Премиерот на Онтарио, Даг Форд рече дека покраината нема да отстапи откако американскиот претседател Доналд Трамп најави дополнителни зголемувања на царините како одговор на извозниот данок на електрична енергија од Онтарио од 25 отсто.

Во интервју за МСНБЦ, само еден час по објавата на Трамп, Форд рече: „Нема да отстапиме. Ќе бидеме немилосрдни“.

Тој потврди дека може целосно да ја прекине струјата што доаѓа од таа канадска провинција во САД.

Трамп на социјалната мрежа „Трут соушл“ претходно рече дека му наредил на министерот за трговија да ги удвои тарифите за канадскиот челик и алуминиум – од првичните 25 проценти на 50 проценти. Тој, исто така, се закани дека трајно ќе ја затвори канадската автомобилска индустрија доколку Онтарио не се откаже од мерките. Трамп ја повтори својата претходна намера за претворање на Канада во 51-ва американска држава.

Набргу потоа се огласи и новоизбраниот лидер на Либералната партија на Канада и иден премиер Марк Карни, осудувајќи ги најновите царини на американскиот претседател Доналд Трамп.

„Најновите царини на претседателот Трамп се напад врз канадските работници, семејства и бизниси“, напиша Карни на платформата „Икс“.

Тој додаде дека неговата влада ќе се погрижи одговорот на Канада да има „максимално влијание во САД и минимално влијание во Канада“, истовремено поддржувајќи ги работниците кои се погодени.

Карни, исто така, рече дека канадските контрамерки ќе останат во сила додека САД не покажат почит и не обезбедат веродостојни, сигурни гаранции за слободна и фер трговија.

Се очекува Карни да ја преземе функцијата веднаш штом актуелниот премиер Џастин Трудо поднесе оставка. Вчера тој рече дека транзицијата ќе биде брза, но не даде точен датум.

Форд во понеделникот воведе данок од 25 отсто на извозот на електрична енергија во американските сојузни држави Мичиген, Минесота и Њујорк како одговор на трговските бариери на Трамп. Овој данок генерира до 400.000 долари приход за Онтарио дневно.

Канадската федерална влада и провинциите се едногласни во нивниот став дека нема да ги укинат своите контрамерки сè додека Трамп се заканува со нови царини.

Трамп и Форд се судрија уште во декември 2024 година, кога Форд се закани дека целосно ќе ја прекине електричната енергија на 1,5 милиони Американци во пограничните држави. Трамп тогаш на Њујоршката берза рече дека „не му е грижа“.

Форд дополнително ја засили својата реторика во понеделникот, велејќи дека „нема да се двоуми целосно да ја исклучи електричната енергија“. Сепак, таквиот потег би значел намалување на сопственото производство, бидејќи Онтарио продава значителен дел од својата енергија на други канадски провинции.

Францускиот претседател Емануел Макрон денеска зборуваше за безбедносните предизвици со кои се соочува Франција за време на посетата на идното седиште на Генералниот директорат за внатрешна безбедност.

Според „Монд“, Макрон одговорил на критиките од оние кои тврдат дека ја преувеличува заканата од Русија, велејќи дека „овие луѓе очигледно не ги следат вестите за Украина“.

Во полемика со лидерката на екстремната десница Марин Ле Пен, која го обвини дека го одвлекува вниманието од вистинскиот проблем – тероризмот, Макрон истакна дека фокусот не треба да биде на тоа која закана е поголема, туку како да се одговори на нив.

„Во време кога се менува светскиот баланс, кога она што го сметавме за сигурно исчезнува и она што се чинеше невозможно станува реалност, ние мора да ги браниме непоколебливите вредности на нашата република“, рече Макрон.

Во меѓувреме, Макрон се среќава со повеќе од 30 воени команданти од Европа и светот за да разговараат за создавање меѓународни сили за да се одврати идната руска агресија во случај на прекин на огнот во Украина.

Американскиот претседател Доналд Трамп најави дека ќе ги удвои планираните царини за канадскиот челик и алуминиум од 25 на 50 отсто, што ја ескалира трговската војна со северниот сосед на САД.

Трамп вели дека зголемувањето на тарифите што ќе стапи на сила во среда е одговор на зголемувањето на тарифите наметнато од провинциската влада на Онтарио за електричната енергија продадена на Соединетите држави.

„Му наложив на мојот секретар за трговија да додаде дополнителни царини од 25 на 50 отсто, за целиот челик и алуминиум што доаѓаат во САД од Канада, една од нациите со највисоки тарифи во светот“, објави Трамп на својата мрежа Truth Social.

„Единственото нешто што би имало смисла е Канада да стане нашата сакана 51-та држава. Тоа целосно ќе ги елиминира сите царини и сè друго. На Канаѓаните би им бидат значително намалени даноците, би биле побезбедни  од кога било досега, нема да има повеќе проблеми на северната граница, а најголемата и најмоќната нација во светот би била поголема, подобра и посилна од кога било“, напиша Трамп.

„Вештачката линија на поделба нацртана пред толку многу години конечно ќе исчезне, а ние ќе ја имаме најбезбедната и најубавата нација насекаде во светот – и вашата брилијантна химна, „О Канада“, ќе продолжи да свири, но ќе претставува голеема и моќна федерална држава во најдобрата нација што светот некогаш ја видел!“ напиша Трамп.

Премиерот на Онтарио, Даг Форд рече дека покраината нема да отстапи откако американскиот претседател Доналд Трамп најави удвојување на тарифите како одговор на извозниот данок на електрична енергија од Онтарио од 25 отсто.

Тој потврди дека може целосно да ја прекине струјата што доаѓа од таа канадска провинција во САД.