Велика Британија, Канада, Германија и голем број други земји ја осудија одлуката на Израел да одобри 19 нови населби на окупираниот Западен Брег, предупредувајќи дека потегот го крши меѓународното право и ризикува да поттикне понатамошна нестабилност. Во заеднички апел, тие ја повикаа израелската влада да ја поништи одлуката, пишува „Франс 24“.

Одлуката на израелскиот кабинет за безбедност беше осудена, заедно со Велика Британија, Канада и Германија, од Белгија, Данска, Франција, Ирска, Исланд, Италија, Јапонија, Малта, Холандија, Норвешка и Шпанија.

„Го повикуваме Израел да ја поништи оваа одлука, како и проширувањето на населбите“, според заедничкото соопштение објавено од Велика Британија.

„Ве потсетуваме дека ваквите еднострани дејствија, како дел од пошироко интензивирање на политиката на населување на Западниот Брег, не само што го кршат меѓународното право, туку и ризикуваат поттикнување на нестабилност“, се додава во соопштението.

Американското Министерство за правда соопшти дека уште околу 700.000 документи поврзани со Џефри Епстин чекаат на проверка. На прегледот работи тим од 200 аналитичари, а процесот се очекува да трае уште околу една недела. Досега се објавени приближно 750.000 записи, додека голем дел од преостанатите може да бидат дупликати, пишува „Гардијан“.

Иако законот наложуваше целосно објавување до 19 декември, документите досега беа делумно објавени и со многу затемнувања, што предизвика револт кај жртвите и најави за тужби. Неименуван функционер изјави дека процесот наскоро ќе заврши, но дека „теориите на заговор нема“.

Во најновиот бран беа објавени 30.000 документи, меѓу кои има и повеќе спомнувања на Доналд Трамп, вклучително и е-пошта од 2020 година со тврдења дека патувал со приватниот авион на Епстин. Министерството, сепак, предупреди дека меѓу објавените материјали има и лажни документи и снимки, нагласувајќи дека тие се објавуваат затоа што законот го бара тоа.

Последните документи откриваат и напори на ФБИ да идентификува можни соучесници, но поголемиот дел од имињата се затемнети. Ова предизвика силни политички реакции, при што лидерот на демократите во Сенатот, Чак Шумер, побара целосна транспарентност и објаснување зошто одредени лица не биле кривично гонети.

Вонстепениот совет на Вишиот суд во Нови Сад ја прекина кривичната постапка против поранешниот министер за градежништво Горан Весиќ, неговата поранешна помошничка Анита Димоски и поранешната директорка на Железничката инфраструктура на Србија, Јелена Танасковиќ, во случајот со падот на настрешницата на железничката станица.

Тие беа обвинети за тешко кривично дело предизвикување општа опасност.

Во своето образложение, судот наведе дека нема доволно докази за да се поткрепи основано сомнение дека обвинетите ги сториле кривичните дела за кои се сметаат за одговорни.

Со одлуката на судот им е укината мерката за домашен притвор на Танасковиќ, Спремиќ, Гавриловиќ и Тодоровиќ. Со наредба на Врховниот суд на Србија во Белград, Анита Димоски и Горан Весиќ остануваат во домашен притвор.

Паралелно, судот во Нови Сад ги потврди обвиненијата против седум други обвинети во случајот со трагедијата на железничката станица.

На 1 ноември минатата година, 16 лица загинаа, а едно лице беше тешко повредено при падот на бетонската настрешница на неодамна реновираната зграда на станицата. Инцидентот предизвика масовни протести во Србија , предводени главно од студенти, кои бараа оставка на владата и закажување предвремени парламентарни избори.

Агенцијата Франс Прес прецизира дека одлуката на судот во Нови Сад не е конечна, а обвинителството веќе ја објави својата намера да поднесе жалба.