Турскиот заменик-министер за образование, Назиф Јилмаз, на „Твитер“ објави дека премиерот Бенјамин Нетанјаху ќе умре.

„Еден ден ќе те застрелаат и тебе. Ќе умреш“, напиша Јилмаз како одговор на видеото објавено од Нетанјаху за израелските воздушни напади врз Газа.

Нетанјаху требаше да ја посети Турција во следните месеци откако го одложи патувањето во јули затоа што му беше вграден пејсмејкер, објави „Тајмс оф Израел“. Минатиот месец Ердоган се сретна со Нетанјаху во Њујорк на првата позната средба меѓу двајцата лидери.

Turkey’s deputy minister of education to Netanyahu: “You will die.” pic.twitter.com/PIpKedNsC4

— Yaroslav Trofimov (@yarotrof) October 11, 2023

Односите меѓу Израел и Турција се одмрзнаа минатата година по долгогодишно непријателство меѓу лидерите на двете земји, главно поради поддршката на Турција за Хамас, пишува весникот.

Неименуван висок турски функционер денеска изјави дека неговата земја, која историски имала контакти со Хамас, води преговори со цел ослободување на цивилите што ги држи палестинската милитантна организација.

„Турција води преговори за цивили што ги држи Хамас. Според наредбата на претседателот Ердоган, во тој процес се ангажирани соодветните институции“, изјави неименуваниот турски функционер, без да даде повеќе детали.

Петтиот ден од крвавите судири на Блискиот Исток однесоа повеќе од 2.300 животи. Според израелските и палестинските власти, во Израел се убиени повеќе од 1.200 луѓе, а бројот на загинати Палестинци е над 1.100. Повеќе од 5.000 беа ранети од двете страни на фронтот. Денеска почна шестиот ден од воените операции меѓу израелските воени сили и Хамас, а во војната е вклучена и либанската паравоена формација Хезболах, која е на страната на Хамас.