Генералниот секретар на НАТО Марк Руте денеска ги повика земјите-членки на НАТО да трошат повеќе за одбрана од сегашната цел од два отсто од БДП, поставена пред десет години, велејќи дека тоа сега е премалку поради новите предизвици.

Руте ги даде забелешките во Лисабон по средбата со португалскиот премиер Луис Монтенегро, кој го повтори своето ветување дека неговата земја ќе ја достигне целта од два отсто БДП до 2029 година.

Во 2023 година, Португалија потроши 1,5 отсто од својот БДП на обврските кон НАТО.

„Знаеме дека целта од два проценти, поставена пред десет години, нема да биде доволна за да се одговори на предизвиците на утрешниот ден“, рече Руте.

„Тоа значи дека сега треба да трошиме повеќе на нашата одбрана“, додаде.

Земјите-членки ќе разговараат дали да ја зголемат целта од два проценти на самитот во Хаг ова лето, под притисок на американскиот претседател Доналд Трамп да ги зголеми трошоците за одбрана на пет проценти од БДП, што во моментов ниту една земја-членка не го исполнува.

Руте ги повтори западните обвинувања дека Русија се обидува да ги дестабилизира земјите-членки на НАТО преку дејствија кои се движат од обиди за атентат до сајбер напади и саботажи, додека во исто време води брутална агресивна војна против Украина.

Москва негира дека сака да ги дестабилизира западните земји и тврди дека нејзините воени операции во Украина се насочени кон зајакнување на нејзината национална безбедност.

Мексико минатата недела прифати и депортирани мигранти од немексиканско потекло, изјави денеска мексиканската претседателка Клаудија Шеинбаум.

Шејнбаум објави дека Мексико примило повеќе од четири илјади депортирани лица и дека мнозинството од нив се Мексиканци. Во таа бројка се вклучени луѓе испратени од САД со четири летови, пренесува Ројтерс.

Од враќањето на Доналд Трамп во Белата куќа, сепак, нема значително зголемување на депортациите од САД во Мексико, рече Шејнбаум.

Претседателката претходно рече дека нејзината левичарска влада се противи на враќањето на програмата „Останете во Мексико“ на администрацијата на Трамп, според која мигрантите од немексиканско потекло ќе бидат вратени во Мексико додека го чекаат процесот на разгледување на нивната апликација за влез во Соединетите Американски Држави.

Турските власти приведоа 19 лица во врска со минатонеделниот пожар во хотел во ски-центар во северниот град Болу, објави државната новинска агенција „Анадолија“.

Уапсени се сопственикот на хотелот Гранд Картал, директорот, локалниот пожарникар и заменик-градоначалникот на Болу. Потерница е распишана и по вработен во фирмата за инспекција, стои во пријавата.

Пожарот, кој избувна рано утрото на 21 јануари, однесе 78 животи. Многумина од повеќе од 230 гости се обиделе да избегаат од хотелот скокајќи од прозорците или спуштајќи се со чаршафите. Инцидентот предизвика широки критики во Турција и обвинувања дека не се почитуваат мерките за спречување пожари.

Централната влада и општината Болу меѓусебно се обвинуваат за пожарот, со оглед на фактот дека градот е под контрола на опозициската Републиканска народна партија (ЦХП). Мерките за безбедност на градежништвото често не се почитуваат во Турција. Во петокот вечерта, зграда во централниот град Коња ненадејно се урна, при што загинаа две лица.

Минатата година 29 лица загинаа во пожар во ноќен клуб во Истанбул. Во силните земјотреси на југот на земјата во 2023 година загинаа повеќе од 50.000 луѓе, делумно поради неисправна градба.