Свет
Јужна Кореја и САД започнаа воени вежби: „Војна може да избие во секое време“
Јужна Кореја и САД денеска почнаа годишни летни воени вежби за да ја зајакнат заедничката подготвеност за одбрана од севернокорејско оружје и кибер закани.
Вежбите кои ќе траат до 29 август, се спроведуваат додека Северна Кореја продолжува да ги развива своите нуклеарни и ракетни програми и обидите за лансирање на сателити за извидување.
Вежбите ќе ги одразуваат реалните закани во сите домени, вклучително и ракетните закани на Северна Кореја, но и сајбер нападите и другите лекции научени од неодамнешните инциденти, соопштија воените сили на двете земји.
Јужна Кореја одделно ќе спроведе симултани вежби за цивилна одбрана Улчи предводени од владата според сценариото за севернокорејски нуклеарен напад, соопштија официјални лица.
„Како што се гледа во Украина и конфликтите на Блискиот Исток, војната може да избие во секое време“, рече Јун на состанокот на владата.
„И природата на војната е променета во споредба со порано, таа се води во хибридна форма која комбинира регуларна, нередовна и сајбер војна, па дури и јавно мислење и психолошка војна користејќи лажни вести“, рече јужнокорејскиот претседател.
Во воените вежби ќе учествуваат околу 19.000 јужнокорејски војници, рече Јун.
Пјонгјанг неколку пати ги осуди овие вежби и ги нарече проби за нуклеарна војна.
Сеул и Вашингтон тврдат дека вежбите се од одбранбен карактер и одговор на заканите од Северна Кореја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Се бараат оставки поради трагедијата во Домот за пензионери
Голем број граѓани на Тузла денеска излегоа на улиците на градот и одржаа протест, изразувајќи го своето незадоволство поради трагедиите и скандалите што го погодија Тузланскиот кантон.
Пожарот што избувна во вторникот во Домот за пензионери во Тузла однесе 13 животи, а 12 пациенти сè уште се наоѓаат во болница. Како што беше утврдено, жртвите починале од труење со јаглерод моноксид.
Една седмица претходно, Тузланскиот кантон го потресе случајот со подведување малолетнички, за што се осомничени полициски службеник и еден професор. Нивното подведување траело неколку месеци во текот на минатата и оваа година.
Присутните граѓани од Тузла, но и оние кои допатуваа од други градови на Босна и Херцеговина, денеска побараа оставки од надлежните.
Свет
Три девојки планирале терористички напад во Париз
Девојки на возраст од 18, 19 и 21 година, беа уапсени и обвинети за терористичка завера и планирање напад во Париз, соопштија денеска истражните органи.
Како што е наведено, тие неколку недели планирале насилен терористички напад врз кафуле или концертна сала во Париз, јави РТЛ.
Апсењето и обвинението против трите жени е резултат на истрагата на Националното обвинителство за борба против тероризмот, која беше успешно завршена пред 10-годишнината од смртоносниот терористички напад на 13 ноември 2015 година во Париз.
Свет
Се запали магацин за парфеми во Турција, загинаа шест лица
Најмалку шест лица загинаа, а две се повредени во пожар што утрово избувна во магацин за парфеми во градот Диловаси, во северозападниот дел на Турција.
Според снимките што ги емитуваше турскиот канал НТВ, изгореле два ката од зградата во која се наоѓале магацинот и работилницата за производство на парфеми.
Засега нема информации за тоа што го предизвикало пожарот.

