Свет
Што значи делумната мобилизација на Путин
На почетокот на својот говор Путин рече дека Западот сака да ја уништи Русија и дека се работи за одбрана на земјата.
Во следниот момент тој најави делумна мобилизација и рече дека настаните поврзани со мобилизацијата ќе почнат на 21 септември.
„Потенцирам дека тоа е делумна мобилизација. Мобилизацијата почнува денеска, 21 септември. На Русите што ќе бидат мобилизирани ќе им бидат дадени сите поволности и гаранции“, рече Путин и наведе дека мобилизираниот персонал ќе добие и дополнителна обука.
Половина час по Путин, министерот за одбрана, Сергеј Шојгу, ѝ се обрати на нацијата и појасни дека ќе бидат мобилизирани 300.000 војници.
Како што пишува „Индекс“, делумната воена мобилизација е поим што се користи практично во целиот свет, но може да се разликува од земја до земја во одредени аспекти.
Во случајот со Русија, исто како што рече Путин, делумната воена мобилизација значи дека резервистите ќе бидат повикани во армијата и тој процес почнува веднаш. Резервистите се резервни војници во секоја земја, а всушност тоа се луѓе што завршиле со служење војска.
Во Русија воената служба сè уште е официјално задолжителна и трае 12 месеци. Тоа е задолжително за сите мажи на возраст од 18 до 27 години. Исто така, избегнувањето на воениот рок се казнува со затвор до две години.
Шојгу изјави дека ќе бидат повикани 300.000 резервисти, од 25 милиони со кои, како што рече, Русија располага.
Најавата на рускиот претседател Владимир Путин за делумна мобилизација следува по потегот на долниот дом на рускиот парламент, државната Дума, во вторникот за измена на законот за воена служба заострувајќи ги казните за прекршување на воената служба – како дезертерство и затајување, пишува Си-ен-ен.
Предлог-законот предвидува затворска казна до 15 години за избегнување служење или кршење службена воена наредба.
Пратениците и сенаторите на државната Дума подготвија и измени на Кривичниот законик предлагајќи затворска казна до пет години за уништување или невнимателно оштетување на оружје и воена опрема за време на војната, објави државната новинска агенција „РИА новости“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Макрон: Ќе испорачаме авиони „мираж“ во Киев
Франција планира да и испорача на Украина борбени авиони „мираж 2000“, изјави францускиот претседател Емануел Макрон.
Макрон за француските телевизиски станици изјави дека утре, по повод посетата на украинскиот претседател Володимир Зеленски на Франција како дел од прославата на годишнината од Денот Д, неговата влада ќе објави дека ќе и обезбеди на Украина борбени авиони.
Тој не прецизираше колкав број авиони ќе обезбеди Франција, до кога и под кои финансиски услови. Макрон рече дека Париз предложил украинските пилоти да се обучуваат во Франција почнувајќи од ова лето.
Тој додаде дека Франција, покрај тоа, предложила да се обучат 4.500 украински војници. Не прецизираше каде ќе се обучуваат војниците, но изјави дека во моментот на украинска територија нема француски воени инструктори.
„Мираж“ 2000 е повеќенаменски млазен ловец со еден мотор.
Свет
Училишен автобус со деца без родители излета од патот во Сирија, најмалку седум загинати
Најмалку седум лица се удавија, а 20 се повредени, од кои повеќето деца, кога училишен автобус излетал од патот и паднал во река во северозападна Сирија, соопштија локалните власти, пренесува „Еј-би-си њуз“.
Несреќата се случила во близина на градот Даркуш, западно од градот Идлиб, кога автобусот паднал во реката Оронтес. Спасувачките тимови околу шест часа бараа преживеани на карпите и во реката, додаваат тие.
Засега не е јасно поради што автобусот излетал од патот.
Ахмад Гандур, лекар во болницата во Даркуш, која ги прими жртвите, рече дека учениците и наставниците во автобусот се од училиштето за деца без родители.
Свет
САД ја охрабруваат Кина да се приклучи на мировниот самит во Украина
САД ја охрабруваат Кина да присуствува на планираниот самит за мир во Украина овој месец во Швајцарија, и покрај најавата на Пекинг дека нема да учествува бидејќи Русија не е поканета, изјави денеска за новинарите портпаролот на Стејт департментот.
– Ние секако би ја охрабриле Кина да учествува на тој самит. Тие присуствуваа на претходните самити и нивното присуство е корисно. Сметаме дека нивното присуство овде би било од помош – рече на брифингот портпаролот на Стејт департментот.
Портпаролот истакна дека Кина треба да преземе чекори против компаниите за кои Вашингтон тврди дека и помагаат на руската одбранбена индустриска база, пренесува Ројтерс.
Киев вели дека повеќе од 100 земји ја прифатиле поканата за самитот за да разговараат за условите на мировниот план што го предложи претседателот Володимир Зеленски за ставање крај на сеопфатната руска инвазија која почна во февруари 2022 година.
Пекинг, кој има блиски врски со Москва, досега одбиваше да се приклучи на самитот, опишувајќи го присуството на двете завојувани страни како предуслов за каква било суштинска мировна конференција, пишува британската агенција.
Москва рече дека конференцијата без учество на Русија е бесмислена, а Украина ја обвини Русија дека се обидува да го наруши самитот.