Свет
14-годишно девојче во САД почина од Ковид-19

Хонести Хоџис, на која полицијата ѝ ставила лисици на рацете пред нејзиниот дом во Мичиген, кога имала само 11 години, почина во неделата на 14-годишна возраст.
Нејзината баба, Алиса Нимајер, објави на социјалните мрежи дека нејзината внука починала од Ковид-19.
„Со иклучително тешко срце морам да објавам дека мојата убава, дрска и паметна внука отиде да биде со Исус“, објави Нимајер на страница на која се собира финансиска помош.
Оваа страница беше отворена за да му се помогне на семејството на малолетничката да покрие медицински и други трошоци бидејќи нејзината мајка морала да престане да работи додека ќерка ѝ била хоспитализирана, пишува „Гардијан“.
Нимајер изјавила дека Хонести на 9 ноември, на нејзиниот роденден, дознала дека е позитивна на Ковид-19. Подоцна истата вечер брзата помош ја пренела во болница кога добила болки во стомакот. Таа нагласила дека нејзината внука немалa хронично заболување, но дека состојбата бргу ѝ се влошила во болницата и дека била ставена на респиратор.
„Не мислевме дека може да се случи такво нешто. Мислевме дека набргу ќе биде подобро, дека ќе дојде дома и тогаш ќе го прославиме нејзиниот роденден“, рекла бабата на девојчето.
Хонести првпат се најде во центарот на вниманието во 2017 година кога полицијата на неа, како 11-годишно дете, нејзината мајка и на братучедот им стави лисици на рацете додека се трагало по напаѓач што со нож избол бела жена. Нејзината мајка влегувала во продавницата со неа кога полицијата ги запрела, вперила пиштол кон нив и им ставила лисици.
На снимките од полициската камера се гледа како Хонсити плаче и вели: „Не, те молам“, додека полицајците ѝ ставаат лисици на рацете. Полициските службеници вклучени во инцидентот не беа дисциплински казнети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Турски аналитичар: Трамп прерано брзаше со иницијативите за Украина

Турскиот политички аналитичар Фатих Јончалик оцени дека американскиот претседател Доналд Трамп брзал во своите напори за решавање на украинскиот конфликт, пренесува РИА Новости.
Јончалик истакна дека главниот проблем е што Киев и западните сили немаат вистинска волја да бараат мир, поради што процесот остана без резултати.
„Можеби грешката на Доналд Трамп беше што брзаше да воспостави мир. Ова го покажуваат резултатите од состанокот меѓу лидерите на САД и Русија во Алјаска. Поточно, недостатокот на резултати. Сè уште не се постигнати конкретни договори со Алјаска“, рече аналитичарот.
Средбата меѓу американскиот и рускиот претседател Доналд Трамп и Владимир Путин се одржа на 15 август во Алјаска. Самитот во формат „три на три“ траеше два часа и 45 минути, но без конкретни договори, пренесува медиумот.
Фото: принтскрин
Свет
Трамп најави смртна казна за убиствата во Вашингтон: „Немаме избор“

Претседателот на САД, Доналд Трамп, изјави дека неговата администрација ќе бара смртна казна во случаи на убиства во Вашингтон.
„Кој и да убие некого во главниот град – смртна казна. Главниот град – смртна казна. Ако некој убие некого во Вашингтон, ние ќе бараме смртна казна“, рече претседателот за време на денешниот состанок со членовите на владата.
Тој рече дека ова е многу силна превентивна мерка. „Не знам дали сме подготвени за тоа во оваа земја, но немаме избор“, рече Трамп.
Тој додаде дека оваа мерка ќе се примени во Вашингтон, додека „федералните држави ќе мора сами да одлучат“.
Две недели, стотици членови на Националната гарда патролираат по улиците на главниот град на САД откако Трамп прогласи вонредна состојба, тврдејќи дека Вашингтон е погоден од бран на криминал. Министерот за одбрана, Пит Хегсет, минатата недела им даде овластување на тие војници да носат оружје по улиците на главниот град.
Локалната единица на Националната гарда на Вашингтон објави во неделата дека нејзиниот персонал ќе употреби сила само „како последно средство и само како одговор на непосредна закана по живот или сериозна телесна повреда“.
Во меѓувреме, Трамп, член на Републиканската партија, објави дека можеби ќе ја прошири својата програма за борба против криминалот во Чикаго, каде што, како и во Вашингтон, демократите се на власт. Во неделата, тој исто така навести можност за испраќање на Националната гарда во Балтимор, град во државата Мериленд, кој исто така го водат демократите.
Трамп нема овластување да ја испрати војската во Чикаго, изјави демократскиот конгресмен Хаким Џефрис за Си-Ен-Ен во неделата, нарекувајќи го секое такво распоредување обид на Трамп да предизвика криза.
„Нема законска основа, а Доналд Трамп нема овластување да испраќа федерални трупи во Чикаго“, рече Џефрис во неделата.
Некои републикански гувернери веќе испратија стотици членови на Националната гарда во Вашингтон по наредба на Трамп. Според него, главниот град на САД беше погоден од бран криминал, иако официјалните податоци покажуваат дека бројот на кривични дела во градот е намален.
Во неделата, Трамп изјави дека сега „нема повеќе криминал“ во Вашингтон, припишувајќи го тоа на неговата одлука да испрати трупи и стотици федерални агенти во градот. Сепак, претседателот не понуди никакви докази за тоа тврдење, забележува Ројтерс.
Фото: принтскрин
Свет
Тајфунот направи хаос во делови од Југоисточна Азија: има загинати, повредени и исчезнати

Најмалку осум лица загинаа како резултат на обилните дождови што предизвикаа поплави и лизгање на земјиштето во делови од Југоисточна Азија.
Во Виетнам, седум лица ги загубија животите, едно лице е исчезнато, а 34 се повредени, објавија државните медиуми.
Во некои делови од земјата, преку ноќ наврнаа речиси 20 сантиметри дожд, а предупредувањата за поплави останаа на сила за некои крајбрежни области, објавува Асошиејтед Прес.
Во Тајланд, едно лице загина, а друго е исчезнато поради лизгање на земјиштето предизвикано од тајфунот Каџики.
Одделот за спречување и ублажување на катастрофи на Тајланд соопшти дека многу куќи се оштетени од бурата, а неколку лица се повредени поради ненадејни поплави и лизгање на земјиштето во северните делови на земјата.
Метеоролошките служби на Лаос го предупредија населението да се подготви за доаѓањето на тајфунот, а со него и грмотевици, обилни врнежи од дожд и силни ветрови низ целата земја.
Фото: принтскрин