Бебе од Крагуевац, на кое му била дијагностицирана инфекција со коронавирус веднаш по раѓањето, починало денес на Универзитетската детска клиника „Тиршова“ во Белград, пренесува порталот „Телеграф“.

Веднаш по раѓањето, на бебето, кое почина само по девет дена, му била утврдена инфекција со коронавирус. Тоа било во добра состојба во првите часови по раѓањето, но во третиот час добило температура и набргу ги развило сите симптоми на инфекцијата.

Новороденчето било поврзано на респиратор, но за време на третманот се развило мултисистемско откажување на сите органи, па со медицински надзор било префрлено на Универзитетската детска клиника „Тиршова“.

Како што пишува „Телеграф“, инфекцијата со коронавирус довела до цитокинска бура, состојба што вклучува создавање огромен број имунолошки клетки и прекумерно производство на цитокини. Оваа состојба се манифестира со сериозно воспаление, пневмонија, отежнато дишење, воспаление на дишните патишта и може да доведе до откажување на повеќе органи.

Феноменот цитокинска бура – прекумерна реакција на имунолошкиот систем, се смета за главен фактор за откажување на органите и смрт кај некои пациенти со коронавирус, но засега не е јасно до кој степен тешката пневмонија кај критично болните пациенти со Ковид-19 е последица на вирусот или компликација како резултат на прекумерната реакција на организмот.

Цитокините се протеини со мала молекуларна маса кои дејствуваат како медијатори меѓу делови на имунолошкиот систем. Тие се лачат од разни клетки, како макрофаги, лимфоцити, фибробласти… Цитокинска бура е процес во кој нашиот имунолошки систем реагира на непознат вирус со прекумерно создавање клетки.

Тешкотии со дишењето, чувство на притисок врз белите дробови, усните и лицето стануваат синкави – ова се знаци на тревога и бараат итна медицинска интервенција, предупредува американскиот Центар за контрола и превенција на болестие (ЦДЦ).

Повеќето од хоспитализираните заболуваат од тешка пневмонија и болеста ги погодува обете белодробни крила. Влошувањето честопати се случува нагло, седум дена по појавата на првите симптоми, објаснуваат здравствените експерти.

Хиперимуната реакција – хиперпродукција на цитокини што предизвикува блокада на алвеолите во белите дробови – создава едем што спречува кислородот да влезе во крвотокот, ги затнува крвните садови во бубрезите и другите органи и набргу доведува до откажување на виталните системи на телото.

Лекарите предупредуваат дека најлошото е што таквата реакција се случува многу бргу, во рок од 24 до 48 часа, и медицинскиот персонал е буквално немоќен да се справи со состојбата.

Патниците од Грција и Северна Македонија ќе мора да седат во карантин во траење од 14 дена по влез во Албанија. Мерката ќе стапи во сила од вторник, 20 април, објави денеска албанскиот Комитет на експерти за справување со пандемијата.

„Ефектот од масовната вакцинација во нашата земја почна да се чувствува. Но, она што се забележува во регионот е една ситуација што не е иста како во нашата земја. Во Северна Македонија и Грција е зголемен бројот на случаи, но и бројот на изгубени животи, а тоа може да се види на презентираните графикони. Предизвик на нашиот комитет е да ги подобри индикаторите“, рече Мира Ракацоли, претседателка на комитетот и заменик-министерка за здравство.

Мерката ќе биде во сила до 3 мај, пренесе порталот „Егзит“.

Исто така, било одлучено од утре наставата во средните училишта да се изведува комбинирано – и на училиште и преку интернет.

Комитетот исто така објавил дека во следните денови во Албанија ќе пристигнат 200.000 дози вакцини.

Опасноста од згрутчување на крвта кај заболените од Ковид-19 е далеку поголема отколку кај вакцинираните против оваа болест, изјави во понеделникот водечкиот словенечки епидемиолог Матеја Логар, кој го предводи стручниот совет на словенечката влада.

Додека следењето на вакцинираните покажа дека ризикот од развој на згрутчување на крвта што може да предизвика венска тромбоза или белодробна емболија со вакцината на „Астразенека“ е многу мал, или еден случај на милион вакцинирани, во Словенија сериозни тромбоемболиски компликации се јавуваат кај околу една четвртина од пациентите лекувани од Ковид-19 во единиците за интензивна нега на словенечките болници, рече Логар. Таа на прес-конференција одговори на прашање во врска со недовербата создадена во јавноста во врска со вакцинацијата со вакцината на британско-шведската компанија, поради што дел од купените вакцини сè уште остануваат неискористени.

Тоа значи дека околу 40 пациенти со ковид, од вкупно 153 кои се моментално во словенечките болници, можат да сметаат на тој ризик, објасни Логар пред новинарите.

Таа смета дека од самиот почеток се направени голем број недостатоци во комуникацијата со јавноста во промовирањето на вакцината на „Астразенека“, иако е прогласена за безбедна и ефикасна од Европската агенција за лекови.