќе проверите ли кој што му платил на кого? Тоа е само повторување на истата стара приказна, само со различен аранжман“, изјави Лукашенко пред новинарите во Кремљ по средбата со рускиот претседател Владимир Путин во петокот, пренесува РИА Новости.
Нов фрагмент од разговорот беше прикажан денес на телевизискиот канал Белорусија 1.
„Мораме да бидеме поотворени тука, да зборуваме јавно. Или уште подобро, да не кажуваме ништо јавно додека не постигнеме договор. Мора да постигнеме договор, а потоа да разговараме за резултатите. Но, тоа е тактиката на Доналд. Ние го разбираме тоа, го почитуваме тоа и понекогаш се согласуваме, понекогаш не се согласуваме“, рече Лукашенко.
Тој рече дека Белорусија ќе дејствува врз основа на сопствената позиција.
Фото: принтскрин
Свет
(Видео) Во Кина отворен највисокиот мост во светот

Кина официјално го отвори највисокиот мост во светот. Мостот во кањонот Хуаџијанг се издига 625 метри над клисурата во кинеската покраина Гуиџоу. Тој е за 289 метри повисок од претходниот рекордер, вијадуктот Мијо во Франција.
Според официјалните лица, мостот ќе го скрати времето на патување помеѓу двете страни на кањонот од два часа на само две минути.
Станува збор за висечки мост од челични решетки со вкупна должина од 2.890 метри. Челичните решетки на мостот тежат вкупно околу 22.000 тони, што е еквивалентно на тежината на три Ајфелови кули.
Изградбата официјално започна на 18 јануари 2022 година.
Порано оваа година, во август, тест тим возеше 96 камиони до одредени точки на мостот за да го тестира неговиот структурен интегритет.
Мостот сега го држи рекордот за највисок мост во светот, како и за мост со најдолг распон изграден во планинска област.
Гуиџоу е планинска провинција со исклучително сложен терен, а мостот го преминува длабокиот и тесен кањон Хуаџијанг, кој локалното население го нарекува „пукнатина во земјата“.
фото: принтскрин