Портпаролката на руското Министерство за надворешни работи, Марија Захарова, денес изјави дека руската делегација пристигнала во Истанбул, каде што се планирани разговори за решавање на конфликтот во Украина, објавија руските медиуми.

„Како што беше кажано во неколку наврати, руската страна е подготвена за сериозни преговори, а делегацијата на Русија пристигна во Истанбул и е подготвена за сериозна работа“, изјави таа на прес-конференција во Москва, објави агенцијата Интефакс.

Захарова потсети дека на 11 мај рускиот претседател Владимир Путин презентираше иницијатива за продолжување на директните преговори меѓу двете страни, предлагајќи преговорите да започнат без одложување или предуслови со цел да се отстранат суштинските причини за конфликтот и да се оди кон воспоставување долгорочен, траен мир, пренесува Танјуг.

Руската делегација ја предводи помошникот на Путин, Владимир Медински, кој веќе предводеше група руски преговарачи во Истанбул во пролетта 2022 година, кога беа прекинати директните преговори меѓу двете страни, потсети Интерфакс.

Во меѓувреме, украински функционер изјави дека украинскиот претседател Володимир Зеленски денес треба да се сретне со турскиот претседател Реџеп Таип Ердоган, по што ќе донесе одлука за учество во разговорите со руската делегација во Истанбул, објави Ројтерс.

За денес во Истанбул се закажани преговори меѓу делегациите на Русија и Украина за прекин на огнот, за кои не е прецизирано кога ќе започнат, а кои беа организирани по предлог на рускиот претседател Владимир Путин.

Актуелниот американски претседател Доналд Трамп штотуку изјави дека може да отпатува за Истанбул утре, доколку денешните мировни преговори за Украина постигнат напредок.

Зборувајќи од Катар, за време на четиридневната турнеја на Блискиот Исток, Трамп рече дека се надева оти Русија и Украина ќе можат да постигнат договор бидејќи војната мора да престане.

„Би сакале да видиме крај на војната и мислам дека имаме шанса тоа да се случи“, додаде Трамп.

Апелациониот суд во Ниш нареди дополнување на истрагата во постапката за повторно судење во случајот со исчезнувањето и смртта на двегодишната Данка Илиќ, оценувајќи дека е потребно дополнително да се разјаснат околностите и да се потврди валидноста на собраните докази, вклучително и одбраната на кообвинетите.

Според официјалното соопштение, новиот судски совет, со променет состав, ќе има обврска да ги реконструира настаните под идентични услови со цел попрецизно да се утврди фактичката состојба, но и повторно да ја испита мајката на Данка, Ивана Илиќ.

„Реконструкцијата на настаните мора да се изврши според исказот на секој обвинет поединечно, особено според исказот на мајката Ивана Илиќ, која мора повторно да биде сослушана како сведок – сè под исти метеоролошки услови, во исто време од денот, и со идентичен распоред на зградите и паркираните возила во дворот на куќата во населбата Бањско Поље, како и положбата на службените возила на улицата во близина“, се наведува во образложението.

Реконструкцијата ќе се базира на досега собраните докази – вклучувајќи извештаи од местото на злосторството, скици од местото на настанот, фотографии и мислења на експерти.

Апелациониот суд истакнува дека описот на кривичното дело во однос на обвинетиот Радослав Драгиевиќ содржи внатрешни противречности и е правно неодржлив.

„Се наведува дека Драгијевиќ е оправдано осомничен дека му помогнал на Срѓан Јанковиќ, соизвршител на тешко убиство, иако во исто време е опишано како Дејан Драгијевиќ го убил детето, го донел телото дома и, со знаење на таткото, обвинетиот Радослав, повторно го преместил во напуштена куќа. Подоцна, самиот Радослав го преместил телото повторно на друга, непозната локација“, се вели во одлуката.

Со оглед на императивните одредби од Кривичниот законик, судот мора да утврди дали постои основа за обвинението против Радослав Драгијевиќ, со оглед на тоа што според законот, лице кое помага на роднина по крв по извршување на кривично дело или не го пријавил тоа не е казниво.

Судот, исто така, наложи новиот совет да мора:

– јасно, доволно и правилно да се оправда постоењето на основано сомневање во врска со фактите што ги сочинуваат карактеристиките на кривичното дело, да наведе конкретни докази од кои произлегуваат овие факти и да ги оцени наводите во одговорот на обвинителниот акт.

„По постапувањето по овие приговори, првостепениот суд треба, врз основа на квантитативна (а не квалитативна) проценка на доказите, да донесе правилна и законски заснована одлука“, заклучи Апелациониот суд.

Според „Блиц“, ова значи дека судиите кои претходно биле вклучени во случајот (на пр. при одредување притвор, испитување на обвинението или негово продолжување) не можат да учествуваат во новата одлука. Поради ова, Вишиот суд во Заечар побара назначување на нов судски совет, а Апелациониот суд во Ниш предложи предметот да се префрли на најблискиот виш суд во регионот.