Свет
13 земји испратија предупредувачко писмо до Израел

Министрите за надворешни работи на 13 земји преку писмо го предупредија Израел против сеопфатна воена офанзива врз градот Рафа во јужниот дел на Појасот Газа, се вели во извештајот на медиумите.
Германскиот весник „Зидојче цајтунг“ објави дека потписниците исто така повикале на поголема помош за палестинското население. Сите членки од групата Г7, големи индустријализирани земји, го потпишаа писмото на четири страници, со исклучок на Соединетите Американски Држави.
Во писмото до израелскиот министер за надворешни работи, Израел Кац, министрите го истакнаа правото на Израел на самоодбрана и ги осудија терористичките напади на 7 октомври од страна на Хамас и другите исламистички групи.
Истовремено, тие ја повикаа владата на премиерот Бенјамин Нетанјаху да направи сѐ што е во нејзина моќ за да ја ублажи катастрофалната и влошена хуманитарна криза во Појасот Газа.
Според извештајот на „Зидојче цајтунг“, тие исто така го повикале Израел да ги отвори сите гранични премини во крајбрежната зона за испорака на помош, вклучувајќи го и преминот Рафа со Египет.
Писмото го потпишаа министрите за надворешни работи на земјите од Г7 на Германија, Франција, Велика Британија, Италија, Јапонија и Канада и нивните колеги од Австралија, Данска, Финска, Холандија, Нов Зеланд, Јужна Кореја и Шведска.
Пред нешто повеќе од една недела израелската армија напредуваше од исток кон Рафа и покрај силните меѓународни предупредувања. Оттогаш армијата го контролира и палестинскиот дел од граничниот премин Газа кон Египет. Важниот граничен премин оттогаш е затворен за хуманитарна помош. Израел и Египет меѓусебно се обвинуваат за ова.
Израелскиот министер за одбрана, Јоав Галант, вчера најави распоредување дополнителни трупи во Рафа. Таму веќе се погодени стотици цели и уништени се неколку тунели, соопшти израелската армија. Според ОН, околу 600.000 луѓе веќе го напуштиле градот на границата со Египет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Објавени последните зборови на папата

Последните зборови на папата Франциско беа благодарност до неговиот здравствен асистент кој му помогна да ги поздрави верниците на плоштадот Свети Петар на Велигден, соопшти Ватикан.
„Ви благодарам што ме доведовте на плоштадот“, му рекол Франциско на Масимилијано Страпети, кој во изминатиот период му обезбедуваше 24-часовна нега на папата.
Папата Франциско (88) почина вчера по мозочен удар и срцева слабост. Претходно оваа година, тој помина пет недели во болница со двојно воспаление на белите дробови, но се врати во Ватикан пред речиси еден месец и оттогаш се чинеше дека се опоравува.
Последните денови ги поминал работејќи, спротивно на советите на лекарите кои го советувале да мирува најмалку два месеци за да му овозможи на телото да закрепне.
Погребот на папата ќе се одржи в сабота.
Свет
Голем број верници се собраа во Рим за да му оддадат почит на папата: „Тој беше посебен, на сите христијани ќе им недостига“

Голем број граѓани на Италија и од други земји се собраа во базиликата „Света Марија Велика“ во Рим, каде што ќе бидат положени посмртните останки на папата Франциско, за да му оддадат почит на починатиот поглавар на Римокатоличката црква.
На тоа место се собраа голем број медиуми од целиот свет, а има и такви на плоштадот пред базиликата „Свети Петар“, каде што ќе се одржи погребот на папата Франциско в сабота, 26 април.
Меѓу собраните е и Евертон Коелјо од Бразил, кој моментно живее во Германија.
„Вчераутро пристигнавме во Рим. Кога вчера шетавме во градот, ја слушнавме многу тажната вест дека папата Франциско починал. Бевме изненадени и многу тажни. Тој беше харизматичен папа. Беше од Аргентина, Јужна Америка. И ние доаѓаме од Јужна Америка, па затоа чувствуваме дека е уште поблизок до нас. Беше приземен, многу близок до луѓето. Не живееше во замок, живееше едноставен живот“, изјави Коелјо за „Танјуг“.
Коелјо понатаму наведува дека ова е најголемата порака што папата Франциско ја остава зад себе.
„На христијаните многу ќе им недостига. Пред да дојдеме се обидовме да присуствуваме на мисата. За жал, минатата недела добивме порака дека папата нема да може да присуствува и дека ја откажале. А сега кога слушнавме дека нè напушта, многу е тажно“, рече Коелјо.
Друг Бразилец, кој денес беше во Рим, за „Танјуг“ вели дека го памети папата Франциско како едноставна личност, но и како некој што го сака фудбалот.
„Се сеќавам дека папата беше навивач на ‘Сан Лоренцо’ во Аргентина. Папата беше одлична личност за мене“, рече соговорникот.
Жителка од Рим за „Танјуг“ вели дека се сеќава на многу од она што го кажал папата Франциско оценувајќи го како неверојатно.
„Мислам дека ќе биде тешко да се најде замена за него“, рече тој.
Погребот на папата Франциско ќе се одржи в сабота, 26 април, во 10 часот наутро на плоштадот пред базиликата „Свети Петар“.
Претходно денес, беше објавено дека телото на починатиот папа ќе биде однесено во базиликата „Свети Петар“ в среда во 9 часот наутро.
Свет
ММФ: Светската економија значително ќе забави, на САД драстично

Меѓународниот монетарен фонд (ММФ) ги намали своите прогнози за економски раст за 2025 година велејќи дека зголемувањето на царините и општата неизвесност ќе доведат до значително забавување.
Во својата најнова глобална прогноза,ММФ предвидува дека светската економија ќе порасне за 2,8 процента оваа година, што е намалување во однос на претходната проценка од 3,3 проценти.
Најголем пад меѓу развиените економии забележаа Соединетите Американски Држави – сега се очекува раст од 1,8 процент во споредба со претходната процена од 2,7 процента.
Прогнозата за раст за Обединетото Кралство е исто така намалена – од претходните 1,6 процент на 1,1 процент во 2025 година.