Свет
Шпанската полиција уапси 121 предофил, меѓу приведените и жени
Шпанската полиција уапси 121 лице, меѓу кои 118 мажи и три жени, во една од најголемите операции спроведени во таа земја против детска порнографија.
Во рамки на акцијата извршени се 125 претреси и запленети се 946 уреди со 500 терабајти порнографска содржина со малолетници.
При претрес на домовите и работните места на уапсените, одземени се 368 хард дискови, 427 ЦД-а и ДВД-а, 114 УСБ флеш драјвови, 37 мемориски картички, 60 компјутери, 47 мобилни телефони, шест таблети, видео камери и други електронски уреди.
Истрагата ја покренаа агенти на Централната единица за компјутерски криминал како дел од превентивната работа на сајбер патролата во борбата против педофилските мрежи кои споделуваат досиеја со материјали за сексуална злоупотреба на деца преку Интернет.
Во операцијата учествуваа 46 територијални единици специјализирани за компјутерски криминал.
– Сите уапсени ја користеле истата дигитална платформа за добивање и споделување нелегална содржина – се додава во соопштението.
Во Мадрид е уапсен маж кој поседувал два милиони досиеја со снимки од сериозно сексуално злоставување на многу млади девојки. Многу од видеата прикажуваа висок степен на насилство врз жртвите и беа распространети на 10 хард дискови со голем капацитет.
Во еден од претресите, инспекторите уапсиле маж кој поседувал голем број мултимедијални датотеки со експлицитни сексуални слики на двајца малолетни мажи, снимени во домот на уапсениот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Свиркач од „Боинг“: Беше прашање на време кога ќе се случи нешто лошо, знаеа за дефектите, но чуваа во тајност
Сантијаго Паредес, свиркач од авиокомпанијата „Боинг“ каде што работеше како менаџер за квалитет, рече дека „прашање на време било кога ќе се случи нешто лошо“, мислејќи на серијата дефекти на авионите на компанијата во изминатиот период.
Паредес работел 10 години во фабриката „Spirit AeroSystems“ во американската сојузна држава Канзас, каде што ја проверил исправноста на трупот на Боинг 737, пренесува CBS News.
„Многу ретко се случуваше да не најдеме дефект“, рече Паредес, додавајќи дека квалитетните менаџери често наоѓале дефекти дури и на авионот од кој вратата падна сред лет во јануари.
„Зошто се случи тоа? Затоа што Спирит не обрнале внимание на пропустите поради притисокот што им бил наметнат на инспекторите. Да беше добра културата, ќе беа спомнати“, изјави Паредес.
Тој истакна дека Боинг со години знаел дека „Спирит“ испорачува трупови со дефекти и дека „само прашање на време било кога ќе се случи нешто лошо“.
Паредес бил под постојан притисок од претпоставените да пријави што помалку дефекти и дека притисоците нагло се зголемиле во 2018 година, кога производството на трупови се зголемило од 30 месечно на 50.
„Секогаш велеа дека немаат време да ги поправаат грешките. Бев во позиција каде што ако кажам не, ќе ме отпуштат. Ако кажам „да“, признавам дека нешто ќе згрешам“, изјави Паредес.
Во февруари 2022 година, претпоставените на Паредес, наводно, побарале од него да ги забрза инспекциите и да биде помалку детален за пропустите што ги наоѓа, што го натерало да испрати е-пошта велејќи дека нивното барање е „неетички“ и го ставиле „во многу непријатна ситуација“.
Потоа на Паредес му беше одземена менаџерската титула, по што тој се пожали до одделот за човечки ресурси, кој го врати на работа, но тој сигурно се повлече во летото 2022 година.
„Се изморив од борба. Се изморив од обидот да ја направам вистинската работа“, рече Паредес.
Свет
Протести во Тел Авив, Израелците бараат ослободување на заложниците
Илјадници Израелци излегоа синоќа на улиците барајќи владата на премиерот Бенјамин Нетанјаху да направи повеќе за да обезбеди ослободување на заложниците кои ги држеше исламистичката група Хамас во Појасот Газа.
Како што пренесува „Ројтерс“, членовите на семејствата на заложниците носеле слики од нивните најблиски кои се уште се во заробеништво и се приклучиле на толпата што протестира во Тел Авив.
Една од нив беше Наама Вајнберг, чиј братучед Итаи Свирски беше киднапиран за време на нападот на Хамас на израелските градови на 7 октомври и, според израелските власти, бил убиен во заробеништво.
Во говорот таа се осврна на видеото кое Хамас го објави вчера, тврдејќи дека уште еден од израелските затвореници починал.
„Наскоро дури и оние кои успеаја да преживеат толку долго нема да бидат меѓу живите. Тие мора да се спасат сега“, рече Вајнберг.
„Апсолутно е јасно дека израелската влада е целосно идеолошки банкротирана. Тие немаат поим што прават. Јасно е дека не се обидуваат да спасат ниту еден заложник или да ја прекинат војната. Владата всушност ја води најекстремниот фундаменталист , чија идеологија нема никаква врска со демократските идеали“.
Како што одминуваше вечерта, некои демонстранти го блокираа главниот автопат во градот пред полицијата да ги растера со водени топови, а некои директно се судрија со полицијата. Уапсени се најмалку три лица.
Свет
Трагедија во Индонезија: на автобус со матуранти му откажаа сопирачките, загинаа најмалку 11 лица
Најмалку 11 лица, претежно ученици, загинаа во тешка несреќа со училишен автобус во Индонезија, пренесува „АП“.
Според извештаите, на автобусот му откажале сопирачките, по што удрил во неколку автомобили и мотоцикли пред да удри во столб и да се преврти.
Автобусот со 61 ученик и професор се враќал доцна синоќа во средното училиште во Депок во близина на главниот град Џакарта, од туристичкиот град Бандунг по прославата на матурирањето, изјави портпаролот на полицијата во Западна Јава, Жил Абрахам Абаст.
„Автобусот изгубил контрола на удолницата и преминал на спротивната лента, удрил во неколку автомобили и мотоцикли пред да удри во столб за струја“, рече тој.
Девет лица загинаа на местото на несреќата, а уште две починаа подоцна во болница, меѓу кои и наставникот и возачот на автобус, потврди Абаст. Уште 53 лица се хоспитализирани со повреди, меѓу кои и некои во критична состојба.
„Се уште ги истражуваме причините за несреќата, но прелиминарната истрага покажа дека сопирачките на автобусот биле неисправни“, рече Абаст.
Тешките сообраќајни несреќи не се невообичаени во Индонезија, пред се поради лошите безбедносни стандарди и патната инфраструктура.