Бугарскиот премиер Бојко Борисов утрово ја достави оставката пред новоизбраното 45-то Национално собрание на раководениот од него Совет на министри, пренесуваат бугарските медиуми.

„ Писмото на премиерот Борисов, со кое тој поднесе оставка од кабинетот, денес беше доставено до претседателот на Националното собрание преку канцелариите на двете институции“, објави владината прес-служба.

Како што се додава, во согласност со Уставот, Владата предводена од премиерот Борисов ќе продолжи да ги извршува своите функции до изборот на нов Совет на министри и ќе постигне континуитет во управувањето.

Третиот кабинет на Борисов стапи на должност на 4 мај 2017 година. Тоа бшее прв мандат што лидерот на ГЕРБ го заврши како премиер, откако тој беше принуден да поднесе оставка во претходните два пред нивното истекување.

Во институтот „Торлак“ во Србија почна производството на руската вакцина „спутник В“.

Оваа вакцина во иднина ќе може да се извезува во земјите од регионот, соопшти Рускиот фонд за директни инвестиции, пренесоа српските медиуми.

„РФПИ и Институтот за вирусологија, вакцини и серуми ‘Торлак’ објавуваат дека почна производството на руската вакцина против коронавирусот ‘спутник В’ во Србија. Со ова, Србија стана првата држава во Јужна Европа која ќе ја произведува ‘спутник В’“, објави фондот.

Оттука додаваат дека производството во Србија е во согласност со најстрогите стандарди.

Грција планира од следната недела да го укине карантинот за патниците од Европската Унија и за уште пет други земји, вклучително и Србија, кои се вакцинирани или имаат негативен тест на Ковид-19, изјави денеска висок владин службеник.

Грција, која излезе од децениската финансиска криза минатата година пред пандемијата, рече дека од средината на мај ќе го отвори својот туристички сектор, кој е клучен двигател на растот за нејзината економија.

„Постепено ќе ги укинеме ограничувањата на почетокот на следната недела пред отворањето на 14 мај“, изјави службено лице од Министерството за туризам, кое побара да не биде именувано.

Официјалниот претставник рече дека на граѓаните од Европската Унија и од Србија, САД, Велика Британија, Израел и од Обединетите Арапски Емирати ќе им биде дозволено да патуваат во Грција преку аеродромите во Атина, Солун, Ираклион, Ханија, Родос, Кос, Миконос, Санторини и на Крф и на два гранични премина.

Патниците од тие земји нема да бидат ставени во карантин доколку докажат дека примиле две дози вакцина против Ковид-19 или покажат негативен ПЦР-тест не постар од 72 часа пред нивното пристигнување, рече официјалното лице, додавајќи дека туристите ќе мора да ги почитуваат домашните ограничувања.

Минатиот месец Грција го укина еднонеделниот карантин за израелски патници, кои биле вакцинирани или имале негативен ПЦР-тест. За патниците од Велика Британија и Обединетите Арапски Емирати, исто така потребен е втор задолжителен тест по пристигнувањето.