Свет
Јапонија ги повлекува вработените од Амбасадата во Украина

Јапонија утрово соопшти дека привремено ќе ги исели сите членови на својата амбасада во Украина.
„Кјодо њуз“ објави дека јапонското Министерство за надворешни работи објавило дека од безбедносни причини персоналот на Амбасадата, претходно преместен од Киев во Лавов, сега ќе ја напушти Украина.
„Ситуацијата во Украина станува сѐ понапната, а ризикот значително расте во Лавов“, соопшти Министерството.
Канцеларијата за врски во Лавов, во близина на границата со Полска, нема да биде затворена и ќе продолжи со работа кога ситуацијата ќе се смири.
Додека Токио им се придружува на западните сојузници во воведувањето санкции кон Москва, јапонските производители на автомобили се обидуваат да ги вратат работниците од Русија.
„Тојота“ објави дека 30-ина вработени и 20 члена на нивните семејства се во процес на евакуација наведувајќи дека одлуката е донесена по совет на јапонската влада.
„Нисан“, „Субару“ и „Мицибуши“ се во слични процеси, а јапонската телекомуникациска компанија KDDI Corporation соопшти дека планира да ги евакуира вработените.
Според податоците на јапонската истражувачка компанија „Теикоку датабанк“, до февруари во Русија работеле вкупно 347 јапонски компании.
Речиси 45 отсто од нив биле производители на автомобили и други сиџири на производство, трговците на големо учествувале со 25 отсто, а компаниите од услужниот и финансискиот сектор со 10 отсто.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп: Иранците со кои преговарав се мртви и не умреа од грип или ковид

Претседателот на САД, Доналд Трамп, за Си-ен-ен изјави дека САД го поддржуваат Израел и ги нарече нападите врз Иран многу успешни.
„Секако дека го поддржуваме Израел, очигледно. Го поддржавме како никој досега“, рече Трамп во краткиот телефонски разговор.
„Иран требаше да послуша кога им кажав… Не знам дали знаете, но им дадов 60-дневно предупредување, а денес е 61. ден“, додаде тој.
„Тие треба да седнат на маса сега и да постигнат договор пред да биде предоцна. Ќе биде предоцна за нив. Знаете, луѓето со кои разговарав повеќе не се живи, тврдокорните“, рече Трамп одбивајќи да прецизира на кого точно мисли.
На прашањето дали ова е последица од синоќешниот израелски напад, Трамп саркастично одговори: „Тие не умреа од грип, не умреа од ковид“.
Си-ен-ен објави дека државниот секретар на САД, Марко Рубио, претходно изјави дека САД не учествувале, ниту помагале во нападите.
Свет
Русија ја осудува острата ескалација на тензиите меѓу Израел и Иран

„Русија е загрижена и ја осудува острата ескалација на тензиите“, изјави портпаролот на Кремљ, Дмитриј Песков, пренесува руски „Интерфакс“.
Тој изјави дека рускиот претседател Владимир Путин добива онлајн-извештаи за настаните што се случуваат меѓу Израел и Иран.
„Претседателот Путин добива извештаи во реално време од руското Министерство за одбрана, Службата за надворешно разузнавање и од Министерството за надворешни работи за настаните во регионот“, рече Песков.
Според него, руското Министерство за надворешни работи, по наредба на претседателот на Русија, набргу ќе издаде детаљно соопштение за ситуацијата меѓу Израел и Иран, „кое потоа ќе биде дистрибуирано до Обединетите нации“.
Свет
Израел ги скри патничките авиони на тајна локација надвор од земјата

Израелските авиокомпании „Ел Ал“, „Аркија“ и „Исраир“ ги преместија своите авиони надвор од земјата на непозната локација како подготовка за можен ирански напад врз аеродромот „Бен Гурион“, јавува дописникот на „Скај њуз“ од Блискиот Исток.
Авионите беа транспортирани без патници како дел од однапред подготвени безбедносни протоколи во случај на понатамошна ескалација и напади врз клучна инфраструктура.
Ноќеска, Израел изврши голем воздушен напад врз повеќе цели во Иран. Според израелски воени извори, погодени се објекти поврзани со нуклеарната програма на Иран и воени локации, вклучувајќи го и клучниот комплекс за збогатување ураниум во Натанц.