Рускиот претседател Владимир Путин и неговиот турски колега Реџеп Таип Ердоган денес телефонски разговараа за решавање на конфликтот во Украина, со посебен акцент на американските мировни предлози, но и за билатералните односи меѓу двете земји, пишува руската агенција РИА Новости.

„Беа разменети мислења за ситуацијата околу Украина, вклучително и во контекст на американските предлози за мирно решение“, кратко соопшти Кремљ. Во разговорот, Путин нагласи дека американските предлози, во верзијата што ја доби Москва, го следат правецот на разговорите со американскиот лидер Доналд Трамп одржани во Алјаска на 15 август. Според него, тој план во принцип може да послужи како основа за конечно мирно решение.

Ердоган, од своја страна, ја потврди намерата на Турција да придонесе во процесот на преговори и го понуди Истанбул како платформа за идните разговори. Двајцата лидери се согласија да ги интензивираат руско-турските контакти за мировниот процес на различни нивоа. Турскиот лидер му ги пренесе и на Путин своите впечатоци од самитот на Г20 во Јоханесбург. Како дел од разговорите за билатералните односи, беше потврден интересот за проширување на трговските и инвестициските врски и спроведување на заеднички проекти во енергетскиот сектор.

Минатата недела, американската администрација објави дека работи на мировна иницијатива за решавање на ситуацијата во Украина.

Како што изјави Путин, Москва го има текстот на американскиот план, но за него сè уште не е конкретно дискутирано. Путин рече дека документот може да послужи како основа за конечно решение.

Еден ден претходно, во Женева се одржаа преговори меѓу претставници на ЕУ, САД и Киев, каде што се разговараше за промените направени од европската и украинската страна на американскиот предлог.

Фото: принтскрин

Британски патролен брод пресретна руска корвета и танкер откако ги следел низ Ламанш со денови, соопшти синоќа Министерството за одбрана на Велика Британија. Лондон вели дека руската поморска активност во близина на британските води се зголемила за 30% во последните две години.

Според соопштението, патролниот брод „ХМС Северн“ во последните две недели ги пресретнал руската корвета „Стоикиј“ и танкерот „Јелња“ за време на нивниот премин низ Ламанш. Надзорот над руските бродови потоа го презел неименуван сојузнички брод на НАТО покрај брегот на Бретања.

Покрај бродовите распоредени покрај британскиот брег, Обединетото Кралство испратило и три авиони за надзор Посејдон во Исланд како дел од мисијата на НАТО што патролира во Северниот Атлантик и Арктикот во потрага по руски воени бродови и подморници, според Министерството за одбрана.

„Неодговорно и опасно однесување“
Веста доаѓа само неколку дена откако британскиот министер за одбрана Џон Хили изјави дека рускиот шпионски брод „Јантар“ ги заслепил со ласер пилотите на авионите за надзор што ги следат неговите активности крај шкотскиот брег. Лондон го нарече однесувањето на „Јантар“ „неодговорно и опасно“ и рече дека е подготвен да одговори на секое кршење на територијата на Обединетото Кралство.

Руската амбасада во Лондон ги отфрли тврдењата на Хили, обвинувајќи ја британската влада за „поттикнување на милитаристичка хистерија“ и тврдејќи дека Москва нема интерес да ја загрози британската безбедност.

Фото: принтскрин

Романското Министерство за одбрана денес објави дека ангажирало борбени авиони во текот на ноќта и рано утрово поради присуство на беспилотни летала во близина на романската граница за време на нападот врз Украина.

Во соопштението се наведува дека првите германски авиони „Еурофајтер Тајфун“ полетале во текот на ноќта за да ја следат ситуацијата во воздухот, откако системите за следење ги детектирале беспилотните летала.

Министерството изјави дека беспилотните летала исчезнале од радарот кратко откако експлозиите биле регистрирани во украинскиот пристанишен град Исмаил, на границата со Романија.

Упадот на беспилотни летала во романскиот воздушен простор не бил регистриран, а Тајфуните се вратиле во 57-та воздухопловна база околу еден часот наутро, пишуваат светските медиуми.

Недолго потоа, Романија подигнала два авиони Ф-16, кои забележале експлозии на украинска територија, на различни растојанија од Исмаил.

Дури и тогаш, влегувањето на беспилотни летала во воздушниот простор на Романија не било забележано, па авионите се вратиле во 86-та воздухопловна база кратко пред четири часот наутро.

Романија дели граница од 650 километри со Украина, а делови од уништени руски беспилотни летала постојано паѓаат на нејзина територија.

Фото: принтскрин